Birleshken döletler teshkilatida “Shinjangdiki kishilik hoquq böhrani” témisida muhakime yighini échildi

Muxbirimiz eziz
2019.09.24
xinjiang-crisis-un Birleshken döletler teshkilatida “Shinjangdiki kishilik hoquq böhrani” témisida muhakime yighini échildi
RFA

Xitay hökümiti Uyghurlar diyarida ijra qiliwatqan zor kölemlik tutqun we lagérlarning barghanséri kéngeytilishi, bu jeryanda alliqachan bir milyondin üch milyon'ghiche Uyghur qatarliqlarning  “Qayta terbiyelesh merkizi” namidiki lagérlargha qamilishi yéqindin buyan barghanséri xelq'ara axbarat sahesidiki muhim témilardin bolup kelmekte. Bu ehwalning eng yéngi tereqqiyatigha qarap chiqish, shuningdek dunya jama'itini Uyghurlar duch kéliwatqan ijtima'iy paji'eler boyiche xitayni eyibleshke chaqirish hemde xitay hökümitining Uyghurlargha qarshi yürgüzüwatqan “Insaniyetke qarshi jinayetliri” ni eyibleshni meqset qilghan bir qétimliq muhakime yighini 24-séntebir küni birleshken döletler teshkilati (b d t) ning nyu- yorktiki bash shitabida ötküzüldi.

Amérika tashqi ishlar ministirliqi qarmiqidiki “Démokratiye, kishilik hoquq we emgek idarisi” ning sahibxanliqidiki bu muhakime yighini b d t ning 74-qétimliq omumiy yighinida dunyaning rehberliri bir sorun'gha jem bolup, kilimat mesilisini muzakire qiliwatqan bir peytte échildi. Yighin'gha amérikaning xelq'ara diniy étiqad erkinliki bash elchisi sam brownbek ependi riyasetchilik qildi.

Yighinda amérika tashqi ishlar ministirliqining mu'awin minsitri jon sulliwan alahide nutuq sözlep Uyghurlar mesilisining hazir tolimu nazuk bir teqdirge duch kéliwatqanliqini körsitip ötti. Shu qatarda b d t bash katipining alahide meslihetchisi karén simis xanim, Uyghur tibbiy penler  doktori rishat abbas, Uyghur kishilik hoquq qurulushi teshkilati idare hey'itining re'isi nuri türkel qatarliqlarmu Uyghurlar uchrawatqan türlük paji'eler heqqide yighin ehlige emeliy we méghizliq melumatlar berdi.

Bolupmu xitay hökümitining Uyghurlar diyarida köplep quruwatqan lagérlarning  shahitliridin zumret dawutning özi lagérda bashtin kechürgen qebihlikler heqqide yighin ehlige bergen guwahliqi Uyghur jemiyiti duch kéliwatqan siyasiy böhranning qanchilik texirsiz we jiddiy ikenlikini janliq süretlep berdi.   Yighinda yene Uyghurlargha a'it soralghan so'allargha jawab bérildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.