Xitay da'iriliri Uyghur rayonida “Dölet mexpiyetlikini ashkarilimasliq” heqqide tehditlik teshwiqat élip barmaqta

Muxbirimiz shöhret hoshur
2022-04-28
Share
Xitay da'iriliri Uyghur rayonida “Dölet mexpiyetlikini ashkarilimasliq” heqqide tehditlik teshwiqat élip barmaqta Xitay da'iriliri b d t kishilik hoquq aliy komissari mishél bachélét(Michelle Bachelet) ning ziyariti aldida, Uyghur rayonida “Dölet mexpiyetlikini saqlashta 10 ni qilmasliq” namliq teshwiqat pa'aliyiti élip barmaqta. 2022-Yili aprél.
Social Media

Ijtima'iy taratqulardiki bir uchurdin melum bolushiche, xitay da'iriliri b d t kishilik hoquq aliy komissari mishél bachélétning ziyariti aldida, Uyghur rayonida “Dölet mexpiyetlikini saqlashta 10 ni qilmasliq” namliq teshwiqat pa'aliyiti élip barmaqtiken. Muxbirimizning téléfon ziyaretliri dawamida, mushu xil namdiki bir uqturushning buningdin ikki ay awwal tarqitilghanliqi ashkarilandi. Uyghur közetküchiler, xitayning b d t ewetmekchi bolghan kishilik hoquq tekshürüsh guruppisidin heqiqiy ehwalni yoshurush üchün ahalilerge tehdit séliwatqanliqini ilgri sürmekte.

Ijtima'iy taratqulardin melum bolushiche, yerken nahiyelik partkom yéqinda “Dölet mexpiyetlikini saqlashtiki 10 ni qilmasliq” dégen namda bir teshwiqat pa'aliyiti élip barghan. Mezkur pa'aliyet sin kürünüshlük shekilde élip bérilip, 10 neper ayal teshwiqatchi “10 Ni qilmasliq” ning konkirét mezmunlirini bir bir-birlep oqup chiqqan. Sin körünüshidiki bayanlardin melum bolushiche, mezkur teshwiqat pa'aliyitide peqet ilgiri yolgha qoyulup kéliwatqan “Dölet mexpiyetlikni saqlash” ning tedbirliri téximu konkirétlashturup, ahaliler rayonning heqiqiy ehwalini ashkarilap qoymasliq heqqide jiddiy shekilde agahlandurulghan.

Biz Uyghur rayonining herqaysi jaylirigha téléfon qilip, b d t tekshürüsh gurupisi yétip kélish harpisida qandaq teyyarliq xizmetlirining ishliniwatqanliqini soriduq. Köpinche xadimlar, özlirining namelum téléfonlarni qobul qilmasliq, soralghan so'allargha yoqurining ruxsitisiz jawap bermeslik heqqide agahlandurulghanliqini bayan qilish arqiliq, da'irilerning “Dölet mexpiyetliki yoshurush” toghriliq mexsus orunlashturush élip barghanliqini ashkarilidi.

Yerken nahiyesining mezkur sin teshwiqat höjjitidin melum bolushiche, ahaliler “Dölet mexpiyetliki” ni éghizgha almasliq, sorimasliq, körmeslik we talash-tartish qilmasliq heqqide xewerlendürülüpla qalmay, belki yene teshwiqatchilarning ensiz buyruq teleppuzlirida sözligen tehdit xaraktérliq sözliri arqiliq qorqutulghan we jem'iyette wehime peyda qilishqa tirishilghan. Yerkenning döngbagh yézisidin téléfonimizni qobul qilghan bir saqchi xadimi, özining so'allirimizgha jawap bérishtin endishe qiliwatqanliqini bildürse, uchturpandiki bir amanliq xadimimu oxshash shekildiki endishini tilgha aldi.

Lagér shahidi zumret dawutning bayan qilishiche, Uyghur rayonida atalmish “Dölet mexpiyetliki” ni sir tutush héchqachan bosh qoyup bérilgen emes iken. Bu qétim b d t tekshürüsh guruppisi Uyghur rayonini ziyaret qilidighan bolghachqa, mushu ziyaret mezgilide ahalilerning éghizidin birer “Mexpiyetlik” ning tekshürüsh ömikige yaki jem'iyetke we we yaki xelq'argha ashkarilinip ketmeslik üchün ahalil'er qaytidin bir segekleshtürülgen.

Ilgiriki éniqlashlirimizdin melum bolushiche, 2009‏-yildin kéyin rayonda élip bérilghan tutqunlarda, “Dölet mexpiyetlikini ashkarilash” muhim bahanilerdin biri bolghan. Éniqlishimizche, bu atalmish “Jinayet” ni sadir qilghanlar 7 yildin töwen késilgen emes.

2017‏-Yildiki chong tutqundin kéyin, “Dölet mexpiyetliki” ni ashkarilighanlarla emes, hette körüp-bilip qalghanlarmu jazalan'ghan. Zumret dawutning bayan qilishiche, nöwette ahaliler “Dölet mexpiyetliki” ni ashkarilashning qandaq bir aqiwet élip kélidighanliqini yaxshi bilidiken we bu jehette heddidin tashqiri sezgürlükke ige iken. Shundaq turuqluq, da'iriler bu xil teshwiqatni dawamlashturushni yenila zörür dep qarighan. Zumret dawutning perez qilishiche, bu zörüriyetni xitay da'irilerge b d t tekshürüsh guruppisining bolghusi ziyariti hés qildurghan bolushi mumkin iken.

Téléfonimizni qobul qilghan xadimlardin birimu “Dölet mexpiyetliki” ni saqlash heqqidiki agahlandurushlarning chet eldin kélidighan bir tekshürüsh guruppisi bilen alaqidar ikenlikini tilgha aldi.

Téléfon ziyaretlirimizdin ashkarilinishiche, da'iriler b d t tekshürüsh ömiki rayonda tekshürüsh élip bériwatqan mezgilide we uning aldida chet el muxbirlirining rayon'gha téléfon qilip uchur élishiningmu aldini élishqa tirishmaqtiken. Shunga asasiy qatalmdiki kadir-saqchilar we hetta ahaliler, nomuri nöldin bashlan'ghan, yeni dölet sirtidin kelgen téléfonni almasliq heqqide alahide agahlandurulghan.

Melum bolushiche, asasiy qatlamlargha “Dölet mexpiyetlikini saqlashtiki 10 ni qilmasliq” namida bir uqturushmu tarqtilghan. Amérikadiki siyasiy közetküchi ilshat hesen ependining bayan qilishiche, eslide bir döletning mexpiyetliki, shu döletni idare qiliwatqan yoqiri qatlamdiki kishiler yaki organlar teripidinla bilinishi kérek, iken. Eger xitay hökümiti Uyghur rayonining yéza-qishlaqliridiki ahalilernimu atalmish “Dölet mexpiyetliki” ni ashkarilimasliqqa ündewatqan bolsa, bu yerde yoshuruliwatqini mexpiyetlik emes, belki döletning barliq siyaset we ijra'atliri-yeni “Uyghur qirghinchliqi” din bashqa nerse emes iken. Ilshat hesen ependi, xitay da'irilirining Uyghur élidiki ahalilerni qorqutush we jem'iyette wehime peyda qilish yoli bilen b d t tekshürüsh guruppisini aldap yolgha sélishqa tutush qiliwatqanliqini ilgiri sürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet