Пәйзиватта бир хитай оқутқучиниң синипта уйғур оқуғучиға зораванлиқ қилиши күчлүк инкас қозғиди

Мухбиримиз меһрибан
2021-01-04
Share
Пәйзиватта бир хитай оқутқучиниң синипта уйғур оқуғучиға зораванлиқ қилиши күчлүк инкас қозғиди Мәлум бир мәктәптә хитай оқутқучиниң синиптики оқуғучилар алдида бир уйғур оқуғучиға зораванлиқ қиливатқан син көрүнүшидин сүрәткә елинған.
Social Media

Йеқинқи бирқанчә йилдин буян хитай һөкүмити уйғур дияридики оттура-башланғуч мәктәпләрдә "дөләт тили" оқутуши намида хитай тиллиқ маарипни омумлаштурди. Әмма уйғур дияриға "ярдәм" намида йөткәп келингән хитай оқутқучилириниң оқутқучилиқ сапасида көрүлүватқан мәсилиләр, болупму уларниң уйғур оқуғучиларни кәмситиши, һәтта уларни уруп-думбалаштәк зораванлиқ қилмишлири ашкарилинип, һәр саһәниң җиддий диққитини қозғимақта.

Алдинқи һәптә, йәни 2020-йили 12-айниң ахири қәшқәрниң пәйзиват наһийәсидики мәлум бир мәктәптә хитай оқутқучиниң синиптики оқуғучилар алдида бир уйғур оқуғучиға зораванлиқ қиливатқан син көрүнүши иҗтимаий таратқуларда ашкариланди.

Мәзкур син көрүнүши ашкариланғандин кейин, хитай ичи сиртидики иҗтимаий алақә мунбәрлиридә қаттиқ наразилиқ инкаси қозғиди.

Мәзкур син көрүнүши һәққидә пәйзиват наһийәлик сақчи идариси дәсләп үндидар салонида уқтуруш чиқирип, мәзкур вәқәниң сахта хәвәр икәнликини билдүргән иди.

Биз 12-айниң 29-күни вә 30-күнлири мәзкур вәқәни ениқлаш үчүн пәйзиват наһийәлик маарип идариси, пәйзиваттики бирқанчә мәктәпләр вә пәйзиват наһийилик сақчи идариси қатарлиқ җайларға телефон қилдуқ.

Мәктәпләргә қилған телефонимиз җавапсиз қалди. Пәйзиват наһийәик маарип идарисиға қилған телефонимиз уланған болсиму, әмма идарә хадими сориған соалимизға җавап беришни рәт қилип, телефонни үзүвәтти.

Пәйзиват наһийәлик сақчи идарисиға қилған телефонимиз уланди. Телефонни алған сақчи хадими бизниң бу вәқә һәққидики соаллиримизни аңлиғандин кейин, бу әһвални алди билән мәктәп рәһбәрликигә инкас қилишимизни ейтти.

Биз бу сақчи хадимиға мәзкур хитай оқутқучиниң синипта оқуғучини уруп униң қулиқини яриландуруши вә аңлимас қилип қоюшиниң җинайәт категорийәсигә киридиғанлиқи тоғрилиқ гәп қилғинимизда, у бу әһвални чоқум аилә башлиқиниң өзи сақчиға келип мәлум қилиши керәкликини билдүрди.

Мәзкур вәқәгә қарита уйғур дияриниң ичи-сиртидики иҗимаий таратқуларда қаттиқ ғулғула қозғалғандин кейин, пәйзиват наһийәлик сақчи идариси 31-декабир күни қайтидин уқтуруш чиқирип, уйғур оқуғучини урған хитай оқутқучиниң тәкшүрүлүватқанлиқини елан қилди.

Пәйзиват наһийилик һөкүмәт торида елан қилинған уқтурушта мундақ дейилгән: "2020-йили 12-айниң 21-күни қәшқәр вилайити пәйзават наһийәсидики мәлум оттура мәктәп толуқсиз 3-йиллиқ оқуғучиси я фамилилик ( 15 яш) дәрскә кечикип қалғанлиқи үчүн, ма фамилилик оқутқучи билән такалишип қалған. Ма фамилилик оқутқучи я фамилилик оқуғучини тәстәк билән урған вә пути билән тәпкән. Вәқә йүз бәргәндин кейин, мәктәп рәһбәрлики сақчиға мәлум қилған. Пәйзават наһийәлик җамаәт хәвпсизлики идариси 22-декабир кәчтә дело турғузуп тәкшүрүш хизмитини қанат яйдурған. Шу күни ма фамилилик оқутқучға қанун бойичә алақидар тәдбирләрни қолланди. Қәшқәр вилайәтлик 1-хәлқ дохтурханисиниң 12-айниң 22-күни диягноз қоюп, я фамилилик оқуғучиниң оң қулиқиниң яриланғанлиқини дәлиллиди. Нөвәттә ярилиниш әһвалини баһалаш иши қанат яйдурулмақта. Һазир дело беҗириливатиду, кейинки илгириләш әһвали тоғрилиқ вақтида хәвәр берилиду."

Мәзкур хитай оқутқучиниң синипта уйғур оқуғучини уруш вәқәси вә мәзкур син көрүнүшини ашкарилиғучиниң тәқдири мәсилиси нөвәттә иҗтимаий таратқуларда йәнила җиддий диққәт нуқтиси болмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт