Ваң йи норвегийәдә кишилик һоқуқ органлири вә һәрсаһәниң күчлүк қаршилиқиға дуч кәлди

Ихтиярий мухбиримиз әкрәм
2020-08-27
Share
wang-yi-norwegiye-1.jpg Хитай ташқи ишлар министири ваң йиниң норвегийә зияритигә қарши наразилиқ намайиштин көрүнүш. 2020-Йили 27-авғуст, норвегийә.
RFA/Ekrem

Хитай ташқи ишлар министири ваң йиниң норвегийә зиярити һәр саһә кишилик һоқуқ тәшкилатлири вә уйғур, тибәт, хоңкоңлуқларниң ортақ қаршилиқиға дуч кәлди.

Бир һәптилик явропа зияритини башлиған хитай ташқи ишлар министири ваң йи 26-авғуст голландийәдә зиярәттә болған мәзгилдә «явропа шәрқий түркистан маарип җәмийити» йетәкчиликидики уйғурларниң қаршилиқ намайишиға учриған иди.

Бүгүн 27-авғуст ваң йи норвегийәгә қәдәм бесиштин илгирила норвегийә мәтбуатлири көпләп мақалиләр елан қилип «хитай-норвегийә иқтисадий һәмкарлиқиниң норвегийәни техиму илгирилигән һалда хитайға беқиндуруш ролини өтәйдиғанлиқи» ни илгири сүрүшкән һәмдә хитайниң уйғурлар, хоңкоңлуқлар, тибәтләргә селиватқан зулумини норвегийә һөкүмитиниң нәзәрдин сақит қилмаслиқи лазимлиқини тәкитләшкән.

«Норвегийә уйғур комитети» хадимлириниң билдүрүшичә, улар 26-авғуст күни норвегийә ташқи ишлар министирлиқиниң асия ишлири бөлүмигә хәт йезип «хитайниң җаза лагерлири вә ирқий қирғинчилиқ сиясити, уйғур аяллириға йүргүзүватқан мәҗбурий туғмаслиқ опиратсийәси, мәҗбурий әмгәк, уйғур пәрзәнтлириниң ата-анисидин айрилип хорлиниш мәсилиси, чәтәлдики уйғурларниң назарәт қилиниш мәсилиси» қатарлиқларни бу қетимқи норвегийә-хитай сөһбитидә оттуриға қоюшни тәләп қилип иҗабий җавабқа еришкән. Норвегийә ташқи ишлар министирлиқиниң асия ишлири бөлүми «бу мәсилиләр бизниң күнтәртибимиздә» дәп җаваб йоллиған.

«Норвегийә уйғур комитети» хадимлириниң тәминлигән учурлириға асасланғанда түнигүн «норвегийә уйғур комитети», «норвегийә тибәт комитети», «норвегийә хоңкоң комитети», «норвегийә тәйвән достлуқ җәмийити», «норвегийә қәләмкәшләр җәмийити», «хәлқара кәчүрүм тәшкилатиниң норвегийә шөбиси», «ситифанусалиянсән» намлиқ диний җәмийәт, «ситефен иттипақи вә һелсинки комитети» қатарлиқ 8 тәшкилат хитай ташқи ишлар министири ваң йиниң 27-авғусттики норвегийә зияритигә қарши ортақ намайиш өткүзүш тоғрисида бирликкә кәлгән вә бирләшмә чақириқ елан қилған.

Бу һәмкарлиқниң роһиға бинаән бүгүн, 27-авғуст пайтәхт ослодики норвегийә баш министирлиқ бинаси алдида уйғурлар, тибәтләр, хоңкоңлуқлар, тәйвәнликләр, хәлқара кәчүрүм тәшкилатиниң норвегийәдики тармақ оргининиң хадимлири һәмдә йәрлик һәрсаһә кишилик һоқуқ тәшкилатлириниң әзалири болуп көп санда киши бу бирләшмә намайишқа қатнашқан. Шуниң билән биргә, йәнә йәрлик кишилик һоқуқ тәшкилатлириниң һәмкарлиқида сикандинавийә меһманханиси алдида хитайға қарши ахбарат елан қилиш йиғини болуп өткән.

«Норвегийә уйғур комитети» ниң рәиси, «уйғур әдлийә архип амбири» ниң мәсули бәһтияр өмәр әпәнди нәқ мәйдандин зияритимизни қобул қилип, намайишниң әһвали тоғрисида бизни әтраплиқ мәлуматлар билән тәминлиди. Униң билдүрүшичә, бу паалийәтләрдә бир қисим парламент әзалири вә норвегийәдики нопузлуқ муһим сиясий затлар нутуқлар сөзләп хитайниң уйғурлар үстидин елип бериватқан бастуруш сияситини қаттиқ әйиблигән.

Хитай ташқи ишлар министири ваң йи бу қетимқи явропа зияритидә италийә, голландийә, норвегийә, фирансийә вә германийәдин ибарәт 5 дөләттә зиярәттә болидиған болуп, 31-авғуст берлин´ға йетип келидикән. Д у қ ваң йиниң германийә зияритигә қарши 1-сентәбир күни пайтәхт берлинда кәң көләмлик намайиш елип баридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.