Wenxé kiyim-kéchek fabrikisidin qachqan 4 Uyghur qiz mejburiy qayturup kélin'gen we tayaq yégen

Alaqidar xadimlarning ashkarilishiche, maralbéshidiki wenxé kiyim-kéchek fabrikisida mejburiy ishqa séliniwatqan Uyghur qizliridin 4 nepiri ötken yili roza mezgilide fabrikidin qachqan. Fabrikidiki mes'ul xadim kent kadirlirining hemkarliqida bu 4 neper qizni birqanche künning ichide fabrikigha mejburiy qayturup ekelgen. Ata-anisi lagérgha ekétilish bilen qorqutulghan bu qizlar fabrikigha qaytip kelgendin kéyinmu til we haqaretke uchrighan. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

100 Etrapida Uyghur qizining mejburiy ishqa séliniwatqanliqi ashkarilan'ghan maralbéshidiki wenxé kiyim-kéchek fabrikisi heqqide élip barghan éniqlashlirimiz dawamida, mezkur fabrikidin ötken yili roza héyt harpisida 4 neper qizning öyige qachqanliqi ashkarilandi. Melum bolushiche, bu fabrikida bir neper amanliq xadimidin bashqa “Mu'ellim” dep atalghan tursun'gül memtimin isimlik bir mes'ul xadim bolup, u, fabrikidiki ishchilarning intizami we ish ünümini nazaret qilidiken. Déyilishiche, urush we tillash, bu xadimning ishchilarni bashqurushtiki asasliq bir métodi bolup qalghan. Mezkur fabrikigha ishchi toplash we yollashta wezipe ötigen bir kent mes'ulining bayan qilishiche, fabrikidin qachqan 4 neper qiz, yekenning charibagh yézisidin bolup, ular tursun'gül memtiminning derhal heriketke kélishi we charibaghdiki kent mes'ullirining hemkarlishishi bilen öyliridin fabrikigha mejburiy qayturup kélin'gen. Déyilishiche, tursun'gül memtimin we kent mes'ulliri fabrikidin qachqan qizlargha, eger fabrikigha derhal qaytip barmisa ata-anisining “Terbiyelesh” ke élip kétilidighanliqini bildürüp qorqutqan. Ular fabrikigha qaytip barghandin kéyin, yene til haqaretke uchrighan.

Mezkur xadimning yene bayan qilishiche, yéqinda fabrikidiki bir ishchi harghinliqtin hoshidin ketken ehwaldila doxturxanigha élip bérilghan. U doxturxanida birqanche kün dawalan'ghandin kéyin, toluq saqiyish üchün öyige qaytmaqchi bolghinida, mes'ul xadim tursun'gül memtimin téléfonda tehdit sélip, uni doxturxanidin udul fabrikigha qayturup ekelgen. Téléfonimizni qobul qilghan, mezkur fabrikining amanliq xadimi, bu fabrikida 14 neper ishchining ilgiri‏-kéyin bolup fabrikidin qéchishqa urunup baqqanliqini ashkarilidi. U bu jeryanda ötken yili roza héytta yüz bergen 4 neper qizning qéchish weqesinimu delillidi. Uning déyishiche, bu 4 neper qiz qayturup kélin'gendin kéyin, bir mertem éghir “Tenqid-terbiye” din ötküzülgen. Bundaq éghir “Terbiye” ning dawamliq bolup turidighanliqini eskertken bu xadim, yéqindin buyan ishchilarning öz teqdirige ten bergenliki we “Qachmaydighan” bolghanliqini tilgha aldi.