"Wirus krizisi yardem merkizi" ni qollash seperwerliki qozghaldi

Ixtiyariy muxbirimiz ekrem
2020-04-02
Élxet
Pikir
Share
Print
D u q ning teshebbusi bilen qurulghan "Wirus krizisi yardem merkizi" ning logosi.
D u q ning teshebbusi bilen qurulghan "Wirus krizisi yardem merkizi" ning logosi.
Photo: RFA

Muhajirettiki Uyghurlar arisida "Wirus krizisi yardem merkizi" ning chaqiriqini qollash sadaliri kücheymekte.

Wuxendin tarqalghan korona wirusi pütün dunyagha éghir apet bolupla qalmay, belki yene Uyghurlar nisbeten köp olturaqlashqan türkiyege oxshash döletlerdimu zor bésimlar peyda qilmaqta. Bu seweblik dunya Uyghur qurultiyi bashliq muhajirettiki Uyghur teshkilatliri müshkülat ichide qalghan qérindashlirini qutquzup qélish üchün derhal heriketke ötüp "Wirus krizisi yardem merkizi" ni qurup chiqishqa mejbur bolghan.

Muhajirettiki 30 din artuq Uyghur teshkilatlirining ortaq hemkarliqi bilen jiddiy qurup chiqilghan "Wirus krizisi yardem merkizi" 31-mart küni muraji'etname élan qilip pütün dunyadiki Uyghurlarni iqtisadiy yardem seperwerlikige ündigen.

Muraji'etnamide "Dunyaning herqaysi elliride yashawatqan qérindashlirimizning mezkur chaqiriqimizgha yéqindin awaz qoshup tul anilar, yétim-yésir balilar, teminati üzülüp qalghan oqughuchilarni asasi nishan qilip yardem bérish üchün téz sür'ette heriketke ötüshni iltimas qilimiz" déyilgen hemde "Biz xelqimizge shuni wede bérimizki, toplan'ghan bu yardemlerni héchqandaq yurt, rayon, kesip, jins, pikir-chüshenche, dost, uruq-tughqan dégendek arqa körünüshlerge qarimastin peqet sherqiy türkistanliq bolushtin ibaret ortaq kimlikini asas qilip heqiqiy mohtaj qérindashlirimizgha yetküzimiz!" dégen ibarilerge orun bérilgen.

1-Aprél küni d u q re'isi dolqun eysa ependi muhajirettiki Uyghurlargha qarita ijtima'iy taratqularda chaqiriq élan qilip "Wirus krizisi yardem merkizi" ning xizmetlirini aktip qollashni teshebbus qilghan. U sözide Uyghurlarning bir-birige yardem qilishtek ésil en'enige ige bir millet ikenlikini eskertip, buning misali süpitide muhajirettiki Uyghurlarning 2017-yili misirdin yurtigha qayturulush éhtimali bolghan nurghunlighan Uyghur oqughuchilarni xitayning changgilidin qutuldurup qélish üchün bes-beste xalisane töhpiler qoshqanliqini tilgha élip ötken.

D u q re'isi dolqun eysa ependining "Wirus krizisi yardem merkizi" ning xizmetlirini aktip himaye qilish chaqiriqi ijtima'iy taratqularda qizghin qollashqa érishken. Bu merkezning mes'uli bolghan turghunjan alawudun ependining bildürüshiche, bügün dunyaning herqaysi jayliridiki bir qisim Uyghurlar merkezge téléfon qilip, özlirining bir ülüsh hessilerni qoshushni xalaydighanliqini bildürüshken.

Biz 15 yildin buyan gérmaniyening myunxén shehiridiki "Chonglar meshripi" namida atilip kéliwatqan bir Uyghur jama'et topining bu pa'aliyetke da'ir inkaslirigha diqqet qilduq. Bular öz taratqu toplirida bes-beste i'ane qilishqa bashlighan idi.

"Wirus krizisi yardem merkizi" toplawatqan bu i'aniler asasen türkiyediki qiyinchiliqta qalghan Uyghurlarni nishan qilghan bolup, bu merkez jem'iy 17 dölette wakaletchi turghuzghan. Wakaletchiler toplan'ghan i'anilerni qisqa muddet ichide merkezge yetküzüp, türkiyediki Uyghurlargha teqsim qilidiken.

Toluq bet