Proféssor alimjan inayet: "Wirustin kéyinki weziyet Uyghurlargha purset élip kélishi mumkin"

Ixtiyariy muxbirimiz erkin tarim
2020-05-01
Élxet
Pikir
Share
Print
Türkiye izmirdiki ege uniwérsitéti türk dunyasi tetqiqat merkizi proféssori alimjan inayet ependi yighinda sözlimekte.
Türkiye izmirdiki ege uniwérsitéti türk dunyasi tetqiqat merkizi proféssori alimjan inayet ependi yighinda sözlimekte.
RFA/Erkin Tarim

1-May küni izmirdiki ege uniwérsitéti türk dunyasi tetqiqat merkizi proféssori alimjan inayet yazghan "Wirustin kéyinki dunya we sherqiy türkistan" mawzuluq maqalisi Uyghur akadémiyesining tor bétide élan qilindi. U maqaliside nurghun kishilerning buningdin kéyinki dunyada héchbir nersining burunqigha oxshash bolmaydighanliqini ilgiri sürüwatqanliqini, bezi mutexessisler dunya iqtisadi bohran'gha duch kélidu dewatqan bolsa, yene bezi kishilerning ishsizliq köpiyip jem'iyette qalaymiqanchiliq kélip chiqidu dewatqanliqini, yene bezi mutexessislerning yersharilishish toxtap, dunya iqtisadiy sistémisi yéngidin qurulidighanliqini ilgiri sürüwatqanliqini yazghan.

Proféssor doktor alimjan inayet maqaliside birleshken döletler teshkilati, dunya sehiye teshkilati we shimaliy atlantik okyan ehdi teshkilati qatarliq xelq'araliq teshkilatlarning mewjudiyiti yéngidin közdin kechürülidighanliqini ilgiri sürgen.

Rastinila dunyada hemme nerse özgirermu? proféssor alimjan inayet ependi "Bu weziyet sherqiy türkistan dawasigha qandaq purset we imkanlarni élip kélishi mumkin?" dégen so'algha aldi bilen ijabiy jehettin jawab bérip, korona wirusidin kéyinki kelgüside xitay iqtisadi töwenlep, kommunistik partiyening aghdurulup, teywen bilen xongkongning musteqilliq élan qilip, xitayning dunyagha tehdit bolmaydighanliqini ilgiri sürgen.

Proféssor alimjan inayet ependi mesilige selbiy jehettinmu qarap, bezi mutexessisler éytqandek korona wirusidin kéyin xitay zor küch bolup dunya siyasiy sehnisige chiqip qalsa yaki chégrasini taqap öz ichige békiniwalsa, "Sherqiy türkistan xelqi téximu éghir künlerge qélishi" mumkinlikini ilgiri sürgen.

Proféssor alimjan inayet ependi "Wirustin kéyinki dunya we sherqiy türkistan" mawzuluq maqaliside nöwettiki weziyettin qarighanda xitay kommunistik partiyesi hakimiyitining ichki we tashqi bésimlar netijiside gumran bolush éhtimalining yuqiri ikenlikini, Uyghurlar diyarining bu dawalghushta musteqilliqqa érishish imkaniyiti nahayiti yuqiri ikenlik éhtimalliqini ilgiri sürgen.

Alimjan inayet ependining köz qarashliri heqqidiki ziyaritimizni qobul qilghan Uyghur akadémiyesi xitay tetqiqat instituti mudiri doktor perhat qurban tengritaghli ependi korona wirusidin kéyinki weziyetning Uyghurlar üchün purset élip kélidighanliqini otturigha qoydi.

Toluq bet