78 яшлиқ хәлчәм пазилниң 17 йиллиқ кесилгәнлики вә санҗи аяллар түрмисидә җаза муддитини өтәватқанлиқи дәлилләнди

Мухбиримиз шөһрәт һошур
2022.01.24
78 яшлиқ хәлчәм пазилниң 17 йиллиқ кесилгәнлики вә санҗи аяллар түрмисидә җаза муддитини өтәватқанлиқи дәлилләнди “топлишип җәмийәт тәртипини бузуш” вә “миллий кәмситишкә қутратқулуқ қилиш” билән әйиблинип 17 йиллиқ кесилгән вә санҗи аяллар түрмисиниң 4-әтритидә җаза муддитини өтәватқан 78 яшлиқ хәлчәм пазил.
Oqurmen teminligen

Корладики бир аилидин 5 аял кишигә еғир җаза кесилгән һөкүмнамидә хәлчәм пазилниң кесиветилгәнлики қәйт қилинған болсиму, әмма җаза муддити тилға елинмиған вә униң қәйәрдә җаза муддитини өтәватқанлиқи мәлум әмәс иди. Мухбиримизниң корладики алақидар органлар вә санҗи аяллар түрмисигә қарита елип барған телефон зиярәтлири давамида, униң “җамаәт тәртипини қалаймиқан қилиш” җинайити билән әйиблинип, 17 йиллиқ кесиветилгәнлики вә санҗи аяллар түрмисиниң 4‏-әтритидә җаза муддитини өтәватқанлиқи дәлилләнди.

Корла шәһәрлик хәлқ сот мәһкимисиниң корладики бир аилидики 5 аял үстидин еғир җаза кәскән һөкүмнамисидә, 1944-йили туғулған 78 яшлиқ хәлчәм пазил исимлик аялму мәһкумлар қатаридин орун алған. Һөкүмнамидә дейилишичә, хәлчәм пазил “миллий кәмситишкә қутратқулуқ қилиш” вә “топлишип җамаәт тәртипини бузуш” җинайити билән әйибләнгән. Униң аталмиш “қанунсиз бир тәблиғ” қә қетилғанлиқи вә бу “тәблиғқә сорун һазирлап бәргән” лики, униң юқириқи аталмиш “җинайити” гә пакит қилинған. Һөкүмнамидә хәлчәм пазилниң башланғуч мәдәнийәт сәвәйисигә игә икәнлики, корла шәһәр ичидики чиланбағ коча башқармисида олтурушлуқ икәнлики, униң мәзкур аталмиш “җинайәт” ни корла кона базардики қериндашлар меһманханисиниң 2-қәвәттики өйидә садир қилғанлиқи қәйт қилинған.

Биз бу учурларға асасән, корлаға телефон қилдуқ. Алақидар хадимлар хәлчәм пазилниң ениқ кимлики вә адриси һәққидә мәлумат бәргән болсиму, әмма униң ақивити һәққидә учур берәлмиди.

Һөкүмнамидә “қанунсиз тәблиғ сөзлигүчи” дәп исми тилға елинған вә чәт әлгә чиқип кәткәнлики билдүрүлгән, нөвәттә түркийәдә яшаватқан хәлчигүл мәмәт ханимниң билдүришичә, хәлчәм пазил 7 пәрзәнтини яхши тәрбийәләп җәмийәткә қатқан, 10 йилниң алдида йолдиши түгәп кәткән вә шуниңдин кейин асасән нәврилирини тәрбийәләш билән күн кәчүриватқан бир ханим икән.

Хәлчигүл мәмәт ханим йәнә мәһкум хәлчәм пазилда сиясий ишларға қизиқидиған вә көңүл бөлидиған бир аламәтләрнимиму байқимиғанлиқини оттуриға қойди.

Әҗәплинәрлики шуки, һөкүмнамидә башқа мәһкумларниң җаза муддитиниң қачан башлинип қачан түгәйдиғанлиқи вә йил муддити ениқ баян қилинған болсиму, әмма хәлчәм пазил һәққидә “униң җаза муддити һөкүм иҗра қилинған күндин башлап һесаплиниду” дейилгән, йәни җаза муддити ениқ баян қилинмиған. Биз алдинқи күни ениқлиған бу аилидики бәш мәһкумдин иккисиниң җаза муддитини өтәватқанлиқини дәлилилләнгән санҗи аяллар түрмисигә қайта телефон қилип, хәлчәм пазилниң әһвали һәққидиму мәлумат соридуқ.

Алақидар түрмә хадимлиридин бири, биз тәминлигән кимлик номуриға асасән хәлчәм пазилниң мәзкур түрмидики 4‏-әтрәттә җаза муддитини өтәватқанлиқини ашкарилиди. У йәнә хәлчәм пазилниң бу йил 78 яш икәнликини билдүрүш билән бирликтә, униң 17 йиллиқ кесилгәнликиниму дәлиллиди.

Түркийәдики корлалиқ муһаҗир, йәни мәзкур делода “қачқун җинайәтчи” сүпитидә тилға елинған хәлчигүл ханимниң баян қилишичә, хәлчәм пазил 2015 яки 2016-йиллири түркийәгә кәлгән вә мәккидә һәҗ қилип қайтқан икән.

Корла шәһәрлик сот мәһкимисиниң һөкүмидә, униң “тәблиғқа қатнашқанлиқи” вә “сорун һазирлап бәргәнлики” аталмиш “җинайи пакит” қатарида тилға елинған болсиму, әмма һөкүмнанидә униң түркийә зиярити вә һәҗ сәпири тилға елинмиған. Илгирики ениқлашлиримиздин мәлум болушичә, көп санда кишиләр пәқәт чәт әл зиярити вә һәҗ сәпири үчүнла кесилип кәткән. Шуңа 78 яшлиқ хәлчәм пазилниң 17 йиллиқ кесилишидә, униң чәт әл сәпириниң тәсири бар-йоқлуқи һазирчә мәлум әмәс.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.