Хотәндә помпейоға қарши баянат бәргән диний затниң йезисида 70% диний затниң тутқунда икәнлики ашкариланди

Мухбиримиз шөһрәт һошур
2021.01.29
Хотәндә помпейоға қарши баянат бәргән диний затниң йезисида 70% диний затниң тутқунда икәнлики ашкариланди “шинҗаң ислам институти” ниң мудири абдурәқип тумунияз.
Social Media

Қарақашлиқ муһаҗирлардин бири бүгүн радийомизға учур йоллап, хитай ахбаратида помпейоға қарши баянат елан қилған вә өзини хотән шәһиридики бир мәсчитниң имами дәп тонуштурған һәбибулла абдуреһимниң әслидә қарақашниң ява йезисидики бир кәнт секритари икәнлики, у хизмәт қилған ява йезисидики диний затларниң һәммисиниң дегүдәк тутқунда икәнликини мәлум қилди. Мухбиримизниң буниңға асасән ениқлши давамида ява йезисида 70 пирсәнт диний затниң түрмидә икәнлики, булардин 30 яшлар чамисидики һәбибулла меҗит исимлик вәзиписиз диний зат 7 йиллиқ кесиветилгәнлики дәлилләнди.


Хитай ахбарати даириләрниң орунлаштуруши бойичә уйғурлар ичидики һәр саһә кишиләрни америкаға қарши гәп қилдурушни давамлаштурмақта. Мана бу видейода сөзләватқан һәбибулла абдуреһим дегән киши өзиниң хотән шәһиридики бир мәсчитниң хатипи икәнликини илгири сүргән. Бүгүн муһаҗирәттики қарақашлиқлардин бири радийомизға елхәт арқилиқ учур йоллап, өзиниң мәзкур тәшвиқатчини тонуйдиғанлиқи, униң әслидә қарақашниң ява йезисидики бир кәнт секритари икәнликини мәлум қилди. Инкаста бу бу кишиниң2017 ‏-йили лагер тутқуни башланғанда, актиплиқ билән хизмәт қилип өз кәнтидики 4 нәпәр диний затни сақчиханиға тапшуруп бәргәнлики тилға елинған. Әмма һәбибулла абдуреһим баянатида, хотәндики диний сиясәтниң адиллиқи вә кәңрилики һәққидә алқиш яғдурған.

Радийомизға кәлгән инкаста әмәлийәттә һәбибулла абдуреһим хизмәт қилған ява йезисида нөвәттә мутләқ көп сандики диний затларниң түрмә вә лагерда икәнлики тилға елинған. Ениқлашлиримиз давамида һәбибулла абдуреһимниң әслидә кәнт секритари икәнлики дәлилләнмиди, әмма у хизмәт қилған йезида 70 пирсәнттин артуқ диний затниң нөвәттә түрмидә икәнлики дәлилләнди. Һәбибулла абдуреһим йәнә хитайниң диний сияситиниң парлақлиқи сәвәбидин өзи хатиплиқ қиливатқан мәсчит қурулушиниң йеңилинип, мустәһкәмләнгәнлики вә көркәмләштүрүлгәнликини тилға алған. Әмма илгри қәшқәр тоққузаққа қарита елип барған телефон зиярәтлиримиз давамида, тоққузақта2016 ‏-йилниң өзидила 80 пирсәнт мәсчитниң чеқилип болғанлиқи бир кәнт сақчиси тәрипидин ашкариланған иди.

Һәбибулла абдуреһим диний сиясәтниң парлақлиқи һәққидә мәдһийә оқуған уйғур райониниң атуш шәһиридики бир кәнттә бирму мәсчит қалмиғанлиқи ашкариланған болса, қәшқәр пахтәкли йезисида бирму диний затниң сиртта әмәслики, һәммисиниңла лагер вә түрмидә икәнлики дәлилләнгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.