Қазақистан уйғурлири йил ахирида хәйрихаһлиқ һәрикәтлирини тохтатмиди

Қазақистан уйғурлириниң һәр йили хәйрихаһлиқ ишлирини йүргүзүп, көп балилиқ аилиләргә, йитим-йесирларға, мәҗруһ балиларға, тәбиий апәттин зәрдап чәккәнләргә вә башқиларға маддий ярдәм көрситиватқанлиқи мәлум. Бу йил пүткүл дуняға тарқиған корона вируси вабаси мунасивити билән пәйда болуватқан қийинчилиқларға қаримай, қазақистанниң һәр шәһәр вә йезилирида яшаватқан уйғур җамаәтчилики хәйр-сахавәт ишлирини йәниму давам қилип кәлгәниди. Вабаниң йәнә күчийиши сәвәбидин қазақистан һөкүмитиниң әлдә көрүватқан бихәтәрлик чарилирини қәтий сақлиған һалда йил ахиридиму хәйрихаһлиқ һәрикәтлири тохтимиған.

Радийомиз зияритини қобул қилған җумһурийәтлик уйғур етно-мәдәнийәт мәркизи йенидики “җанан” җәмийәтлик фондиниң мудири мизәнгүл авамисимова ханим хәйрихаһлиқ ишлирини елип беришта қазақистандики башқиму уйғур җәмийәтлик бирләшмилири қатарида “җанан” фондиниңму актип паалийәт йүргүзватқанлиқини оттуриға қоюп, мундақ деди: “2020-йил қийинчилиқларға қаримай ‛җанан‚ фонди үчүн наһайити яхши ишлар, тәшәббуслар билән өтти, дәп ойлаймән. ‛җанан‚ фонди бу йили хәйрихаһлиқ ишларниң бешида турди. У болсиму, қазақистанда ағриққа дучар болған балиларға ярдәм бәрдуқ. 50 Балиға озуқ-түлүк севити қилдуқ. Униңдин башқа турмуши начар аилиләргә өзимизниң ярдимини көрсәттуқ. Шуниң билән биллә низамнамимизгә бағлиқ һәр йили бир мәктәпкә ярдәм қилимиз. Бу йили биз чулуқай мәктипигә үстәл вә орундуқларни елип бәрдуқ. Турмуши начар 50 кә йеқин адәмгә ‛уйғур авази‚ гезитини йезип бәрдуқ.”

Бу йилниң ахирида уйғурлар зич олтурақлашқан алмута шәһириниң нәврузбай наһийәсиниң уйғур мәдәнийәт мәркизи тәрипидинму хәйр-сахавәт ишлири елип берилған иди. Игилинишичә, мәзкур наһийә җамаәтчилики арисида болупму “р-визийон” ширкитиниң президенти ринат османоф әйни вақитларда алмута шәһиридә “достлуқ” тәнһәрикәт мәктипини селип, балиларниң һәқсиз мәшқләндүрүш, әһвали начар аилиләрниң балилирини тән-һәрикәт кийимлири билән тәминләш вә башқиму көплигән хәйр-сахавәт ишлирини елип барғанкән. 22-Декабир күни у талдиқорған шәһиридики аңлаш вә сөзләш қабилийити төвән, еғир кесәлгә муптилла болған 120 балиға йеңи йиллиқ арча мурасимини уюштуруп бәргәникән.

Алмута вилайитиниң уйғур наһийәлик уйғур мәдәнийәт мәркизиниңму бу йили бир қатар хәйрихаһлиқ ишларни әмәлгә ашурғанлиқи мәлум. Корона вируси вабасиниң тарқилиши сәвәбидин мәмликәттә елан қилиған пәвқуладдә һаләт вә карантин тәртипи мунасивити билән мәзкур мәркәз тәрипидин бу йөнилиштә көплигән ишлар қилинғанкән.

Радийомиз зияритини қобул қилған уйғур наһийәлик уйғур мәдәнийәт мәркизиниң катипи гүлминәм тохтайева ханим мундақ деди: “өктәбир ейидин башлап бу мәркәзгә рәхмәтҗан судҗакоф рәһбәр болуп тәйинлинип, мәркәз ишлирини техиму җанландурувәтти. Аз вақит ичидә у орунбасарлири билән наһийәмиздики ғалҗат, кәтмән, ақтам, түгмән қатарлиқ барлиқ йезиларни арилап, яшлиримизни билимлик вә ярамлиқ инсанлардин етип тәрбийиләшкә чақирди. Һазирқи вәзийәткә бағлиқ турмуши начар аилә балилириға вә тән-саламәтлики начар балиларға 250 данә йеңи йиллиқ соға тарқатти.”

Игилишимизчә, мундақ хәйр-сахавәт ишлири алмута вилайитиниң талғир наһийисигә қарашлиқ қайрат йезисидиму елип берилған. Җумһурийәтлик уйғур етно-мәдәнийәт мәркизи йенидики нураний анилар кеңишиниң рәиси гүлҗаһан муратова турмуши начар 10 аилиниң балилириға йеңи йиллиқ соғилирини тапшурғанкән. Гүлҗаһан муратова көп балилиқ аилиләрни турушлуқ өй билән тәминләш ишлириниму давамлиқ елип бериватқан уйғур сахавәтчилириниң бирикән.