Хитай сақчи даирилири 6 уйғурни етип өлтүргән

 Шинхуа хәвәр агентлиқи вә хитай хәвәрлири агентлиқиниң билдүрүшичә бу җүмә куни, йәрлик сақчилар қәшқәр вилайити тәвәсидә бастуруш һәркити елип барған болуп бу һәрикәтниң әсли мәқсити мушу айниң 12 - куни қәшқәрдә өлтүрүлгән 3 нәпәр бихәтәрлик хадиминиң делосиға четишлиқ дәп гуман қилинған бир гуруппа бөлгүнчиләрни қолға чүшүрүш икән.

Шинхуа хәвәр агентлиқиниң билдүргинигә қариғанда сақчилар бир қонақлиқ етизлиқида пичақ билән қоралланған бу 9 нәпәр киши билән учрушуп қалған болуп бу кишиләр сақчиларниң "тәслим бол" дегән агаһландурушиға қаршилиқ көрсәткән вә икки нәпәр сақчини яриландурған икән.

Сақчилар буниңға қорал билән җавап бәргән нәтиҗидә 6 нәпәр уйғур гумандар дәп қарилип нәқ мәйданда етип өлтүрүлгән вә 3 нәпири яриландурулған.

Франсийә ахбарат агентлиқиниң билдүрүшичә откән бир айдин буян шинҗаңда уйғурлар билән хитай һөкүмити арисида көп қетим тоқунушлар йүз бәргән болуп 8 - айниң 4 - күни қәшқәрдә йүз бәргән қанлиқ вәқәдә 16 нәпәр хитай сақчиси өлтүрүлгән.

Қәшқәрдә йүз бәргән вәқәдин 6 кун кийин, кучада бир нәпәр бихәтәрлик хадиминиң өлтүрүлүш һадисиси мәйданға кәлгән.
 
8 - Айниң 12 - күни қәшқәрниң яманяр йезисидики тәкшүрүш понкитида мәзкүр понкитта ишләйдиған 3 нәпәр бихәтәрлик хадими пичақ билән өлтүрүлгән вә бир нәпири еғир дәриҗидә яридар болған.

Бу чаршәнбә куни болса қәшқәрдә қонақлиқта гуманлиқ кишиләрни издәватқан икки нәпәр сақчи кимлики намәлум кишиләр тәрипидин өлтүрүлди.

Чәтәллик мутәхәсисләрнң тәһлил қилишичә йеқиндила ахирлашқан хәлқара олимпик йиғининиң алди кәйнидә уйғур мустәқилчилири өзлириниң мустәқиллиқ давасини дуняға тонуштуривелиш үчүн паалийәтлириниң қәдимини техиму тизләткән икән.

Мәзкур агентлиқниң билдургинигә қариғанда шинҗаңдики мусулман уйғурлар он нәччә йиллардин бири давамлишиватқан хитай һөкүмитиниң еғир зулмида қийналмақта икән.