Xitayning 26 paxta shirkiti Uyghur mejburiy emgiki bilen eyiblinip qara tizimlikke élindi

Washin'gtondin muxbirimiz irade teyyarlidi
2024.05.17
dehqan-ishlemchi-paxta-kewez Déhqan ishlemchiler étizdin paxta yighiwatidu.2006-Yili 10-öktebir, korla
AFP

16-May küni amérika hökümiti Uyghur mejburiy emgiki bilen ishlepchiqirilghan mehsulatlarning amérika bazirigha kirishining aldini élish üchün, xitayning paxta tijariti bilen shughullinidighan 26 shirkiti we ambirini qara tizimlikke kirgüzüp, ulardin paxta import qilishni chekligen.

Amérika ana weten xewpsizliki ministirliqining bayanatida körsitilishiche, tizimliktiki paxta shirketlirining köpinchisi Uyghur élining sirtida bolsimu, biraq ular paxtini Uyghur élidin kirgüzidiken.

Ana weten xewpsizlik ministiri aléxandro mayorkas bayanatta yer alghan sözide mundaq dégen: “Biz toqumichiliq sahesige qoyghan bu charimizni ijra qilishni dawamlashturush arqiliq, Uyghur xelqini éksplatatsiye qilip, zulum qiliwatqan xitay xelq jumhuriyitini jawabkarliqqa tartimiz. ”

U yene mundaq dégen: “Yuqiriqi bu cheklime mes'uliyet bilen tijaret qilidighan shirketlerning diqqet bilen ish körüshige yardem béridu, shundaq bolghandila biz birlikte mejburiy emgek mehsulatlirining dölitimizge kirishining aldini alalaymiz. ”

Uyghur mejburiy emgek mesilisi boyiche mutexessisleshken tetqiqatchi, amérikadiki kommunizm qurbanliri xatire sariyining tetqiqatchisi adriyan zénz bolsa amérika ana weten xewpsizliki ministirliqining bu qararini qarshi aldi. U radiyomizgha qilghan sözide mundaq dédi: “Bu intayin muhim, shundaqla biz uzundin béri kütken bir qedem. Men özümning eng yéqinqi doklatimda 2023-yildiki mejburiy emgek küchlirini yötkesh nisbitining aldinqi yildikidin 38 pirsent ashqanliqini yazghan idim. Yenimu muhimi, Uyghur mejburiy emgikini hel qilishtiki achquchluq xiris shinjangdin biwasite éksport qiliniwatqan mehsulatlarla emes, belki shinjangning mehsulatlirini yötkep yaki qayta pishshiqlap ishlep satidighan wasitichi, ara shirketlerdur. Ularning orni shinjangda bolmisimu, emma ular paxta we bashqa xam eshyalarni shu yerdin sétiwalidu. Bu qétim mushundaq ara shirketlerning qara tizimlikke kirgüzülüshi bu jehettiki muhim yéngiliqlarning biri bolup hésablinidu. ”

Amérika ana weten xewpsizliki ministirliqining bu heqtiki bayanatidin qarighanda, amérika hökümiti 2021-yili “Uyghur mejburiy emgikining aldini élish qanuni” ni ijra qilghandin buyan, hazirghiche 65 orunni soda qara tizimlikige kirgüzgen. Yuqiriqi 26 paxta shirkiti we zawutining Uyghur mejburiy emgikining aldini élish qanuni boyiche qara tizimlikke élinishi, tunji qétim bundaq köp orunning birla waqitta qara tizimlikke élinishi bolup hésablinidiken.

Doktor adriyan zénzning qarishiche, tizimlikke élin'ghan shirketlerning hemmisining oxshash sahede bolushi bu ishning sistémilashqanliqinimu namayan qilip béridiken. U mundaq deydu: “Ilgiri her sahege tewe bir yaki ikki shirket qara tizimlikke élinatti. Bu qétim peqet paxtichiliq sahesidiki 26 shirket biraqla qara tizimlikke élin'ghan. Bu nahayiti sistémiliq hem kölemlik heriket bolupla qalmay, u yene bundin kéyin Uyghur mejburiy emgiki mewjut bolghan bashqa sahelerningmu mushundaq sistémiliq jazalinishi mumkinlikini körsitip béridu. ”

Yuqiriqi bu qararning élan qilinishi bilen amérika dölet mejlisi xitay ishliri ijra'iye komitétining re'isliri bolghan amérika awam palata ezasi kiris simis we kéngesh palata ezasi jéf mérkléy derhal bayanat élan qilip, qararni qarshi alghan. Ular bayanatida, “Uyghur mejburiy emgikining aldini élish qanuni” ning ijra qilinishini dawamliq kücheytish üchün tirishidighanliqini tekitlesh bilen birge ana weten xewpsizliki ministirliqini “Uyghur mejburiy emgiki bilen bulghan'ghan birikme kiristalliq silitsiy, alyumin, birikme xilorid we yérim birikme tala sana'iti qatarliq sahelerdiki shirketlernimu qara tizimlikke élish” qa chaqirghan. Ular bayanatida, “Herqandaq kishining irqiy qirghinchiliqtin payda élishigha yol qoyulmasliqi kérek” dep tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.