Xitayning istanbuldiki konsulxanisining chaghan bayrimi murasimigha bir qisim Uyghurlarning qatnishishi ghulghula qozghidi

Ixtiyariy muxbirimiz arslan
2023.01.23
xitay-istanbul-konsoli-chaghan-uyghur-2.jpg Arilirida bir qisim Uyghurlarmu barbolghan, xitayning istanbul bash konsulining chaghanliq pa'aliyitige qatnashquchilardin bir körünüsh, 2023-yili 17-yanwar, istanbul, türkiye.
Social Media

Xitayning istanbuldiki bash konsul wekili namdiki tiwéttir hésabidin 18-yanwar küni élan qilin'ghan melumatlargha qarighanda, 17-yanwar kechte xitayning istanbuldiki bash konsul wekili wu jyen we konsulxana xadimlirining qatnishishi bilen xitayning chaghan bayrimini tebriklesh pa'aliyiti élip bérilghan bolup, pa'aliyetke istanbuldiki atalmish “Uyghur sana'etchi we sodigerler jem'iyiti” ning kattiwéshi sabir bughda qatarliq bir qanche Uyghurning qatnishishi ijtima'iy taratqularda qattiq ghulghula qozghidi.

Xitayning istanbuldiki bash konsul wekili namdiki tiwéttir hésabida töt parche resim tarqitilghan bolup, resimdiki kishiler arisida istanbuldiki atalmish Uyghur soda sana'etchiler jem'iyitining kattiwéshi sabir boghda qatarliq 6-5 Uyghur orun alghan. Bu resim we uchur ijtima'iy taratqularda tarqalghandin kéyin muhajirettiki Uyghurlarning qattiq naraziliqini qozghidi.

Resimlerdiki, Uyghur sen'etchilerning milliyche kiyimler bilen sehnide dolan usuli oynawatqan körünüshler diqqettin tartti. Uyghur zhurnalist muhemmed éli atayurt bu heqte pikir bayan qilip, mezkur dolan usuli oynighan sen'etchilerning Uyghur diyaridin alahide keltürülgen kespi sen'etchiler ikenlikining éhtimaldin yiraq emeslikini ilgiri sürdi.

Xitayning istanbul bash konsulining chaghanliq pa'aliyitidin bir körünüsh, 2023-yili 17-yanwar, istanbul, türkiye.

Xitayning istanbuldiki bash konsul wekili namdiki tiwéttir hésabida, “Istanbulda yashawatqan xitay puqralirimiz bilen birlikte en'eniwi chaghan bayrimini tebrikliduq” dégendek uchurlar bilen resimler hembehirlen'gen.

Melum bolushiche, mezkur pa'aliyet istanbuldiki shangrila méhmanxanisida ötküzülgen bolup, xitay da'irliri pa'aliyetke xitaylardin sirt yene köp sanda türkler we az sandiki Uyghurlardin bolup mingdin artuq kishi qatnashqanliqini yazghan bolsimu. Lékin resimdiki zalgha qarighanda 100 etrapida kishining qatnashqanliqini körüwalghili bolidu.

Xitayning istanbuldiki bash konsulxanisining resmiy tor bétidiki melumatlarda xitay bash konsulxanisi bu chaghan pa'aliyitini uyushturushtin besh kün burun, yeni 12-yanwar xitay bash konsul wekili wu jyenning bashchiliqidiki konsulxana xadimliri istanbuldiki “Uyghur sana'etchiler we sodigerler jem'iyiti” ni ziyaret qilghanliqi we mexsus atalmish “Shinjangliq muhajirlar” bilen “Issiq bahar” témisida bayramlishish pa'aliyiti uyushturulghanliqi, pa'aliyetke 30 din artuq Uyghur, mu'awin bash konsul wang féy we konsulxane xizmetchilirining qatnashqanliqi bildürülgen.

Xitay bash konsuli wekili mezkur uchrishishqa qatnashqan 30 din artuq Uyghurgha “Chaghanliq hediye buyumliri tarqitip bergen we xitay kompartiyesining 20-nöwetlik qurultiyi we xitayning atalmish “Yéngi dewridiki tereqqiyat netijiliri” ni tonushturghan. U, ötken 10 yilda “Uyghur aptonom rayoni” da qolgha keltürülgen tereqqiyat we netijilerni tonushturup, mezkur Uyghurlardin chet elliklerge wetinini ene shundaq tonushturushni we wetenperwerlikte ching turushni, özlirini téximu tereqqiy qildurup, ikki xelq otturisidiki öz-ara chüshinish we dostluqni kücheytishke töhpe qoshushini ümid qilidighanliqini bildürgen.

Xitayning istanbul bash konsulining chaghanliq pa'aliyitide dolan usuli we bashqa nomur körsitiwatqan artislar, 2023-yili 17-yanwar, istanbul, türkiye.

Istanbuldiki dunya Uyghur qurultiyi wexpisining re'isi abduréshit abdulxemit xitay bash konsulxanisining mezkur chaghanliq pa'aliyiti heqqida pikir bayan qilip, xitayning sherqiy türkistanda irqiy qirghinchiliq élip bériwatqan bügünki künde, bezi Uyghurlarning héch ish bolmighandek xitayning chaghan bayrimini tebrikleshke qatnishishi özining shexsi menpe'eti, iqtisadiy we ijtima'iy menpe'eti üchün ikenlikini bildürdi:

Abduréshit ependi yene xitayning xelq'aragha özining Uyghurlargha hichqandaq irqiy qirghinchiliq qilmighanliqini körsitish üchün bu xil pa'aliyetlerge Uyghurlarni qatnashturidighanliqini körsetti. U, yene mundaq dédi: “Bu yerde peqet xelq'arani we bir qisim nadan xelqimizni aldash üchün, özlirining bashqa milletler bilen nahayiti inaq-ittipaq ichide yaxshi ötüwatimiz dégen chüshenchini teshwiq qilish üchün ashu Uyghurlarni kozir qilip qolliniwatidu”.

Abduréshit ependi sözide hazir dunyada xitayning sherqiy türkistanda yürgüzüwatqan irqiy qirghinchiliq siyasiti we koruna wirusi sewebidin qebihlerche yürgüzgen siyasiti sewebidin xitaygha qarshi selbiy qarashlar otturigha chiqqan bir weziyette, xitay hökümitining özini yaxshi körsitish, bolupmu sherqiy türkistandiki Uyghur we bashqa musulman xelqler bilen nahayiti yaxshi inaq-ittipaq ötüwatqandek, ularning ehwalining nahayiti yaxshidek bir oqumni teshwiq qilish üchün heriket qiliwatqanliqini bildürdi.

Uyghur zhurnalist muhemmed éli atayurt bu heqte pikir bayan qilip, Uyghurlar mesilisi xelq'aralashqan bügünki künde xitay özlirini Uyghurlar bilen inaq-ittipaq ötüwatqandek, Uyghurlarning bay-bayashat yashawatidu dégendek chüshenche peyda qilish üchün wetendin Uyghur sen'etchilerni istanbulgha keltürüp sehnige chiqiriwatqanliqini, biraq bu xil aldamchiliqlargha dunyaning ishenmeydighanliqini tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.