“UyghurSTEM” мәктипиниң ғунчилири бих сүрүшкә башлиди

Вашингтондин мухбиримиз нуриман тәйярлиди
2023.10.25
UyghurSTEM_01 UyghurSTEM Ниң 5-қетимлиқ робот көргәзмисидин бир көрүнүш, 2023-йили 1-өктәбир, истанбул
UyghurSTEM

 Түркийәниң истанбул шәһирини мәркәз қилған “UyghurSTEM” намидики мәктәп уйғур балиларға тор йүзидә вә йүзтуранә өтүлидиған робот вә пирограмма тили дәрслири билән муһаҗирәттики уйғурларға наһайити тонушлуқ. Алдинқи қетимлиқ пирограммимизда мәзкур мәктәптә 6-айниң оттурилиридин 9-айниң оттурилириғичә язлиқ тәтил бойичә пирограмма тиллири вә робот дәрси өтүлгәнликини аңлатқанидуқ.

“UyghurSTEM” мәктипиниң оқуғучилири пирограмма тили өгәнмәктә, 2023-йили авғуст, истанбул
“UyghurSTEM” мәктипиниң оқуғучилири пирограмма тили өгәнмәктә, 2023-йили авғуст, истанбул
UyghurSTEM

“UyghurSTEM” мәктипиниң оқуғучилири дәрс пирограммилириға асасән сүний әқил (AI) , күчәйтилгән реаллиқ (AR) техникисини ишлитип, һәр түрлүк оюнларни ясиған. Һәр хил темиларда илмий тәкшүрүшләрни елип барған. Балиларниң илим-пәнгә болған қизиқишини техиму юқири көтүрүш үчүн, 2019-йили UyghurSTEM қурулғандин тартип һәр йили техника фестивали өткүзүп кәлгән болуп, йеқинда улар “2023-йиллиқ UyghurSTEM техника фестивали” ни өткүзгән.

“UyghurSTEM” гурупписиниң қурғучиси мәмтимин нуридин муәллим радийомизниң зияритини қобул қилип, мәзкур фестивал һәққидә тәпсилий чүшәнчә бәрди.

Ибраһим, һәмзә ака-укилар айропилан ясаватқан көрүнүш, 2023-йили, истанбул
Ибраһим, һәмзә ака-укилар айропилан ясаватқан көрүнүш, 2023-йили, истанбул
UyghurSTEM

Фестивалға қатнашқан маһирлар аләм билимлири, хаккерлик һәққидики мәлуматлардин тартип, “кирпини қандақ бақимиз” , дегәнгә охшаш һәр түрлүк қизиқарлиқ темилар һәққидә әтраплиқ лексийә бәргән. Улар өзлири тәйярлиған сунум (PowerPoint) дики хәтләрни уйғурчә йезишқа, чүшәндүргәндә уйғурчә сөзләшкә әһмийәт бәргән. Балиларниң бир қанчиси айропилан һәққидә лексийә тәйярлиған болуп, уларниң ичидә ибраһим, һәмзә ака-укилар өзлири ясиған айропиланни тонуштурған.

“UyghurSTEM” мәктипиниң оқуғучилири робот ясимақта, 2023-йили авғуст, истанбул
“UyghurSTEM” мәктипиниң оқуғучилири робот ясимақта, 2023-йили авғуст, истанбул
UyghurSTEM

Мәзкур фестивалға америка аләм қатниши идариси (NASA) ниң инженери доктор әркин сидиқ әпәнди қатнашқан болуп, у балиларниң бәргән лексийәлиригә наһайити юқири баһа бәргән.

 Әркин сидиқ әпәнди бу һәқтә радийомизниң зияритини қобул қилди. У уйғур балилириниң шараит яритип берилсила аҗайип қалтис ишларни қилалайдиғанлиқиға ишинидиғанлиқни билдүрди.

Фестивалға әнглийәдин тор арқилиқ қатнашқан алтә яшлиқ фәруқ йүсүп кирпә һәққидә лексийәсини раван уйғур тилида қизиқарлиқ қилип сөзләп бәргәндә, пүтүн тамашибинлар апирин ейтишип кәткән.

Фәруқ йүсүп радийомизға сөз қилип, өзиниң кәлгүсидә теслаға охшаш юқири техникилиқ қатнаш қораллирини иҗад қилиш арзуси барлиқини чүчүк тиллири билән аңлатти.

“UyghurSTEM” мәктипиниң оқуғучилири робот ясимақта, 2023-йили авғуст, истанбул

Паалийәткә тамашибин сүпитидә қатнашқан аминә сәдәф ханим зияритимизни қобул қилип, өзиниң нәқ мәйданда һес қилғанлирини биз билән ортақлашти.

“UyghurSTEM” гурупписиниң рәсмий тор бетидики мәлуматларға қариғанда, мәзкур гуруппа уйғурлар арисида тәбиий пән, техника қизғинлиқини қозғаш, яш-өсмүрләр арисида робот вә илим-пән билимлирини омумлаштуруш мәқситидә 2019-йили қурулған. Қурулғандин буян тор йүзи вә йүзтуранә шәкилдә компютер, робот, пирограмма тиллири, математика, физика вә башқа тәбиий пәнләр бойичә дәрс өтүлгән. Дәрсләр пүтүнләй һәқсиз болуп, компютер пирограмма тиллири вә робот дәрслири бойичә тәрбийәләнгән оқуғучиниң сани 600 дин ашқан.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.