Xitay da'iriliri lagér shahiti qelbinur sidiqning akisining ölümini sir tutush heqqide mexpiy uqturush chiqarghan

Muxbirimiz shöhret hoshur
2023.04.29
qelbinur-sidiq-akisi-tursun-sidiq.jpg Lagér shahiti qelbinur sidiq xanim akisi tursun sidiq ependi bilen. 2016-Yili 22-may, ürümchi.
Qelbinur Sidiq teminlidi

Zukam seweblik doxturxanigha barghan tursunjan sidiqning derhalla jiddiy qutquzush bölümige élinishi we etisi jan üzgenliki, uning üstige bu bu sirliq ölümning singlisi qelbinur sidiq amérika dölet mejiliside guwahliq bérip qaytqinida yüz bergenliki, merhumning ölüm sewebi heqqide her xil gumanlarni peyda qilghan idi. Qelbinur sidiq akisining ölüm sirini yéshelmey turghan peytte, ürümchidiki uruq-tughqanliridin téléfon kélip, özliri bir kün awwal dégen ölüm sewebige tüzitish bergen. Yeni tursunjanning doxturxanigha zukam seweblik emes, yoshurun yürek késili qozghilip barghanliqi eskertilgen, shundaqla qelbinurning bu ishni mushundaq chüshinishi we chüshendürüshi telep qilin'ghan.

 Uruq-tughqanlirining bu tüzitish telipige akisining ölüm uzitish ishlirigha dölet xewpsizlik saqchilirining arilashqanliqi qétilip, uning eslidila mewjut gumanini téximu ashurghan.

 Bu yil 67 yashqa kirgen tursunjan sidiq, ürümchi saybagh rayonluq sheher qurulushini bashqurush idarisining sabiq idare bashliqi bolup, u buningdin besh yil awwal pénsiyege chiqqan iken. Biz uning ölüm sewebi heqqide melumat élish üchün ürümchidiki alaqidar idare-jem'iyetlerge téléfon qilduq. Téléfonimizni qobul qilghan bulaqtagh (shüymogo) rayonluq sheher qurulush idarisining bir xadimi, tursunjan sidiqning doxturxanida jan üzgenlikini delillesh bilen birlikte, uning ölüm sewebini ashkarilashqa bolmaydighanliqini eskertti.

 Saybagh rayonluq sheher qurulush idarisining xadimi, özining tursunjan sidiqning ölümidin xewer tapqanliqi, emma sabiq xizmetdishining a'ilisige hal sorap barmighanliqini bayan qilish arqiliq, bu ölüm murasimigha dölet xewpsizlik küchlirining qol tiqqanliqidin shepe berdi. Umu sabiq xizmetdishining ölüm sewebi heqqide melumat bérelmidi.

 Qelbinur sidiqning déyishiche, merhum tursunjan sidiq saybagh rayonluq hökümette 40 yilche xizmet qilghan we herqaysi bölümlerde emel tutqan bolup, u jem'iytette her sahe kishiliri bilen keng dostluq ornatqan we jama'etchilik ishliridimu közge körün'gen iken. Bolupmu xizmet éhtiyaji seweblik ürümchidiki qanun sahesidikiler bilen uzun mezgil zich alaqide bolghan iken.

 Shunga biz saybagh rayonluq teptish mehkimisige téléfon qilip, tursunjan sidiqning ölüm murasimi ishliri heqqide melumat soriduq. Téléfonimizni qobul qilghan xadim, tursunjan sidiqni tonuydighanliqi, uning ölümidin xewiri barliqi, emma yoqlash cheklen'genliki üchün a'ilisige hal sorap barmighanliqini bildürdi. Uning bayan qilishiche, buningdin bir hepte burun, yeni tursunjan sidiq jan üzgen küni da'iriler saybagh rayonidiki idare-jem'iyetlerning Uyghur ishchi-xizmetchilirige mezkur musibetlik a'ilini yoqlap barmasliqni éytqan iken bu heqte mexsus échilghan yighinda, bu ölüm xewirini öz ichide bilip qélish we bashqilargha tarqatmasliq telep qilin'ghan. Bu idaridiki yene bir xadimmu, mezkur uqturushtin xewer tapqanliqi we bu ölüm xewirining “Dölet mexpiyetliki” süpitide ching tutuluwatqanliqini tekitlidi.

 Özini ashkarilashni xalimighan ahalilerdin birining bayan qilishiche, tursunjan sidiqning a'ilisi musibetke duch kelgen kündin étibaren dölet amanliq saqchiliri teripidin nazaret qilin'ghan, merhumning jesiti saqchilarning nazariti astida ürümchidiki gülsay qebristanliqigha depne qilin'ghan. A'ile ezaliri we biwasite tughqanlardin bashqilarning ölüm murasim ishlirigha qatnishishigha ruxset qilinmighan. Saybagh rayonluq teptish mehkimisidiki yene bir xadim, yuqiriqi cheklimilerning tursunjan sidiqning chet eldiki singlisining, yeni qelbinur sidiqning “Kashilisi” seweblik kélip chiqqanliqini ilgiri sürdi.

 Yuqiriqi uchurlar gerche tursunjan sidiqning ölüm sirini aydinglashturup bérelmisimu, emma muhajirettiki Uyghurlarning, jümlidin qelbinur sidiqning mezkur ölüm heqqidiki gumanlirining asassiz emeslikini körsitip bermekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.