Prézidént bush amérika qisimlirigha pakistandiki taliban we el - qa'ide nishanlirigha hujum qilish buyruqi bergen

 Amérika emeldarliri aldinqi küni "nyuyork waqti géziti"ge söhbet élan qilip, prézidént bushning bu yil 7 ‏ - ayda bir mexpiy buyruqqa imza qoyup, amérika herbiy qisimlirigha pakistandiki térrorchi nishanlargha pakistan da'irilirining ruxsitini almay turup hujum qilish buyruqi chüshürgenlikini bildürgen.

Bu xewer pakistan parlaménti we herbiy da'iriliride alaqzadichilik yaratqan idi. Bushning buyruqi afghanistan we amérika emeldarlirining pakistan herbiy we axbarat organlirini talibanlarning afghanistanda hujum qilish heriketlirini élip bérishigha yardem qilish bilen eyibligen mezgilge toghra kelgen.

Xewerlerge qarighanda amérika armiyisi jüme küni shimaliy waziristanning miranshah dégen rayonidiki talibanlarning bazisigha bashqurulidighan bomba atqan bolup, hujumda az dégende 14 ademning ölgenliki ilgiri sürülmekte.

Bu weqe ilgiri musherrepni qollighan pakistan musulmanlar ittipaqiN - we pakistan herbiy da'irilirining derhal eyiblishige uchrighan. Pakistan musulmanlar ittipaqi N - ning rehbiri nisar eli xan jüme küni bayanat élan qilip, gherb döletliridin aldi bilen "pakistanning dost yaki düshmen ikenlikini ayrish"ni telep qilghan. Pakistan qoralliq qisimlirining bash qomandani kéyani bolsa jüme küni pakistan bixeterlik organlirining pakistan " térritoriyisining zémin pütünlükini qoghdaydighanliqi"ni jakarlidi.