Rusiye, urush toxtitish kélishimige asasen port shehiri puti etrapidiki herbiy qisimlirini chékindürgen

 Groziye hökümiti, rusiyining bu herikitini teqdirlidi hemde rusiye hökümitining ikki dölet otturisidiki imzalan'ghan urush toxtitish kélishimining ikkinchi basquchighimu emel qilip, bergen wedisige asasen 10 öktebir künigiche, groziyining abxaziye we jenubiy ossétiye rayoni sirtidiki groziye térritoriyisidin herbiy qisimlirini pütünley chékindürüp chiqidighanliqi ümid qilidighanliqini bildürdi.

Bu arida roéytérs agéntliqining xewer qilishiche, rusiyining gruziye bilen imzalan'ghan urush toxtitish kélishimige toluq ri'aye qilidighanliqigha ishinidighanliqini tekitligen yawrupa ittipaqining tashqi ishlardin mes'ul aliy xadimi xawer solana, ikki terepning urush toxtitish kélishimige emel qilip - qilmighanliqini küzütish üchün, öktebir étidin burun gruziyige 200 kishilik bir yawrupa ittipaqi küzetküchi etritining orunlashturulidighanliqini eskertken.

Ötken ay, groziyining jenubiy ossétiye rayonining kontrolluqini qaytidin qolgha keltürüsh üchün bashlatqan herbiy herikitige qarshi, gruziyige qarita keng kölemlik bir herbiy heriket bashlatqan rusiye, groziyining nurghun rayonlirini ishghal qilghan idi.
 
Lékin bu herbiy herikiti netijiside xelq'ara jama'et bolupmu gherb döletlirining qattiq eyiblishige uchrighan rusiye, ötken düshenbe yeni 8‏ - séntebir küni abxaziye we jenubiy ossétiye sirtidiki groziye térritoriyisidin herbiy qisimlirini pütünley chékindürüshni qobul qilghan idi.