Франсийәдики аммиви тәшкилатлар хәлқаралиқ маркилар үстидин сотқа әрз сунған

Мухбиримиз нуриман
2021-04-12
Share
Франсийәдики аммиви тәшкилатлар хәлқаралиқ маркилар үстидин сотқа әрз сунған Уйғур мәҗбурий әмгикидин пайдиланған ширкәтләргә қарши сотқа сунған әрз һәққидә өткүзүлгән мухбирларни күтүвелиш йиғини. 2021-Йили 12-апрел, париж.
Rafa’il Gilukismen teminligen

Йеқиндин буян мәҗбурий әмгәк мәсилиси хәлқара җәмийәтниң диққитини қозғиди. Дуняниң һәрқайси җайлиридики һөкүмәтләр конкирет тәдбирләрни қоллинип, ширкәтләрниң мәсулийитини сүрүштә қилишқа башлиди. Мушундақ бир мәзгилдә фирансийәдә үч чоң аммиви тәшкилат бирлишип, хәлқаралиқ төт чоң маркини уйғур мәҗбурий әмгикидин пайдилиниш вә шу арқилиқ уйғур қирғинчилиқини қоллаш билән әйибләп сотқа әрз сунған.

12-Април чирикликкә қарши туруш гурупписи-шерпа (Sherpa) "пакиз кийим-кечәк һәрикити" ниң фирансийә тармиқи болған "әхлақ аммиви тәшкилати" (Ethique NGO) вә явропа уйғур иниститути бу һәқтә мәхсус мухбирларни күтүвелиш йиғини өткүзгән. Ахбарат елан қилиш йиғиниға һәр қайси тәшкилатларниң вәкиллиридин башқа йәнә уйғур мәсилисини фирансийәдә күнтәртипкә әкелиштә муһим рол ойнаватқан явропа парламентиниң әзаси рафаил гилукисмән вә бу әрзни үстигә алған фирансийәлик даңлиқ адвокат вилиям буғдоң қатарлиқлар қатнашқан.

Парламент әзаси рафаил глуксман йиғинда мундақ дегән: "бу әрз интайин муһим, чүнки бу дуняда, болупму фирансийәдә мәҗбурий әмгәккә қарши елип бериливатқан сәпәрвәрликниң һәл қилғуч қәдими. Бир йилдин буян нәччә йүз миңлиған фирансийә пуқраси өзлири ишлитиватқан маркилардин уларниң уйғур хәлқини қул әмгикигә салидиған җинайәткә биваситә яки васитилик қатнишишини ахирлаштурушни тәләп қилип келиватду."

Йиғиндин кейин явропа уйғур институтиниң мәсули дилнур рәйһан ханим вә адвокат вилиям буғдоңниң ярдәмчиси басилә одит әпәнди зияритимизни қобул қилди.

Дилнур рәйһан ханим қилинған бу әрзниң маһийити вә үстидин әрз қилинған маркилар һәққидә тәпсилий тохталди.

Басилә одит әпәнди әрз сунулғандин кейинки қануний тәртипләр һәққидә тохтилип мундақ деди: "биз әрзимизни мәһкимигә бәрдуқ. Әмди мәһкимәниң тәкшүрүш хизмәтлири башлиниду. Униңдин кейин дәлил-испатлар толуқланғанда биз әрз қилған ширкәтләрни җинайи ишлар мәһкимисигә чақириду. Биз тәкшүрүш хадимлири вә сақчиларни әрзимиздики ширкәтләр һәққидә испатлар билән тәминләшни давамлаштуримиз. Шу арқилиқ сақчиларниң тәкшүрүшни изчил давамлазштурушиға бесим қилғили болиду. Йәни биз бу ишиниң пейида болимиз."

Бу әрзнамини сунғанларниң қатарида хәлқара ахбарат вастилирини лагер һәққидә муһим учурлар билән тәминлигән лагер шаһити турсунай зиявудун ханимму бар болуп, бу қетимқи әрздиму у лагер ечи вә сиртидики мәҗбурий әмгәк һәққидә гуваһлиқ бәргән.

Дилнур рәйһан ханим шаһитларниң гуваһлиқи билән сунулған бу әрзниң тәкшүрүлүши әмди фирансийә сақчилириниң вәзиписигә айланғанлиқини тәкитлиди.

Басилә одит әпәнди фирансийәдә бу һәқтә бир әрзниң сунулуши вә ахбарат елан қилиш йиғининиң ечилиши, шундақла фирансийә қануни бойичә фирансийә сақчилириниң бу делони қолға елишиниң өзини "тунҗи ғәлбә" дәп атиди. У йәнә мундақ деди: "бу тунҗи ғәлбә, чүнки бу шу ширкәтләргә ‹биз силәрни назарәт қиливатимиз, һәқиқәтни көрүп, хитай билән болған мәҗбурий әмгәккә четишлиқ һәрикитиңларни тохтатмисаңлар, биз силәрниң пешиңларни қоюп бәрмәймиз" дегән учурни бериду."

Әрзнамидә мундақ мәзмунлар йәр алған: "шәрқий түркистандики мәҗбурий әмгәккә аит ашкариланған доклатлар вә шаһитлар бәргән гуваһлиқларда дейилгән уйғур хәлқигә қаритилған бастурушлар нәзәргә елинғанда, хәлқаралиқ ширкәтләр фирансийә земинида уйғур мәҗбурий әмгики арқилиқ ишләпчиқирилған мәһсулатларни тарқатқанлиқи үчүн чоқум фирансийә җинайи ишлар қанунида җавабкарлиққа тартилиши керәк."

Ахирида дилнур рәйһан ханим мундақ деди: "биз уйғур мәҗбурий әмгикигә четишлиқ һечқандақ бир маркини сақ қоймаймиз. Бизниң мәқситимиз башта уларға хаталиқини тонуш вә уйғур мәҗбурий әмгики билән мунасивитини үзүш һәққидә пурсәт бериш. Фирансийәдә биз бу әрзнамини башлидуқ, явропадики башқа дөләтләрдиму мушуниңға охшаш қануний тәртипләр йеқинда башлиниду."

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт