Анализчилар: “ши җинпиң һөкүмити тәшвиқатқа тайинип өзини сақлашқа урунмақта”

Мухбиримиз меһрибан
2020-03-05
Share
italiye-corona-virus.jpg Қоғдиниш кийими кийгән теббий хадимлар таҗсиман вирусниң гуманлиқ аламәтлири бар шопурлардин әвришкә алмақта. 2020-Йили 1-март, җәнубий корейә.
AP

Нөвәттә хәлқара таратқуларда хитайдин башланған корона вирусидин юқумлинишниң 56 дөләт вә районға кеңәйгәнлики, болупму вирус юқуминиң корейә, италийә қатарлиқ дөләтләрдә еғирлашқанлиқи хәвәр қилинмақта.

Мушундақ бир шараитта 2-айниң ахиридин башлап хитай һөкүмәт таратқулири хитай һөкүмитиниң хитайдики корона вируси юқумини үнүмлүк контрол қилғанлиқини мәдһийәләйдиған хәвәрләрни бесишқа башлиған. Шуниң билән бир вақитта йәнә хитай таратқулири башқа дөләтләрниң вирус юқуминиң алдини елиш тәдбирлириниң йетәрлик болмиғанлиқини тәнқид қилидиған хәвәрләрниму елан қилишқа башлиған.

2-Март күни “ню-йорк вақти гезити” дә “хитай компартийәси тәшвиқатни күчәйтип, пүткүл йәр шарида өзиниң юқумға қарши туруштики йетәкчи образини тиклимәкчи” сәрләвһәлик мақалә елан қилинған иди. Һалбуки, хитайниң “йәр шари вақти гезити” 1-март күни “бир қисим дөләтләрниң вирус юқумиға қарши инкаси аста болмақта” намлиқ мақалә елан қилип, башқа дөләтләрниң вирус юқуминиң алдини елиш әһваллири тәнқид қилинған.

“ню-йорк вақти гезити” дә илгири сүрүлүшичә, “хитай һөкүмити нөвәттә мав зедоң дәвридики иҗтимаий һәрикәт усулини қоллинип, өзидики вирус юқумини контрол қилишқа урунмақтикән.” мәзкур мақалидә йәнә хитайниң бу арқилиқ хитайдики авам хәлқниң һөкүмәткә болған наразилиқини пәсәйтишкә, һакимийәт үстидики компартийәниң образини сақлап қелишқа тиришиватқанлиқи илгири сүрүлгән. Шундақла пүткүл йәр шаридики юқумға қарши күрәштә хитайниң өзини йетәкчи орунға чиқиришқа урунуватқанлиқи баян қилинған.”

Америкадики “пуқралар күчи” тәшкилатиниң башлиқи яң җйәнли әпәнди билән дуня уйғур қурултийи хитай ишлири комитетиниң мудири илшат һәсән әпәндиләр зияритимизни қобул қилип, бу һәқтә өз қарашлирини оттуриға қоюп өтти.

Яң җйәнли мундақ деди: “2020-йилниң чаған мәзгилидә юқири пәллигә чиққан крона вирусидин юқумлиниш ши җинпиң һөкүмитиниң иқтидарсизлиқи вә хәлқ аммисиниң һаяти билән кари болмайдиған һакиммутләқ мустәбит қияпитини ашкарилиди. Хитайда авамниң наразилиқ кәйпиятиму наһайити ениқ ипадиләнди. Хитай һөкүмитиниң мәсулийитини сүрүштә қилиш садасиму интайин күчлүк болди. Мушундақ бир шараитта ши җинпиң өз һөкүмранлиқини сақлап қелиш үчүн һәр хил васитиләрни қолланди. У дөләт ичидә хәлқниң садасини давамлиқ бастурушни күчәйтти, кишиләргә һечқандақ әркинлик бәрмиди. Униңдин башқа өзиниң тәшвиқат қораллирини ишқа селип, аталмиш ‛чоң дөләтниң даһийси‚ болуштәк образини тикләшкә урунди. Хитай коммунист һөкүмитиниң корона вируси юқуми мәзгилидики тәдбирлирини махтап көккә көтүрди. Шу арқилиқ бу һакимийәтниң хитай хәлқи үчүн хизмәт қилидиғанлиқи тәшвиқ қилди һәмдә хитай хәлқиниң бу һакимийәткә болған ишәнчини қолға кәлтүрүшкә урунди.”

Яң җйәнли әпәнди йәнә хитай һөкүмитиниң нөвәттә йәнә корона вирусиниң мәнбәси һәққидики түрлүк гуманий қарашлардин пайдилинип, өзини ақлашқа урунуватқанлиқини билдүрди.

Яң җйәнли мундақ деди: “кишиләр арисида корона вирусиниң хитай һөкүмитиниң бйо-химийәлик қорал тәтқиқати сәвәблик тарқалғанлиқи, йәни вирусниң вухәндики бйо-химийә тәтқиқат мәркизидин тарқалғанлиқи илгири сүрүлмәктә. Хитай һөкүмитиниң бу мәсилидики мәсулийити сүрүштә қилиниватқан бүгүнки шараитта хитай һөкүмити йәнә өзиниң тәшвиқат аппаратлиридин пайдилинип, хәлқиниң диққитини башқа тәрәпкә бурашқа урунмақта. Йәни хитай һөкүмити сәһийә саһәсидики дохтур җоң нәншәннниң ‛вирусниң әсли мәнбәси хитайда әмәс‚ дегән сөзлири арқилиқ диққәтни америкаға қаритишқа, мәсилини мурәккәпләштүрүшкә, вә мәсулийәттин қечишқа урунуватиду, десәкму болиду.”

Яң җйәнли әпәнди хитай һөкүмитиниң бу хил өзини мәдһийәләш, мәсулийәттин қечип башқа дөләтләрни әйибләш тәшвиқатиниң әмәлийәттә хитай һөкүмити үчүн зиянлиқ ақивәт елип келидиғанлиқини билдүрди. яң җйәнлиниң қаришичә хитайниң ялған тәшвиқатини ечип ташлаш арқилиқ ши җинпиң һөкүмитиниң крона вируси юқуминиң дуняға тарқилишида хәлқара җәмийәт алдидики мәсулийитини сүрүштүрүш мумкин икән.

У йәнә мундақ деди: “бу мәсилидә башқа дөләтләрни мәсулийитини ада қилмиди дәп әйибләш, ‛вируш юқуминиң мәнбәсини америка‚ дәп ишарәт қилиш қилмиши әмәлийәттә хитайниң хәлқара мунасивитидики образиға техиму еғир тәһдит елип келиши мумкин. Икки күн илгири мән мушу мәсилә тоғрисида, американиң муавин президенти майк пенскә мәхсус мәктуп йоллидим. Мәктупумда американиң юқумлуқ кесәлләрниң алдини елиш хизмитигә мәсул болған муавин президент пенстин шуни тәләп қилдим: йәни униңдин башқа дөләтләрни вә дуня сәһийә тәшкилати қатарлиқ хәлқара тәшкилатларни һәрикәткә кәлтүрүп, тезликтә бир тәкшүрүш өмики тәшкилләп, крона вирусиниң тарқилиш мәнбәсини ениқлашни тәләп қилдим. Пәқәт униң мәнбәсини тапқандила андин дуня бойичә юқумниң алдини елиш хизмитидә үнүмгә еришкили болиду. Техиму чоң апәтниң алдини алғили болиду. Бу мәсилидә мән хәлқара җәмийәтниң һәрикәткә өтүшини үмид қилимән. Шундила хитай һөкүмитиниң мәсулийәтни башқиларға дөңгәш, диққәт нуқтисини башқа тәрәпкә бураштәк қара нийитини бәрбат қилғили болиду.”

Илшат һәсән әпәнди хитай коммунист һөкүмитиниң мав зедоң дәвридин тартипла өзини мәдһийәләш, дөләт ичидә учурни қамал қилиш, тәшвиқат васитиси арқилиқ башқа дөләтләрни қарилаш, һөкүмәтниң иқтидарсизлиқидин келип чиққан мәсилиләрдә қол астидики әмәлдарларни җазалап мәсулийәттин қутулуштәк тактикиларни қоллинип кәлгәнликини, буларни хитай коммунист һөкүмитиниң дөләтни идарә қилиш әнәниси икәнликини тәкитләп өтти.

Илшат әпәндиниң қаришичә, ши җинпиң һөкүмити бу қетим өзлириниң һакимийәт башқуруш җәһәттики иқтидарсизлиқини техиму ипадә қилған. Шуңа хитай хәлқи вә хәлқарадики образини чүшүрүвалған ши җинпиң һөкүмити нөвәттә өз һакимийитини мәдһийәләйдиған тәшвиқатларни күчәйтишкә, бу арқилиқ өзиниң дөләт ичи вә хәлқарадики образини қайта тикләшкә урунмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт