Хитай компартийәсиниң 100 йиллиқ қанлиқ тарихи әйибләнди

Ихтиярий мухбиримиз әкрәм
2021-07-01
Share
Хитай компартийәсиниң 100 йиллиқ қанлиқ тарихи әйибләнди Хитай һөкүмити коммунистик партийә қурулғанлиқиниң 100 йиллиқини хатириләватқанда, чәтәлдә өткүзүлгән 100 йиллиқ қанлиқ тарихни әйибләш паалийәтлириниң бириниң тәшвиқат варақчиси. 2021-Йили 1-июл, германийә.
RFA/Ekrem

7-Айниң 1-күни хитай һөкүмити коммунистик партийә қурулғанлиқиниң 100 йиллиқини хатириләватқанда, чәт әлләрдә хитайниң 100 йиллиқ қанлиқ тарихини әйибәш паалийәтлири өткүзүлди.

1-Июл күни хитай һөкүмити коммунистик партийә қурулғанлиқиниң 100 йиллиқини дәбдәбә билән хатириләватқанда, чәт әлдики уйғурлар, тибәтләр, хоңкоңлуқлар, хитай демократлири, хәлқаралиқ кишилик һоқуқ тәшкилатлири һәмдә мусулман җамаити түрлүк йиғилиш вә муһакимә паалийәтлирини уюштуруп, компартийәниң 100 йиллиқ қанлиқ тарихини әйиблиди.

1-Июл күни д у қ берлиндики тәһдит астидики хәлқләр тәшкилати, тибәтликләр вә хитай демократлири билән биргә хитайниң берлиндики әлчиханиси алдиға йиғилип, хитайда һазиниң символи болған ақ гүлчәмбирәкни әлчихана дәрвазиси алдиға қоюп, өзлириниң хитай коммунистик партийәсигә болған наразилиқини ипадилигән.

Хитай һөкүмити коммунистик партийә қурулғанлиқиниң 100 йиллиқини хатириләватқанда, чәтәлдә өткүзүлгән 100 йиллиқ қанлиқ тарихни әйибләш паалийәтлириниң бириниң тәшвиқат варақчиси. 2021-Йили 1-июл, германийә.

Бу паалийәттин кейин тәһдит астидики хәлқләр тәшкилати билән д у қ ниң саһибханлиқида уйғурлар, тибәтләр, моңғуллар, хоңкоңлуқлар, хитай демократлири "хитай коммунистик партийәсиниң 100 йиллиқини тәбрикләшкә һечқандақ сәвәб йоқ" намлиқ тор муһакимә йиғини өткүзгән. Йиғинда "7-айниң 1-күни кишилик һоқуқ, әркинлик, демократийәниң матәм күнидур. Бу күни биз хитай коммунистик партийәси тәрипидин еғир зулумларға вә қирғинчилиққа учриған барлиқ хәлқләргә матәм билдүримиз" дегән вә хитайниң қанлиқ тарихни йошуруп, инсанийәт үчүн апәт болған коммунистик партийәниң 100 йиллиқини хатириләшкә һечқандақ асаси йоқлиқини илгири сүргән. Бу паалийәтләргә иштирак қилған д у қ берлин ишханисиниң мудири ғәюр қурбан әпәнди бу һәқтә бизни қисқичә мәлуматлар билән тәминлиди.

1-Июл күни әнгилийә пайтәхти лондундики хитай әлчиханисиниң алдида хитай коммунистик партийәси қурулғанлиқиниң 100 йиллиқи мунасивити билән наразилиқ намайиши өткүзүлгән. Лондундики бу паалийәтни биританийә уйғур җәмийити қатарлиқ 40 қа йеқин тәшкилат ортақ уюштурған болуп, паалийәткә асаслиқи уйғурлар мәсилисигә йеқиндин көңүл бөлүп келиватқан бирқисим йәрлик мусулман тәшкилатлириниң әзалири қатнашқан.

Намайишниң уйғурларға тарқитилған тәшвиқат үзүндилиридә шундақ йезилған: "залим террорлуқ тәшкилатниң 100 йиллиқиға ортақ қарши турайли! хитай коммунистик партийәси 1921-йили 1-июл қурулғандин тартип таки 1949-йили хитайда һакимийәтни қолиға алғучә қан дәрясида аққан партийәдур. У 1949-йили шәрқий түркистанни бесивалғандин буян, бу бипаян тупрақни мәңгү өзиниң қиливелиш үчүн 2016-йилиғичә уйғурларниң дини, мәдәнийити вә миллий кимликигә аит барлиқ өзгүчиликлири үстидин ақ террорлуқ сиясити йүргүзүп кәлгән, ассимилатсийә қилип йоқитишни йолға қойған. Бу мәқсәдлиригә йетәлмигәндин кейин, 2017-йилидин башлап җаза лагерлирини тәсис қилип, милйонлиған уйғурларни қамап, ашкара ирқий қирғинчилиқни башлиди. Хитай коммунистик партийәси бүгүн өзиниң қанлиқ тарихини йошуруп 100 йиллиқини қутлуқлимақта. 50 Милйондин артуқ хитай хәлқиниң җениға замин болған, шәрқий түркистанда йәнә милйонлиған мусулман хәлқләрни қәтли қилған 90 милйон әзаси болған бу партийә инсанийәт тарихидики әң чоң террорлуқ тәшкилаттур. Инсанийәт алими үчүн зор апәт болған бу партийәгә қарши туруш, һәрбир инсанниң мәҗбурийитидур. Биз сизниңму бу сәпкә қошулуп динниң, демократийәниң, инсанлиқниң, әркинликниң дүшмини болған бу партийәгә қарши бир кишилик авазиңизни чиқиришиңизни үмид қилимиз!"

Д у қ лондун ишханисиниң мудири рәһимә ханим бу хусуста зияритимизни қобул қилғанда, лондундики бу паалийәтни мусулман тәшкилатлириниң өз алдиға уюштурғанлиқини әскәртти.

1-Июл күни д у қ йәнә тибәтләр, моңғуллар, хоңкоңлуқлар, тәйвәнликләр вә демократик хитайлар билән бирликтә "хитай коммунистик партийәсиниң 100 йиллиқи: тәбрикләйдиған нәрсә әмәс, бәлки бир әсирлик зулум" дегән темида тор муһакимә йиғини өткүзүп, хитай коммунистик партийәсиниң әсирлик қанлиқ тарихини әсләп өткән. Бу йиғинға уйғурларға вакалитән д у қ хитай ишлири бөлүминиң мудири илшат һәсән көкбөрә әпәнди қатнашқан. У бу һәқтә зияритимизни қобул қилғанда, хитай коммунистик партийәсиниң бир әсирлик җинайәтлириниң бу қетимқи йиғинниң асаслиқ темиси болғанлиқини тилға алди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт