Профессор алимҗан инайәт: “вирустин кейинки вәзийәт уйғурларға пурсәт елип келиши мумкин”

Ихтиярий мухбиримиз әркин тарим
2020.05.01
alimjan-inayet-sozde.jpg Түркийә измирдики әгә университети түрк дуняси тәтқиқат мәркизи профессори алимҗан инайәт әпәнди йиғинда сөзлимәктә.
RFA/Erkin Tarim

1-Май күни измирдики әгә университети түрк дуняси тәтқиқат мәркизи профессори алимҗан инайәт язған “вирустин кейинки дуня вә шәрқий түркистан” мавзулуқ мақалиси уйғур академийәсиниң тор бетидә елан қилинди. У мақалисидә нурғун кишиләрниң буниңдин кейинки дуняда һечбир нәрсиниң бурунқиға охшаш болмайдиғанлиқини илгири сүрүватқанлиқини, бәзи мутәхәссисләр дуня иқтисади боһранға дуч келиду дәватқан болса, йәнә бәзи кишиләрниң ишсизлиқ көпийип җәмийәттә қалаймиқанчилиқ келип чиқиду дәватқанлиқини, йәнә бәзи мутәхәссисләрниң йәршарилишиш тохтап, дуня иқтисадий системиси йеңидин қурулидиғанлиқини илгири сүрүватқанлиқини язған.

Профессор доктор алимҗан инайәт мақалисидә бирләшкән дөләтләр тәшкилати, дуня сәһийә тәшкилати вә шималий атлантик окян әһди тәшкилати қатарлиқ хәлқаралиқ тәшкилатларниң мәвҗудийити йеңидин көздин кәчүрүлидиғанлиқини илгири сүргән.

Растинила дуняда һәммә нәрсә өзгирәрму? профессор алимҗан инайәт әпәнди “бу вәзийәт шәрқий түркистан давасиға қандақ пурсәт вә имканларни елип келиши мумкин?” дегән соалға алди билән иҗабий җәһәттин җаваб берип, корона вирусидин кейинки кәлгүсидә хитай иқтисади төвәнләп, коммунистик партийәниң ағдурулуп, тәйвән билән хоңкоңниң мустәқиллиқ елан қилип, хитайниң дуняға тәһдит болмайдиғанлиқини илгири сүргән.

Профессор алимҗан инайәт әпәнди мәсилигә сәлбий җәһәттинму қарап, бәзи мутәхәссисләр ейтқандәк корона вирусидин кейин хитай зор күч болуп дуня сиясий сәһнисигә чиқип қалса яки чеграсини тақап өз ичигә бекинивалса, “шәрқий түркистан хәлқи техиму еғир күнләргә қелиши” мумкинликини илгири сүргән.

Профессор алимҗан инайәт әпәнди “вирустин кейинки дуня вә шәрқий түркистан” мавзулуқ мақалисидә нөвәттики вәзийәттин қариғанда хитай коммунистик партийәси һакимийитиниң ички вә ташқи бесимлар нәтиҗисидә гумран болуш еһтималиниң юқири икәнликини, уйғурлар дияриниң бу давалғушта мустәқиллиққа еришиш имканийити наһайити юқири икәнлик еһтималлиқини илгири сүргән.

Алимҗан инайәт әпәндиниң көз қарашлири һәққидики зияритимизни қобул қилған уйғур академийәси хитай тәтқиқат институти мудири доктор пәрһат қурбан тәңритағли әпәнди корона вирусидин кейинки вәзийәтниң уйғурлар үчүн пурсәт елип келидиғанлиқини оттуриға қойди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.