Xitay diniy erkinlik barliqini bazargha séliwatqan Uyghur rayonida din'gha ishenmeslik teshwiqatining hélihem dawam qiliwatqanliqi ashkarilandi

Muxbirimiz shöhret hoshur
2021.01.28
Xitay diniy erkinlik barliqini bazargha séliwatqan Uyghur rayonida din'gha ishenmeslik teshwiqatining hélihem dawam qiliwatqanliqi ashkarilandi Uyghur diyaridiki munarliri bilen hilal ayliri chéqiwétilgen bir meschitning esli we hazirqi haliti.
Social Media

Xitayning bir heptidin buyan dawam qiliwatqan amérikaning xitayning Uyghurlargha “Qirghinchiliqi” yürgüzgenliki heqqidiki bayanatigha qarshi teshwiqatlirida Uyghurlarning diniy heq-hoquqlirining toluq kapaletke ige ikenlikini nuqtiliq tekitlenmekte. Muxbirimizning éniqlashliri dawamida, xuddi ilgirikige oxshashla, Uyghur rayonida “Din'gha ishenmeslik we dinni inkar qilish” teshwiqatining hélihem dawam qiliwatqanliqi ashkarilandi. Ilgiriki éniqlashlirimizda korlida qur'an we jaynamazlarning toluq yighiwélin'ghanliqi delillen'gen idi, bügünki éniqlishimizda, turpan chatqalda birla meschit qalghanliqi we uningmu kentning yighin zaligha aylandurulghanliqi delillendi. Töwende muxbirimiz shöhret hoshurning bu heqte teyyarlan'ghan programmisi diqqitinglarda bolidu.

Xitayning amérikagha qarshi teshwiqatida, amérikaning xitay yürgüzüwatqan “Uyghur qirghinchiliqi” heqqidiki bayanatini inkar qilish üchün, Uyghur rayonida diniy weziyetning normalliqi, Uyghurlarning diniy heq-hoquqlirining toluq kapaletke ige ikenliki tekitligen. Emma radiyomizgha kelgen 27-yanwardiki bir inkasta 2016‏-yildin buyan Uyghur rayonida meschitler keng-kölemde chéqilip, diniy zatlar asasen dégüdek türmilerge tashlinip bolghandin kéyin, lagér ichi-sirtida din'gha ishenmeslik we dinni inkar qilish terbiyesi élip bérilghanliqi hem bu terbiyening hélihem dawam qiliwatqanliqi qeyt qilin'ghan. Téléfonimizni qobul qilghan saqchi xadimliri bu teshwiqatning hélihem dawam qiliwatqanliqini delillidi. “Shinjang téléwiziyesi” ning yene bir xewiridimu, da'irilerning diniy étiqadqa yüksek derijide hörmet qiliwatqanliqi tilgha élin'ghan. Emma 2017 ‏-yili torlarda tarqalghan korligha a'it bir hökümet uqturushida, ahalilerdin qolliridiki qur'ani kérim we jaynamazlarni derhal hökümetke tapshurush telep qilin'ghanidi. Eyni chaghda korligha qarita élip barghan éniqlashlirimiz dawamida, korla qarayulghundiki bir saqchi xadimi, öz tewelikide qur'an we jaynamazlarning teltöküs yighilip bolun'ghanliqini delilligen. “Shinjang téléwiziyesi” ning mezkur xewiride, Uyghur rayonida tertiplik diniy pa'aliyetlerge yol qoyuluwatqanliqi bayan qilin'ghan. 27-Yanwar küni turpanning chatqal yézisigha qarita élip barghan téléfon ziyaretlirimiz dawamida, bir kent saqchisi, özi mes'ul kenttiki 9 meschitning 8 i chéqilghanliqi we birsiningla aman qalghanliqi, buningmu peqet méyit yuyush üchün saqlap qélin'ghanliqi we kentte échilidighan partiye yachéyka yighinlirining mushu meschitte échiliwatqanliqini ashkarilidi.

Hörmetlik radi'o anglighuchilar, yuqirida, xitayning amérikigha qarshi bayanatida otturigha qoyghan diniy erkinlik teshwiqati bilen Uyghur rayonining nöwettiki diniy weziyiti arisidiki bir qisim sélishturma uchurlarni diqqitinglargha sunduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.