Германийә йешиллар партийисиниң баварийә мәсули мюнхендики хитай консули үстидин сот мәһкимисигә әрз қилмақчи


2006.11.28
Share on WhatsApp
Share on WhatsApp

Германийә йешиллар партийиси баварийә комитетиниң мәсули маргарита ханим хитайниң мюнхендики яң пәмилилик баш консулини җасуслуқ қилиш билән әйибләп, униң үстидин сот мәһкимисигә әрз қилидиғанлиқини җакарлиди.

Дуня уйғур қурултийи рәһбәрлириниң ашкарилишичә, бу вәқә яң фамилилик хитай баш консулниң дуня уйғур қурултийи маргаритаға әвәткән йиғин тәклипнамисини қанунсиз йоллар билән қолға чүшүргәнлики билән мунасивәтлик болуп, йешиллар партийиси баварийә комитетиниң мәсули хитайниң германийидә җасуслуқ қилиш һоқуқи йоқлуқини билдүргән.

Германийиниң мюнхен шәһиридә 27 - ноябир күни ахирлашқан дуня уйғур қурултийиниң 2 - нөвәтлик йиғини ечилиштин бурун, хитай консули яң маргаританиң ишханисини зиярәт қилип, униң дуня уйғур қурултийи йиғиниға тәклип қилинғанлиқи вә рабийә қадир ханим билән көришидиғанлиқидин хәвәрдар икәнлики вә өзлиридә униңға әвәтилгән факсниң бир нусхиси барлиқини билдүргән.

Дуня уйғур қурултийидики затларниң әскәртишичә, маргарита ханим баш консул яңдин бу тәклипнамини қәйәрдин алғанлиқини сориғанда у, "бизниң өз адәмлиримиз бар" дәп җаваб бәргән. Маргарита ханим бу вәқәни дуня уйғур қурултийи рәиси рабийә қадир ханимға мюнхенда көрүшкәндә сөзләп берип, хитай баш консулиниң һәрикитини "җасуслуқ қилмиш" дәп әйиблигән.

Германийә ахбаратлирида ашкариланған бу вәқә, көзәткүчиләрдә хитай консулханисини маргаритаға әвәтилгән тәклипнамә билән тәминлигән, хитай баш консули яңниң "өз адәмлири ким?" дегән соални туғдурмақта. (Меһрибан)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.