Америка 11 ‏ - сентәбирдә қурбан болғанларни әслиди

 2001 ‏ - Йили 9 ‏ - айниң 11 ‏ - күни, террорчилар америкиниң йолучилар айрупиланини булап, нюйорктики дуня сода мәркизиниң бир җуп бинасиға, америка дөләт мудапиә министирлиқиниң вашингтондики бәш бурҗәклик бинасиға һуҗум қилғандин сирт, йәнә бир йолучилар айрупиланини пенсилванийә шитатиға тәвә орманда партлитивәткән иди.

Америкиниң икки чоң партийә президент намзатлиридин обама билән микейин, дуня сода мәркизи мәйданида һуҗумда вапат болғанларға атап гүлчәмбирәк қойди вә һәр икки президент намзати, қурбан болғанларға матәм тутуш йүзисидин сайлам еланлирини вақтинчә тохтитишни қарар қилди.

Америка президенти җорҗ буш, вашингтондики бәш бурҗәклик бина алдиға турғузулған хатирә абидисиниң юпуқини ачти. Бу бинаға қарита елип берилған һуҗум 180 адәмниң өлүмигә йол ачқан иди.

Дуня сода мәркизидә 11 ‏ - сентәбир үчүн турғузулмақчи болған йеңи қурулушлар иқтисадий сәвәбләр түпәйли техи тәлтөкүс пүтүп чиқмиди.

Дуня сода мәркизигә қилинған террорлуқ һуҗумида, гөһәр исимлик бир уйғур қиз һаятидин айрилған болуп, униң америкиниң вирҗинийә шитатида яшаватқан ата ‏ - аниси вә қериндашлири һелиму гөһәрни худди қайтип келидиғандәк бир үмид билән сеғинмақта.