Déhqan mewlan sidiq ghuljadiki qamal mezgilide dora we yémeklik yétishmeslik sewebidin qaza qilghan

Muxbirimiz shöhret hoshur
2022.08.31
Share on WhatsApp
Share on WhatsApp
uyghur-qeshqer-2020-oktebir-virus-photo-1.jpg Kiyim-kéchek zawutining 17 yashliq xizmetchisi korona wirusi bilen yuqumlan'ghanliqi éniqlan'ghandin kéyin, 4 milyon 750 ming ahalini tekshürüp bolushtek keng kölemlik korona wirus siniqi bashlan'ghan. 2020-Yili 25-öktebir, qeshqer.
AFP

Qamal sewebidin ghuljada ahalilerning acharchiliqqa duch kelgenliki ijtima'iy taratqularda keng tarqalghandin kéyin, muxbirimiz ghuljagha téléfon qilip, mexsus bu jehette éniqlash élip bardi. Netijide ghulja nahiyesining qarayaghach yézisdiki 62 yashliq déhqan mewlan sidiqning yémeklik yétishmeslik we dawamliq ichiwatqan dorisining waqtida yétip kelmigenliki sewbidin késili éghirliship hayatidin ayrilghanliqi delillendi. Alaqidar xadimlardin biri nahiye boyiche az dégende 12 kishining achliq we késeldin ölgenlikini tilgha aldi

Ijtima'iy taratqulardiki inkaslardin melum bolishiche, bu qétimqi qamalda iqtisadiy jehettin éghir qéyinchiliqi bar a'ililer bilen salametlikide mesile bar ahaliler hayatiy tehditke duch kelgen. Ghuljagha qarita élip barghan téléfon ziyaretlirimiz dawamida, bezi kent kadirliri öz tewelikide namrat a'ililerning barliqini yoshurmighan bolsimu, emma ularning qamal mezgilide héchqandaq qiyinchiliqqa duch kelmigenlikini ilgiri sürdi.

Téléfonimizni qobul qilghan yashan'ghanlardin biri, özlirining dorisining waqti-waqtida yetküzülüp bériliwatqanliqini tilgha élish bilen birlikte, ozuqluqi üchün jörisi bilen ikkisige aran besh nan bérilgenliki, buningghimu üch kün bolghanliqini ashkarilidi. Ghulja nahiyesining qarayaghach yézisidiki bir amanliq mudiri, öz tewelikide achliqtin ölgen kishining kim ikenlikini sorighinimizda, u 62 yashliq mewlan sidiqning ismini tilgha aldi.

Uning bayanliridin melum bolushiche, qamal bashlan'ghandin kéyin mewlan sidiqning salametlikide éghir mesile körülüp, doxturxanigha élip bérilghan we dawalash ünüm bermey qaza qilghan.

Ahalilerdin birining bayan qilishiche, mewlan sidiq qamal bashlinip bir heptidin kéyin ozuq-tülüktin qiynilishqa bashlighan we dawamliq ichip turidighan dorsimu tügep ketken. Mezkur amanliq mudiri, mewlan sidiqning ölümige achliq yaki dora yétishmeslik seweb bolghanliqi heqqidiki so'alimizgha jawaben, bu heqte kent mes'ullirining éniq melumati barliqini, özining bu heqte xewiri yoqluqini éytti.

Mezkur yézidiki yene bir kent kadiri, mewlan sidiqning depne ishliri heqqide melumat bérish jeryanida, uning eslide öpke tubérkulyuz késili barliqini tilgha aldi. Emma bu xadimmu mewlan sidiqning ölümige késel yaki achliq seweb bolghanliqi heqqide melumat bérelmidi.

Axirida téléfonimizni qobul qilghan bir siyasiy-qanun kadiri, mewlan sidiqning qamal bashlinip 10 kündin kéyin qaza qilghanliqini tilgha élish bilen birlikte, uning axiriqi künlerde béqishsz qalghanliqi, mehelle etrapidiki “Pida'iy” dep atalghan wezipidarlarningmu, uning bilen chatiqi bolmighanliqi, hetta yéziliq partkom we hökümet rehberliriningmu mewlan sidiqning ölümini kéchikip uqqanliqini ashkarlidi.

Kent amanliq mudiri, mewlan sidiqning béqishsiz qélishigha uruq-tughqanlirining biperwaliqi seweb bolghanliqini ilgiri sürgen idi. Emma mezkur siyasiy-qanuni xadimi, bu ishta asasiy qatlamdiki xizmetchi xadimlarning mes'uliyetsizlikining seweb bolghanliqini tilgha aldi. U yene mana mushundaq mes'uliyetsizlikler sewebidin nahiye boyiche 20‏-awghust künige qeder, az dégende 12 neper kishining achliq yaki késeldin qaza qilghanliqini ashkarilidi, emma u bu 12 kishining kimlikliri heqqide melumat bermidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.