Adalet sabit: “Qizim erden'ay ‛xanqiz taji‚ kiyelmigen bolsimu, emma Uyghur balilirining awazi boldi”

Amérikaning filorida shtati orlando shehiride ötküzülgen 2023-yilliq “Xelq'araliq ösmür xanqiz” we “Amérika döletlik xanqiz” tajini talishish musabiqisige qatnashqan Uyghur ösmür erden'ay. 2023-Yili 27-noyabir.

Ötken bir hepte amérikaning filorida shtati orlando shehiride ötküzülgen 2023-yilliq “Xelq'araliq ösmür xanqiz” we “Amérika döletlik xanqiz” tajini talishish musabiqisi 27-noyabir küni axirlashti. Mezkur musabiqining ösmürler we balilar guruppisining hel qilghuch musabiqisige amérikada tughulghan, shundaqla xitayning pasport cheklimisi tüpeyli tughulghandin buyan dadisini körüp baqmighan 6 yashliq erden'ay “Uyghur xanqiz” belgisini taqighan halda wirjiniye shtatining aléksandiriye shehiridin tallan'ghan xanqiz süpiti bilen “Xelq'araliq ösmür xanqiz” we “Amérika döletlik xanqiz” tajini talishish musabiqisige qatnashti. 6 Yashliq Uyghur qizi erden'ay bu musabiqe jeryanida qeyserlik bilen özining jasaritini namayan qildi.

Erden'ay Uyghur axirqi 12 nadir namzat tizimlikidin orun aldi

Erden'ay bir hepte dawam qilghan musabiqe jeryanida etles köynek, chimen doppa kiyip, tatliq külümsirep sehnige chiqqinida, uning özgiche turqi tamashabinlarni heyran qaldurghan bolsa؛ uning “Méning arzuyum dadamni a'ilimiz bilen jem qilish üchün küresh qilish” dégen qeyserane sözliri bahalighuchilarni yighlatqan idi.

RFA/Gülchéhre

25-Noyabir küni 2023-yilliq “Xelq'araliq xanqiz” we “Amérika döletlik xanqiz” musabiqisining axirqi hel qilghuch basquchigha tallan'ghan 12 neper nadir kandidatning ismi élan qilindi. Kishilerni hayajan'gha salidighan bu deqiqilerde “Erden'ay Uyghur” dégen bu söyümlük isimmu 12 neper nadir kandidatning arisidin yer alghan idi. Erden'ay güzel we merdane qiyapette sehnige yene bir qétim chiqip, “Men Uyghur melike erden'ay” déginide minglighan tamashibinlarning güldüras alqish sadalirighila emes, belki neq meydanni körüwatqan Uyghurlarningmu qelbini lerzige saldi. Halbuki, 9 neper bahalighuchining omumiy awaz sani we tordiki bélet tashlash netijilirini birleshtürüp chiqarghan axirqi bahalishida, balilar guruppisi boyiche 2023-yilliq “Xelq'araliq xanqiz” taji büyük béritaniyedin kelgen bir “Xanqiz” gha kiydürüldi. Qalghan 11 neper nadir kandidat ichide erden'ay eng kichiki sanilatti.

Uyghur qizi erden'ay gerche axirqi hel qilghuch basquchta “Xelq'araliq xanqiz” bolup tallinalmighan bolsimu, emma u közliridiki lighirlap qalghan yashlirini teslikte yoshurup, pestiki tamashabinlar arisida özige telmürüp qarap turghan apisigha külümsirep qaridi. Andin bash barmiqini chiqirip béshini yénik lingshitti. Uning balilargha xas sadda we omaq qarashlirida apisigha teselli bérish tuyghulirimu eks etken idi.

RFA/Gülchéhre

Adalet xanim: “Qizim Uyghur balilirining awazi boldi”

Adalet sabit xanim bilen qizi erden'ay musabiqe ayaghlashqanda bir birini ching quchaqliship, bir-birining közidiki yashlirini sürtüshti. Adalet xanim qizining mengzige méhri bilen söyüp “Siz méning eng qeyser melikem! men, dadingiz we pütkül Uyghurlar sizdin pexirlinimiz!” dédi.

Adalet xanim ziyaritimizni qobul qilip, qizi erden'ay gerche bu yilliq “Amérika döletlik xanqiz” we “Xelq'araliq xanqiz” musabiqisining axirqi basquchida chémpiyonluq tajini kiyelmigen bolsimu, emma axirqi 12 nadir namzatning biri bolup tallan'ghanliqidin xushal bolghanliqini eskertip ötti. U, bu yil séntebirdin bashlan'ghan barliq musabiqiler jeryanida qizi bilen teng iradisini chéniqturghanliqini, qizining pütün Uyghur balilirining, shundaqla pütün Uyghurlarning awazi bolalighanliqidin cheksiz pexirlen'genlikini tilgha aldi.

Erden'ay, xelq'araliq bu türdiki musabiqige qatnashqan tunji Uyghur qizi bolup qaldi. Tekitleshke tégishliki shuki, u “Uyghur melike” dégen léntini ésip turup bu musabiqilerge qatnashti. U her qétim sehnige chiqqinida, sehnining ékranida latinche yézilghan UYGHUR dégen chong xetler julalinip turdi.

Igilishimizche, erden'ay apisi adalet xanim bilen bille amérika paytexti washin'gtonda ötküzülgen namayishlarghimu aktipliq bilen qatniship kelgen idi. Adalet xanim qizi erden'ayning bir qolida qonchiqini, yene bir qolida dadisining süritini tutup chong bolghanliqini؛ bu jeryanda qizining yéshi téxi kichik bolushigha qarimay Uyghurlar pütkül millet gewdisi bilen duch kéliwatqan bésimlar ichide teng tawlan'ghanliqini؛ buni ana-bala ikkiylenning yoldishini xitay tutqunidin qutquzush yolidiki yene bir netijilik qedem dep bilidighanliqini tekitlep ötti.

Adalet xanim: “Qizim musabiqige yene qatnishidu!”

Amérikada her yili barliq shitatlardin texminen 30 mingdek mahir yilliq xanqiz tallash musabiqilirige qatnishidighan bolup, musabiqe tertipi intayin qattiq tallash we qatmu-qat tallinishlardin ötidu. Andin kéyin axirqi hel qilghuch musabiqe basquchigha peqetla 2000 mahir kireleydu.

Hel qilghuch musabiqining eng axirqi basquchighiche qeyserlik bilen riqabetlerge qatnashqan erden'ay, ösmür xanqizlarning talant türide üchinchilikni qolgha keltürdi, shundaqla 12 neper eng nadir kandidatning biri boldi. U yene bahalighuchilarning her biri bilen ayrim-ayrim söhbetleshkende, bahalighuchilar teripidinmu oxshimighan sherep médallirigha érishti. “Chimen doppa” liq erden'ay öz talanti bilen Uyghur namini we Uyghurlarning weziyitini nurghun kishilerge anglitishqa muyesser bolalidi.

Adalet xanim, bu qizi erden'ayning tunji nöwet bundaq bir xelq'araliq xanqiz tallash musabiqisige qatnishishi ikenlikini, buni peqetla tejribe toplash jeryani dep qaraydighanliqini bildürdi. U axirida mundaq dédi: “Qizim erden'ay téxi kichik, aldimizda pursetler köp. U özini yenimu kücheytip, kelgüside “Xanqiz taji‚ni talishish musabiqilirige dawamliq qatnishidu!”