Xotende pompéyogha qarshi bayanat bergen diniy zatning yézisida 70% diniy zatning tutqunda ikenliki ashkarilandi

Muxbirimiz shöhret hoshur
2021-01-29
Share
Xotende pompéyogha qarshi bayanat bergen diniy zatning yézisida 70% diniy zatning tutqunda ikenliki ashkarilandi "Shinjang islam instituti" ning mudiri abdureqip tumuniyaz.
Social Media

Qaraqashliq muhajirlardin biri bügün radiyomizgha uchur yollap, xitay axbaratida pompéyogha qarshi bayanat élan qilghan we özini xoten shehiridiki bir meschitning imami dep tonushturghan hebibulla abduréhimning eslide qaraqashning yawa yézisidiki bir kent sékritari ikenliki, u xizmet qilghan yawa yézisidiki diniy zatlarning hemmisining dégüdek tutqunda ikenlikini melum qildi. Muxbirimizning buninggha asasen éniqlshi dawamida yawa yézisida 70 pirsent diniy zatning türmide ikenliki, bulardin 30 yashlar chamisidiki hebibulla méjit isimlik wezipisiz diniy zat 7 yilliq késiwétilgenliki delillendi.


Xitay axbarati da'irilerning orunlashturushi boyiche Uyghurlar ichidiki her sahe kishilerni amérikagha qarshi gep qildurushni dawamlashturmaqta. Mana bu widéyoda sözlewatqan hebibulla abduréhim dégen kishi özining xoten shehiridiki bir meschitning xatipi ikenlikini ilgiri sürgen. Bügün muhajirettiki qaraqashliqlardin biri radiyomizgha élxet arqiliq uchur yollap, özining mezkur teshwiqatchini tonuydighanliqi, uning eslide qaraqashning yawa yézisidiki bir kent sékritari ikenlikini melum qildi. Inkasta bu bu kishining2017 ‏-yili lagér tutquni bashlan'ghanda, aktipliq bilen xizmet qilip öz kentidiki 4 neper diniy zatni saqchixanigha tapshurup bergenliki tilgha élin'ghan. Emma hebibulla abduréhim bayanatida, xotendiki diniy siyasetning adilliqi we kengriliki heqqide alqish yaghdurghan.

Radiyomizgha kelgen inkasta emeliyette hebibulla abduréhim xizmet qilghan yawa yézisida nöwette mutleq köp sandiki diniy zatlarning türme we lagérda ikenliki tilgha élin'ghan. Éniqlashlirimiz dawamida hebibulla abduréhimning eslide kent sékritari ikenliki delillenmidi, emma u xizmet qilghan yézida 70 pirsenttin artuq diniy zatning nöwette türmide ikenliki delillendi. Hebibulla abduréhim yene xitayning diniy siyasitining parlaqliqi sewebidin özi xatipliq qiliwatqan meschit qurulushining yéngilinip, mustehkemlen'genliki we körkemleshtürülgenlikini tilgha alghan. Emma ilgri qeshqer toqquzaqqa qarita élip barghan téléfon ziyaretlirimiz dawamida, toqquzaqta2016 ‏-yilning özidila 80 pirsent meschitning chéqilip bolghanliqi bir kent saqchisi teripidin ashkarilan'ghan idi.

Hebibulla abduréhim diniy siyasetning parlaqliqi heqqide medhiye oqughan Uyghur rayonining atush shehiridiki bir kentte birmu meschit qalmighanliqi ashkarilan'ghan bolsa, qeshqer paxtekli yézisida birmu diniy zatning sirtta emesliki, hemmisiningla lagér we türmide ikenliki delillen'gen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet