Parizh, londun, bérlindimu béyjing olimpik musabiqisigha qarshi namayish ötküzüldi

Ixtiyariy muxbirimiz ekrem
2021-06-24
Share
Parizh, londun, bérlindimu béyjing olimpik musabiqisigha qarshi namayish ötküzüldi "Xelq'ara olimpik küni" munasiwiti bilen béyjing olimpik musabiqisige qarshi ötküzülgen namayishtin körünüsh. 2021-Yili 23-iyun, bérlin, gérmaniye.
RFA/Ekrem

23-Iyun "Xelq'ara olimpik küni" munasiwiti bilen yawropadiki köpligen döletlerde béyjing olimpik musabiqisige qarshi namayish ötküzüldi.

D u q ning teshebbusi bilen "Xelq'ara olimpik küni" bolghan 6-ayning 23-küni köpligen döletlerde 2022-yilliq béyjing qishliq olimpik musabiqisigha qarshi namayish ötküzüldi. Bu küni shiwétsariyening lozan shehridiki xelq'ara olimpik komitétining merkizi binasi aldida zor kölemlik namayish ötküzülgendin tashqiri, yawropadiki birqisim chong sheherlerdimu "Irqiy qirghinchiliq olimpikini bayqut qilayli" dégen shu'ar astida namayishlar élip bérildi.

Fransiye Uyghur birliki teshkilati teminligen uchurlargha qarighanda, 23-iyun parizhdiki meshhur bastiliye meydanida Uyghurlar, tibetlikler we bashqa kishilik hoquq teshkilatliri birlikte xitaygha qarshi namayish élip barghan.

Mezkur teshkilatning re'isi alim ömer ependi ziyaritimizni qobul qilghanda, parizhdiki bu namayishqa 10 din artuq teshkilatning ezalirining ishtirak qilghanliqini tilgha aldi. Bu teshkilatning maliye mes'uli sühbi ependimu parizhdiki namayishqa Uyghurlar we tibetlerni qollaydighan yerlik ahalilerningmu qatnashqanliqini eskertti. Fransiye Uyghur birliki teshkilatining qurghuchi ezasi we sabiq re'isi ekber yüsüp ependi bolsa bu qétimqi namayishning xitaygha qarshi ghezep--nepretke tolghan bir namayish bolghanliqini bayan qildi.

23-Iyun en'giliye paytexti londun shehridimu 2022-yilliq béyjing qishliq olimpik musabiqisigha qarshi birleshme namayish élip bérilghan. D u q londun ishxanisining mudiri rehime mexmut xanimning bildürüshiche, bu namayishqa Uyghurlar, tibetler we bir qisim kishilik hoquq teshkilatlirining ezaliri qatniship, xitayning kishilik hoquq depsendichiliklirini, Uyghurlar üstidin yürgüziwatqan irqiy qirghinchiliqlirini qattiq eyibligen.

Gérmaniye paytexti bérlin shehridimu 23-iyun birleshme namayish bolup ötken. D u q bérlin ishxanisining mudiri gheyur qurban ependi bu heqte toxtalghanda, bérlindiki bu namayishning nahayiti tesirlik, janliq élip bérilghanliqini tekitlidi.

D u q rehberlirining bildürüshiche, "Xelq'ara olimpik küni" bolghan 6-ayning 23-küni d u q ning teshebbusigha bina'en dunyaning herqaysi elliridiki 40 tin artuq dölette birla künde 2022-yilliq béyjing qishliq olimpik musabiqisigha qarshi birleshme namayish uyushturulghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet