Bérlinda wang yigha qarshi keng kölemlik namayish élip bérildi

Ixtiyariy muxbirimiz ekrem
2020-09-01
Share
wang-yi-myunxen-namayish-dolqun.jpg Xitay tashqi ishlar ministiri wang yigha qarshi élip barghan keng kölemlik birleshme namayishtin körünüsh. 2020-Yili 1-séntebir, bérlin, gérmaniye.
RFA/Ekrem

D u q bérlinda xitay tashqi ishlar ministiri wang yigha qarshi keng kölemlik birleshme namayish élip bardi.

Xitay tashqi ishlar ministiri wang yi italiye, gollandiye, norwégiye we firansiyediki ziyaretlirini tügitip 1-séntebir gérmaniyediki ziyaritini bashlighanidi. U bashqa döletlerde oxshimighan da'iride türlük qarshiliqlargha uchrighan'gha oxshash gérmaniyedimu küchlük qarshiliqqa duch kelgen.

D u q ning teshkillishi bilen gérmaniyening herqaysi yurtliridin kéchiche yol yürüp 1-séntebir küni seherde bérlin'gha yétip kelgen köpligen Uyghurlar gérmaniye tashqi ishlar ministirliqi binasi aldida bügün, yeni 1-séntebir küni tibetler, xongkongluqlar, teywenlikler we hersahe kishilik hoquq teshkilatlirining ezaliri, Uyghurlar we tibetlerni himaye qilghuchi yerlik ahaliler hemde bezi parlamént ezalirining qatnishishi bilen keng kölemlik birleshme namayish élip barghan.

Namayish muqeddimiside söz alghan d u q re'isi dolqun eysa ependi nutqida xitay hakimiyitining sherqiy türkistanda irqiy qirghinchiliq élip bériwatqanliqini, gérmaniye kebi démokratik döletlerning jiddiy tedbir qollinip xitayning insaniyetke qarshi bu jinayitini derhal toxtitishi lazimliqini tekitligen.

Bérlindiki namayish meydanidin ziyaritimizni qobul qilghan d u q ning re'is wekili turghunjan alawudén ependi bu namayishqa yene gérmaniyediki herqaysi partiyilerning bezi ezaliriningmu ishtirak qilghanliqini tilgha aldi. Uning bildürüshiche, bérlinda ötküzülgen bu namayish hersahe muxbirlarning küchlük diqqitini tartqan.

Namayishchilar "Xitay lagérlarni taqa! xitay qanliq qirghinchiliqni toxtat! xitay térrorist!" dégendek sho'arlarni towlap gérmaniye tashqi ishlar ministirliqi binasi aldini lerzige salghan. Myunxéndin bérip bu namayishqa qatnashqan yashlardin iliyar sidiq namayishning tolimu hayajanliq ötkenlikini eskertti.

Biz türlük uchur qanallirigha qarighinimizda, bérlindiki wang yigha qarshi namayishning bügün gérmaniye axbarat wasitiliridin keng orun élishqa bashlighanliqini körduq. D u q ning bérlindiki shöbe ishxanisining mudiri gheyur qurban ziyaritimizni qobul qilip bu qétimqi namayish toghrisida bizni etrapliq melumatlar bilen teminlidi.

Wang yining gérmaniye ziyariti bügün taratqularning qiziq nuqtisigha aylandi. Xewerlerdin melum bolushiche, xitay tashqi ishlar ministiri wang yining yawropadiki 5 dölette élip baridighan ziyaritining axirqi békiti gérmaniye idi. U bügün gérmaniye tashqi ishlar ministiri xayko mas bilen körüshetti. Xayko mas birqanche kündin buyan gérmaniyening parlamént ezaliri we gérmaniyediki kishilik hoquq organlirining bu söhbette choqum Uyghurlar we xongkong mesilisini tilgha élish bésimigha uchrap kelgenidi. Gérmaniye döletlik téléwiziye qanilining bügünki bu heqtiki xewiride bayan qilinishiche, xayko mas bolupmu Uyghurlar we jaza lagérliri toghrisida éghiz échishtin ibaret intayin qéyin bir sinaqqa duch kelgen. Emma bu söhbetning netijisi téxi melum emesken.

D u q re'isi dolqun eysa ependi ziyaritimizni qobul qilghanda, bu qétimqi namayishni uyushturushtiki meqset heqqide toxtilip ötti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.