Хитай даирилири уйғур районида “дөләт мәхпийәтликини ашкарилимаслиқ” һәққидә тәһдитлик тәшвиқат елип бармақта

Мухбиримиз шөһрәт һошур
2022-04-28
Share
Хитай даирилири уйғур районида “дөләт мәхпийәтликини ашкарилимаслиқ” һәққидә тәһдитлик тәшвиқат елип бармақта Хитай даирилири б д т кишилик һоқуқ алий комиссари мишел бачелет(Michelle Bachelet) ниң зиярити алдида, уйғур районида “дөләт мәхпийәтликини сақлашта 10 ни қилмаслиқ” намлиқ тәшвиқат паалийити елип бармақта. 2022-Йили апрел.
Social Media

Иҗтимаий таратқулардики бир учурдин мәлум болушичә, хитай даирилири б д т кишилик һоқуқ алий комиссари мишел бачелетниң зиярити алдида, уйғур районида “Дөләт мәхпийәтликини сақлашта 10 ни қилмаслиқ” намлиқ тәшвиқат паалийити елип бармақтикән. Мухбиримизниң телефон зиярәтлири давамида, мушу хил намдики бир уқтурушниң буниңдин икки ай аввал тарқитилғанлиқи ашкариланди. Уйғур көзәткүчиләр, хитайниң б д т әвәтмәкчи болған кишилик һоқуқ тәкшүрүш гурупписидин һәқиқий әһвални йошуруш үчүн аһалиләргә тәһдит селиватқанлиқини илгри сүрмәктә.

Иҗтимаий таратқулардин мәлум болушичә, йәркән наһийәлик партком йеқинда “дөләт мәхпийәтликини сақлаштики 10 ни қилмаслиқ” дегән намда бир тәшвиқат паалийити елип барған. Мәзкур паалийәт син күрүнүшлүк шәкилдә елип берилип, 10 нәпәр аял тәшвиқатчи “10 ни қилмаслиқ” ниң конкирет мәзмунлирини бир бир-бирләп оқуп чиққан. Син көрүнүшидики баянлардин мәлум болушичә, мәзкур тәшвиқат паалийитидә пәқәт илгири йолға қоюлуп келиватқан “дөләт мәхпийәтликни сақлаш” ниң тәдбирлири техиму конкиретлаштуруп, аһалиләр районниң һәқиқий әһвалини ашкарилап қоймаслиқ һәққидә җиддий шәкилдә агаһландурулған.

Биз уйғур райониниң һәрқайси җайлириға телефон қилип, б д т тәкшүрүш гуруписи йетип келиш һарписида қандақ тәйярлиқ хизмәтлириниң ишлиниватқанлиқини соридуқ. Көпинчә хадимлар, өзлириниң намәлум телефонларни қобул қилмаслиқ, соралған соалларға йоқуриниң рухситисиз җавап бәрмәслик һәққидә агаһландурулғанлиқини баян қилиш арқилиқ, даириләрниң “дөләт мәхпийәтлики йошуруш” тоғрилиқ мәхсус орунлаштуруш елип барғанлиқини ашкарилиди.

Йәркән наһийәсиниң мәзкур син тәшвиқат һөҗҗитидин мәлум болушичә, аһалиләр “дөләт мәхпийәтлики” ни еғизға алмаслиқ, соримаслиқ, көрмәслик вә талаш-тартиш қилмаслиқ һәққидә хәвәрләндүрүлүпла қалмай, бәлки йәнә тәшвиқатчиларниң әнсиз буйруқ тәләппузлирида сөзлигән тәһдит характерлиқ сөзлири арқилиқ қорқутулған вә җәмийәттә вәһимә пәйда қилишқа тиришилған. Йәркәнниң дөңбағ йезисидин телефонимизни қобул қилған бир сақчи хадими, өзиниң соаллиримизға җавап бериштин әндишә қиливатқанлиқини билдүрсә, учтурпандики бир аманлиқ хадимиму охшаш шәкилдики әндишини тилға алди.

Лагер шаһиди зумрәт давутниң баян қилишичә, уйғур районида аталмиш “дөләт мәхпийәтлики” ни сир тутуш һечқачан бош қоюп берилгән әмәс икән. Бу қетим б д т тәкшүрүш гурупписи уйғур районини зиярәт қилидиған болғачқа, мушу зиярәт мәзгилидә аһалиләрниң еғизидин бирәр “мәхпийәтлик” ниң тәкшүрүш өмикигә яки җәмийәткә вә вә яки хәлқарға ашкарилинип кәтмәслик үчүн аһалиләр қайтидин бир сәгәкләштүрүлгән.

Илгирики ениқлашлиримиздин мәлум болушичә, 2009‏-йилдин кейин районда елип берилған тутқунларда, “дөләт мәхпийәтликини ашкарилаш” муһим баһаниләрдин бири болған. Ениқлишимизчә, бу аталмиш “җинайәт” ни садир қилғанлар 7 йилдин төвән кесилгән әмәс.

2017‏-Йилдики чоң тутқундин кейин, “дөләт мәхпийәтлики” ни ашкарилиғанларла әмәс, һәттә көрүп-билип қалғанларму җазаланған. Зумрәт давутниң баян қилишичә, нөвәттә аһалиләр “дөләт мәхпийәтлики” ни ашкарилашниң қандақ бир ақивәт елип келидиғанлиқини яхши билидикән вә бу җәһәттә һәддидин ташқири сәзгүрлүккә игә икән. Шундақ туруқлуқ, даириләр бу хил тәшвиқатни давамлаштурушни йәнила зөрүр дәп қариған. Зумрәт давутниң пәрәз қилишичә, бу зөрүрийәтни хитай даириләргә б д т тәкшүрүш гурупписиниң болғуси зиярити һес қилдурған болуши мумкин икән.

Телефонимизни қобул қилған хадимлардин бириму “дөләт мәхпийәтлики” ни сақлаш һәққидики агаһландурушларниң чәт әлдин келидиған бир тәкшүрүш гурупписи билән алақидар икәнликини тилға алди.

Телефон зиярәтлиримиздин ашкарилинишичә, даириләр б д т тәкшүрүш өмики районда тәкшүрүш елип бериватқан мәзгилидә вә униң алдида чәт әл мухбирлириниң районға телефон қилип учур елишиниңму алдини елишқа тиришмақтикән. Шуңа асасий қаталмдики кадир-сақчилар вә һәтта аһалиләр, номури нөлдин башланған, йәни дөләт сиртидин кәлгән телефонни алмаслиқ һәққидә алаһидә агаһландурулған.

Мәлум болушичә, асасий қатламларға “дөләт мәхпийәтликини сақлаштики 10 ни қилмаслиқ” намида бир уқтурушму тарқтилған. Америкадики сиясий көзәткүчи илшат һәсән әпәндиниң баян қилишичә, әслидә бир дөләтниң мәхпийәтлики, шу дөләтни идарә қиливатқан йоқири қатламдики кишиләр яки органлар тәрипидинла билиниши керәк, икән. Әгәр хитай һөкүмити уйғур райониниң йеза-қишлақлиридики аһалиләрниму аталмиш “дөләт мәхпийәтлики” ни ашкарилимаслиққа үндәватқан болса, бу йәрдә йошуруливатқини мәхпийәтлик әмәс, бәлки дөләтниң барлиқ сиясәт вә иҗраатлири-йәни “уйғур қирғинчлиқи” дин башқа нәрсә әмәс икән. Илшат һәсән әпәнди, хитай даирилириниң уйғур елидики аһалиләрни қорқутуш вә җәмийәттә вәһимә пәйда қилиш йоли билән б д т тәкшүрүш гурупписини алдап йолға селишқа тутуш қиливатқанлиқини илгири сүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт