Америка ташқи ишлар министирлиги кишилик һоқуқ доклати елан қилди

2007-04-26
Елхәт
Пикир
Share
Принт

Америка ташқи ишлар министирлиқи йиллиқи кишилик һоқуқ доклатида, хитайдики уйғур мусулманларниң, сиясий, диний, мәдәний һоқуқлириниң изчил һалда еғир дәпсәндичиликкә учраватқанлиқиға қарита чоңқур көңүл болидиғанлиқини ипадилиди.

Мәзкур доклатта, хитайниң уйғур елидики һөкүмити сиясий паалийәтләргә қатнашқанлики кишиләрни қолға елип кәлгәнлики вә уларни дөләт һакимийитигә тәһдит салди, қанунсиз диний паалийәтләргә қатнашти дәп қарап һәрхил җазаларға һөкүм қилғанлиқи қәйт қилинған.

Диний әркинлик һәққидә, уйғур елидики һәрқандақ бир мәсчитниң хитай дини ишлар җәмийити тәрипидин әнгә елиниши керәклики, имамларниң кинишкисиз имамәтчилик қилишиға йол қоюлмайдиғанлиқи, уларниң имамлиқ қилишни башлаштин илгири һөкүмәт орунлаштурған вәтәнпәрвәрлик тәрбийисигә қатнишиши керәклики көрситилгән.

Доклатта ениқ қилип, хитайниң уйғур елидики һакимийити даим өз алдиға тинч йосунда диний паалийәтләргә қатнашқан һәрқандақ бир шәхсни "уч хил куч"( уч хил бидәт) йәни- террорчилиқ, бөлгүнчилик, әсәбийчилик,җинайәтлири билән әйибләйдиғанлиқи оттуриға қоюлған.

Униңдин башқа, уйғур елидә уйғур инсан һәқлирини тәрғип қилидиған паалийәтчиләрниң һәм уларниң аилә тавабиатлириниң қаттиқ җазаға тартилип кәлгәнлики, йеқинда абликим абдуреһимниң " бөлгүнчилик һәрикәтлиригә қатнишиш вә қутратқулуқ қилиш" җинайәтлири билән әйиблинип 9 йиллиқ қамақ җазасиға һөкүм қилинғанлиқи, абликим абдуреһимниң, дуня уйғур қурултийи рәиси рабийә қадир ханимниң оғли икәнлики, рабийә қадир ханимниң башқа икки оғлиниңму "бағ оғрилаш" җинайити билән қариланғанлиқи, уларниң ичидә бирсиниң 7 йиллиқ қамаққа һөкүм қилинғанлиқи көрситилгән.

Доклатта йәнә, рабийә қадир ханимниң оғуллириға берилгән җазаниң рабийә қадир ханимниң америкидики сиясий паалийити билән зич мунасивәтлик икәнлики, америка һөкүмитиниң абликим абдуреһимниң қамаққа елиниши вә һөсәйин җелилниң қамақ җазасиға һөкүм қилинишиға қарита йеқиндин көңүл болидиғанлиқи ипадиләнгән. (Җүмә)

Пикирләр (0)
Share
Толуқ бәт