Қазақистанда қолға елинған қирғизистанлиқ уйғур сәнәткар викрам розахуноф бишкәккә қайтип кәлди

Ихтиярий мухбиримиз ферузә
2022.01.12
Қазақистанда қолға елинған қирғизистанлиқ уйғур сәнәткар викрам розахуноф бишкәккә қайтип кәлди Қазақистанда қолға елинған қирғизистанлиқ уйғур сәнәткар викрам розахуноф бишкәккә қайтип кәлди. 2022-Йили 10-январ.
Social Media

Қазақистанниң алмута шәһиридә террорлуқ җинайити билән қолға елинған тонулған қирғизистанлиқ җәз музикиси сәнәткари викрам розахуноф қоюп берилип қирғизистан консулиниң машинисида бишкәккә елип келингән.

Мәлум болушичә қазақистан җумһурийити 2022-йилини қаттиқ наразилиқ һәрикити билән башлиған. 2-январ күни қазақистанниң ғәрбидики җанаозен шәһиридә башланған мәмликәт характерлик наразилиқ һәрикити тоқунушқа айланди. Әң зораван тоқунушлар алмута шәһиридә йүз бәргән, һәтта “коллектип бихәтәрлик шәртнамиси” тәшкилати шәһәргә қошун киргүзди. Қазақистан җумһурийитиниң президенти қасим җомарт тоқайеф хәлққә қилған сөзидә, мәмликәткә сирттин кәлгән террорчилар һуҗум қилғанлиқини ейтти.

9-январ күни қазақистандики “хабар 24” телевизийә қанили бир қирғизистанлиқ йигитниң наразилиқ һәрикитигә қатнишиш үчүн пул алғанлиқини иқрар қилған бир син тарқатти. Мәзкур син иҗтимаий таратқуларда, болупму сәнәткарлар арисида ғәзәплиниш долқунини қозғиди. Сәвәби синдики йигит тонулған сәнәткар викрам розахуноф иди. Шу күнила чүштин кейин қирғизистанда турушлуқ қазақистан җумһурийитиниң әлчиханисиниң алдида сәнәткарлар “викрамға әркинлик”, “сиясий суйиқәстләргә йол йоқ” қатарлиқ шоарларни товлап наразилиқ намайиши уюштурушни. Намайишқа 40 тин ошуқ тонулған сәнәткар қатнашти. Атақлиқ нахшичи ирискәлди осмонқулоф елтр телевизийә қанилиниң зияритини қобул қилғанда викрамни террорлуқ билән әйибләш пүтүнләй бимәнә дәп тәкитлигән. У мундақ дегән: “викрам розахунофниң пул елип наразилиқ һәрикәтләргә қатнашқанлиқиға биз қәтий ишәнмәймиз. Бу пүтүнләй бимәнә. Викрам розахуноф бизниң сәнәткаримиз, у наһайити яхши адәм”.

Мәзкур намайишқа қатнашқан тонулған нахшичи ирина руская ашу телевизийә қанилиниң зияритини қобул қилғанда викрамни дәрһал қоюп беришни тәләп қилғанлиқини билдүрди. У мундақ дегән: “синдики йигит викрам икәнликини биз һәммимиз бирдинла җәзмләштүримиз. У даңлиқ вә мувәппәқийәт қазанған пиано чалғучиси, биз һәммимиз униң билән ишлигән. Биз өзимизниң қаттиқ наразилиқимизни билдүримиз һәм өзимизниң президентимизға һәм қазақистан һөкүмитигә мураҗиәт қилимиз, викрамни дәрһал қоюп бәрсун. Викрамниң наһайити еғир яриланғанлиқини синдин көрүватимиз, шуниң үчүн биз униң дәрһал қоюп берилишини тәләп қилимиз”.

Дөләт бихәтәрлик комитетиниң башлиқи қамчибек ташийеф дөләт телевизийә қаналлири мухбирлириниң соаллириға җаваб бәргәндә “викрам розахуноф террорист болуши мумкин әмәс” дәп тәкитлигән.

Ахири қазақистан һөкүмити викрамни қоюп беришкә мәҗбур болди. 10-январ күни кәчтә викрам розахуноф “ақ җол” чегра понкитидин өтүп бишкәккә елип келинди. Игилинишичә у қирғизистанниң алмутада турушлуқ консулханисиниң машинисида елип келинди. Викрам розахуноф ғәзәп қозғиған синда сақта баянат бәргәнлики тоғрисида чүшәнчә берип қирғизистан һөкүмитигә өз миннәтдарлиқини билдүрди.

Гәрчә викрам розахуноф өйигә балдуррақ қайтиш үчүн синдики сахта баянатини өз ихтияри билән бәргәнликини тәкитләп өтсиму, иҗтимаий таратқуларда униң сахта иқрари қазақистан һәрбий хадимлири вә сақчилириниң зораванлиқ һәрикәтлири билән қилдурулғанлиқи актип музакирә қилинмақта.

Қирғизистан вә орта асияда даңлиқ нахшичи шөһрәт яқубоф, радийо зияритимизни қобул қилип әң муһими викрамниң өйгә қайтип келиши дәп тәкитләп, шундақла бу вәқә қирғизистан вә қазақистан хәлқлириниң достлуқиға тәсир көрситәлмәйдиғанлиқиға үмид билән қарайдиғанлиқини ейтти.

Викрам розахуноф 1986-йили бишкәк шәһиридә бир уйғур аилисидә дуняға келгән. Аниси көп йил җиддий қутқузуш машинисида дохтур болуп хизмәт көрсәткән, акиси җиддий қутқузуш бөлүминиң башчиси. Викрам кичикидинла нахша-сазға алаһидә һерсмән болуп, кейин бишкәктики муратали куренкейеф намидики музика мәктипини тамамлиған. Бүгүнки күнләрдә викрам қирғизистандики әң юқири дәриҗидики сәнәткәрлар билән бирликтә сәһнидә оюн қойиду. У пәқәт қирғизистандила әмәс, бәлки оттура асия, җүмлидин қазақистандики сәнәткарлар арисидиму даң чиқарған. У даңлиқ җәз музиканти болуш сүпити билән көплигән хәлқара мусабиқиларға қатнашқан. “сентрал асиа арт мәнәҗмент” фондиниң әзаси, “арттек медиа груп” уюшмисиниң вәкили, шундақла хәлқара “җәз бишкәк сприң” фестивалиниң вәкилидур.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.