Хитай һөкүмити америка билән қаршилишишниң орниға, диалогни таллашни оттуриға қойған

Хитай баш министери ли чяң 23-март йәкшәнбә күни америка кеңәш палата әзаси стив дәйнис билән бейҗиңда көрүшкинидә, хитай билән американиң диалогни таллап өз-ара тиркишишниң алдини елиши керәкликини оттуриға қойған. Ли чяң сөзидә икки дөләтниң бир муһим тарихий басқучқа йетип кәлгәнликини әскәртип туруп, хитай рәиси шиҗинпиң америка президенти доналд трамп билән январда телефонда көрүшкинидә икки дөләтниң дост вә шерик болалайдиғанлиқини, шундақла бир-бириниң мувәппәқийитигә төһпә қошалайдиғанлиқини билдүргән.

Америка бирләшмә агентлиқиниң бу тоғрисида бәргән хәвиридә ейтилишичә, америка кеңәш палата әзаси дәйнис президент трампниң йеқинлиридин болуп, у бу қетим бейҗиңға трамп билән шиҗинпиң арисидики алий учришишниң улини салғили, шундақла америка үчүн муһим болған фентанил мәсилисини хитай билән сөзләшкили кәлгән икән. У өткән пәйшәнбә күни бейҗиңға йетип кәлгән болуп, хитайниң муавин баш министери хелифең билән көрүшкинидә, президент трампниң хитайдин келидиған фентанил зәһәрлик чекимлик тәркиблириниң еқип киришини тохтитишни оттуриға қойған.

Хитайниң шинхуа агентлиқиниң икки тәрәпниң бу көрүшиши тоғрисида бәргән хәвиридә ейтилишичә, ли чяң сода урушида утуп чиқидиған бир тәрәпниң йоқлиқини билдүрип, америка ширкәтлириниң хитайға келип тәрәққий қилиш пурсәтлиридин бәһриман болса болидиғанлиқини ейтқан. Ли чяң йәкшәнбә әттигәндә ечилған хитай тәрәққият мунбирида сөз қилип, хитай иқтисадиниң ташқий сәвәпләрдин күтүлмигән тәвринишкә дуч келидиғанлиқини билдүргән.

Хитайниң иқтисади йеқинқи айлардин бери зор арқиға чекингән болуп, с н н ниң йеқиндики мулаһизисигә қариғанда хитай һөкүмити америка президенти трампниң хитай билән елип баридиған сода урушидин қаттиқ әндишә қилмақта икән.