Xitay kompartiyesining 100 yilliq qanliq tarixi eyiblendi

Ixtiyariy muxbirimiz ekrem
2021-07-01
Share
Xitay kompartiyesining 100 yilliq qanliq tarixi eyiblendi Xitay hökümiti kommunistik partiye qurulghanliqining 100 yilliqini xatirilewatqanda, chet'elde ötküzülgen 100 yilliq qanliq tarixni eyiblesh pa'aliyetlirining birining teshwiqat waraqchisi. 2021-Yili 1-iyul, gérmaniye.
RFA/Ekrem

7-Ayning 1-küni xitay hökümiti kommunistik partiye qurulghanliqining 100 yilliqini xatirilewatqanda, chet ellerde xitayning 100 yilliq qanliq tarixini eyibesh pa'aliyetliri ötküzüldi.

1-Iyul küni xitay hökümiti kommunistik partiye qurulghanliqining 100 yilliqini debdebe bilen xatirilewatqanda, chet eldiki Uyghurlar, tibetler, xongkongluqlar, xitay démokratliri, xelq'araliq kishilik hoquq teshkilatliri hemde musulman jama'iti türlük yighilish we muhakime pa'aliyetlirini uyushturup, kompartiyening 100 yilliq qanliq tarixini eyiblidi.

1-Iyul küni d u q bérlindiki tehdit astidiki xelqler teshkilati, tibetlikler we xitay démokratliri bilen birge xitayning bérlindiki elchixanisi aldigha yighilip, xitayda hazining simwoli bolghan aq gülchembirekni elchixana derwazisi aldigha qoyup, özlirining xitay kommunistik partiyesige bolghan naraziliqini ipadiligen.

Xitay hökümiti kommunistik partiye qurulghanliqining 100 yilliqini xatirilewatqanda, chet'elde ötküzülgen 100 yilliq qanliq tarixni eyiblesh pa'aliyetlirining birining teshwiqat waraqchisi. 2021-Yili 1-iyul, gérmaniye.

Bu pa'aliyettin kéyin tehdit astidiki xelqler teshkilati bilen d u q ning sahibxanliqida Uyghurlar, tibetler, mongghullar, xongkongluqlar, xitay démokratliri "Xitay kommunistik partiyesining 100 yilliqini tebrikleshke héchqandaq seweb yoq" namliq tor muhakime yighini ötküzgen. Yighinda "7-Ayning 1-küni kishilik hoquq, erkinlik, démokratiyening matem künidur. Bu küni biz xitay kommunistik partiyesi teripidin éghir zulumlargha we qirghinchiliqqa uchrighan barliq xelqlerge matem bildürimiz" dégen we xitayning qanliq tarixni yoshurup, insaniyet üchün apet bolghan kommunistik partiyening 100 yilliqini xatirileshke héchqandaq asasi yoqliqini ilgiri sürgen. Bu pa'aliyetlerge ishtirak qilghan d u q bérlin ishxanisining mudiri gheyur qurban ependi bu heqte bizni qisqiche melumatlar bilen teminlidi.

1-Iyul küni en'giliye paytexti londundiki xitay elchixanisining aldida xitay kommunistik partiyesi qurulghanliqining 100 yilliqi munasiwiti bilen naraziliq namayishi ötküzülgen. Londundiki bu pa'aliyetni biritaniye Uyghur jem'iyiti qatarliq 40 qa yéqin teshkilat ortaq uyushturghan bolup, pa'aliyetke asasliqi Uyghurlar mesilisige yéqindin köngül bölüp kéliwatqan birqisim yerlik musulman teshkilatlirining ezaliri qatnashqan.

Namayishning Uyghurlargha tarqitilghan teshwiqat üzündiliride shundaq yézilghan: "Zalim térrorluq teshkilatning 100 yilliqigha ortaq qarshi turayli! xitay kommunistik partiyesi 1921-yili 1-iyul qurulghandin tartip taki 1949-yili xitayda hakimiyetni qoligha alghuche qan deryasida aqqan partiyedur. U 1949-yili sherqiy türkistanni bésiwalghandin buyan, bu bipayan tupraqni menggü özining qiliwélish üchün 2016-yilighiche Uyghurlarning dini, medeniyiti we milliy kimlikige a'it barliq özgüchilikliri üstidin aq térrorluq siyasiti yürgüzüp kelgen, assimilatsiye qilip yoqitishni yolgha qoyghan. Bu meqsedlirige yételmigendin kéyin, 2017-yilidin bashlap jaza lagérlirini tesis qilip, milyonlighan Uyghurlarni qamap, ashkara irqiy qirghinchiliqni bashlidi. Xitay kommunistik partiyesi bügün özining qanliq tarixini yoshurup 100 yilliqini qutluqlimaqta. 50 Milyondin artuq xitay xelqining jénigha zamin bolghan, sherqiy türkistanda yene milyonlighan musulman xelqlerni qetli qilghan 90 milyon ezasi bolghan bu partiye insaniyet tarixidiki eng chong térrorluq teshkilattur. Insaniyet alimi üchün zor apet bolghan bu partiyege qarshi turush, herbir insanning mejburiyitidur. Biz sizningmu bu sepke qoshulup dinning, démokratiyening, insanliqning, erkinlikning düshmini bolghan bu partiyege qarshi bir kishilik awazingizni chiqirishingizni ümid qilimiz!"

D u q londun ishxanisining mudiri rehime xanim bu xususta ziyaritimizni qobul qilghanda, londundiki bu pa'aliyetni musulman teshkilatlirining öz aldigha uyushturghanliqini eskertti.

1-Iyul küni d u q yene tibetler, mongghullar, xongkongluqlar, teywenlikler we démokratik xitaylar bilen birlikte "Xitay kommunistik partiyesining 100 yilliqi: tebrikleydighan nerse emes, belki bir esirlik zulum" dégen témida tor muhakime yighini ötküzüp, xitay kommunistik partiyesining esirlik qanliq tarixini eslep ötken. Bu yighin'gha Uyghurlargha wakaliten d u q xitay ishliri bölümining mudiri ilshat hesen kökböre ependi qatnashqan. U bu heqte ziyaritimizni qobul qilghanda, xitay kommunistik partiyesining bir esirlik jinayetlirining bu qétimqi yighinning asasliq témisi bolghanliqini tilgha aldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet