Uyghur rayonidiki xizmet gurupplirining yerlik ahalilerni choshqa göshi yéyishke köndürüsh üchün herket qiliwatqanliqi ashkarilandi

Muxbirimiz shöhret hoshur
2019-11-15
Élxet
Pikir
Share
Print
Lagér shahiti zumret dawut "Qoshmaq tughqan" i bilen birge. 2018-Yili. Ürümchi.
Lagér shahiti zumret dawut "Qoshmaq tughqan" i bilen birge. 2018-Yili. Ürümchi.
Zumret Dawut Teminligen.

Uyghur rayonidiki xizmet gurupplirining yerlik musulman ahalilerni choshqa göshi yiyishke köndürüsh üchün herket qiliwatqanliqi ashkarilandi. Mekit nahiyeside wezipe ötewatqan bir xadim özlirining ahalilerni "Milletler ittipaqliqi tamiqi" namida xitaylar bilen birlikte tamaq yéyishke teshkillewatqanliqini bayan qilghan bolsa, bu xil pa'aliyetning peyziwattimu élip bériliwatqanliqini bayan qilghan yene bir xadim bu pa'aliyetke qatnashqan ahalilerning tamaqqa sélin'ghan göshning choshqa göshi yaki emeslikini sorishigha bolmaydighanliqini ashkarilidi.

Ötken yili maralbéishidiki bir Uyghur kadir köpchilikning aldida éghizigha choshqa göshini séliwatqan halette bashqilarni choshqa göshi yéyishke dewet qilghan. Emma bu heqtiki xewer qisqa waqit ichide torlardin öchüriwétilgen. Yene shu mezgilidiki "Milletler ittipaqliqi" témisidiki bir parche maqalide "Jongxu'a medeniyiti" din hozurlinishning éghizdin bashlinidighanliqi otturigha qoyulghan

Xitayning "Diniy esebiylikning alametliri" heqqidiki höjjet we uqturushlirida gerche Uyghur rayonidiki yerlik musulmanlarning choshqa göshi yéyishi ashkara teshebbus qilinmighan bolsimu, emma turmushta halal-haramni ayrimasliqni ochuq teshebbus qilish we yaki halal-haramni ayrishta mewjut örp-adetlerge xilap chek békitip bérish arqiliq ahalilerni yépiq shekilde choshqa göshi yéyishke ündigen. . Biz bu tür chaqiriqlarning ijra'at ehwali üstide alaqidar xadimlardin melumat soriduq. 

Eslide siyasiy-qanun saheside ishleydighan, nöwette mekit nahiye'isige xizmetke chüshken bir xadim özlirining "Milletler ittipaqliqi" pa'aliyiti süptide ahalilerni "Milletler ittipaqliqi tamiqi" namidiki xitayche tamaqlarni yéyishke teshkillewatqanliqini ashkarilidi. U bu tamaqlarda choshqa göshi yoqluqi we déngiz mehsulatliri barliqini tilgha alghan bolsimu, emma u yene söhbetlerde "Choshqa göshi haram" dégen gepni qilishqimu bolmaydighanliqini eskertti. 

"Milletler ittipaqliqi tamiqi" namidiki xitaylar bilen birlikte tamaq yéyish pa'aliyitining peyziwattimu dawamlishiwatqanliqini bayan qilghan yene bir xadim bu tamaqni étishke mexsus shi'endin mu jün isimlik bir xitay ashpezni teklip qilghanliqini melum qildi. Bu xadimmu ahalilerning choshqa göshi bar-yoqluqi heqqide so'al soriyalmaydighanliqini tekitlidi. U ochuq halda "Milletler ittipaqliqi tamiqi" ning meqsiti qorsaq toyghuzush emes, belki "Medeniyet singdürüsh" ikenlikini we özlirining mushu jehette wezipilendürülgenlikini eskertti. 

Uyghur rayonidin yéqinda chiqqan lagér shahiti zumret dawut qa'ide-tüzümlerning herqaysiy orunlarda perqliq ikenlikini, shunga da'iriler bezi jaylarda choshqa göshi yéyishni yépiq shekilde otturigha qoysa, yene bezi jaylarda ashkara we tehdit arilash teshebbus qilidighanliqini bayan qildi. Özining bundaq bir teshebbusqa a'it birer yazma höjjet yaki uqturushni körüp baqmighanliqini bayan qilghan zumret dawut, bundaq bir höjjetning qeshqer we xotenlerde bolush éhtimalliqini ilgiri sürdi. U yene asasiy qatlamdiki xizmet guruppilirining yerlik musulman ahalilirini choshqa göshi yéyishke köndürüsh üchün wezipilendürülgenlikini tekitlidi. 

Ilgiri ziyaritimizni qobul qilghan xotendiki bir kent sékritari eger aldigha ekilinse, özining choshqa göshi yéyishni ret qilmaydighanliqini bayan qilghan idi.

Toluq bet