Хитай һөкүмитиниң чәт әлләрдики бир қисим уйғурларни өз тәшвиқатиға селиши җиддий инкас қозғиди

Мухбиримиз меһрибан
2021-06-21
Share
Хитай һөкүмитиниң чәт әлләрдики бир қисим уйғурларни өз тәшвиқатиға селиши җиддий инкас қозғиди "хитай компартйәсиниң 100 йиллиқини тәбрикләш сәнәт паалийити" гә қатнаштурулуп хитай компартйәсини мәдһийәләйдиған қизил нахша ейтқузулған уйғур өсмүрниң бири. 2021-Йили июн.
Social Media

Хитай коммунист һөкүмити қурулғандин буян, өзиниң тәшвиқат вастилиридин пайдиллинип, дөләт ичидики хәлқниң наразилиқи билән хәлқара җәмийәтниң әйибләшлирини авамдин йошуруп кәлгән иди.

Америка қатарлиқ йәттә дөләт "хитай һөкүмити уйғурларға ерқий қирғинчилиқ қилди" дәп җакарлап, уйғурлар учраватқан "ирқий қирғинчилиқ" та җавабарлиқи бар болған хитай әмәлдарлири, хитай һөкүмәт органлири, шундақла уйғур дияридики мәҗбурий әмгәк билән четишлиқи бар хитай ширкәтлиригә қарита җаза тәдбирлири қоллинилишқа башлиди. Нәтиҗидә хитай һөкүмитиму һәр хил йоллар арқилиқ өзиниң уйғурларға қаратқан "ирқий қирғинчилиқ" сияситини ақлаш тәшвиқатини күчәйтти.

Мәлум болушичә, йеқиндин буян чәт әлләрдики хитайға маһил бир қисим уйғурлар иҗтимаий алақә мунбәрлиридин үндидар, тик-ток, инстигирам қатарлиқларда өз кимлики билән оттуриға чиқип, хитайни мәдһийәләйдиған тәшвиқатларни башлиған.

Бу хил кишиләр өз тәшвиқатида бир тәрәптин хитай һөкүмтиниң уйғурларға қаратқан сияситини мәдһийәләп: "уйғурлар хитайда бәхтлик яшаватиду" дегән тәшвиқатини қилса, йәнә бир тәрәптин хитай дөлитиниң бирлики вә хитай компартийәсигә болған садақитини ипадиләйдиған тәшвиқат паалийәтлиридә болған.

Йеқинда тик-ток торида тарқалған бир син филимидә, нөвәттә корийәдә яшаватқан мәрдан исимлик бир һөсүн түзәш дохтуриниң корийәдә туғулуп әмдила 7 яшқа киргән қизини корийәдики хитай әлчиханиси орунлаштурған "хитай компартйәсиниң 100 йиллиқини тәбрикләш сәнәт паалийити" гә қатнаштурғанлиқи һәмдә хитай компартйәсини мәдһиләйдиған қизил нахша ейтқузғанлиқи ашкариланди.

Корийәдики мәрдан вә униң аилиси һәққидә тарқалған йәнә башқа син көрүнүшлиридә бу аилиниң корийәдики хитай әлчиханиси орунлаштурған паалийәтләргә актиплиқ билән қатнишидиғанлиқи, хитай мухбирлириниң зияритини қобул қилип, өзлириниң хитай дөлитигә болған садақитини ипадилигәнлики көрситилгән. Бу син филимлирида йәнә уларниң корийәдә туғулған икки қизини, хитайниң "җоңхуа бирлики" вә "хитай кимлики" тәрбийәсидә йетилдүрүп, иҗтимаи алақә мунбәрлиридә қизлириниң тили арқилиқ "хитайда уйғурлар бәхтлик яшаватиду" дегән тәшвиқатни елип бериватқанлиқи ашкариланди.

Биз торда ашкариланған бу учурларға асасән нөвәттә корийәдә яшаватқан мәрдан исимлик бу уйғур дохтурға телефон қилдуқ.

Әмма у телефонниң америкадики әркин асия радийосиниң мухбиридин кәлгәнликини билгәндин кейин, өзиниң һәрқандақ зиярәтни қобул қилалмайдиғанлиқини билдүрүп, телефонни үзүвәтти.

Йеқинда тик-токта тарқалған йәнә бир син филимидә норвегийәдә яшайдиған әкбәр исимлик бир уйғурниң хитайда ишләнгән аптомобил вә башқа хитай мәһсулатлирини мәдһийәләп, хитайчә тәшвиқатни базарға салғанлиқи, өзи гәрчә чәт әлдә яшаватқан болсиму, әмма өзини һәр вақит "хитай пуқраси" дәп қарайдиғанлиқи көрситилди.

Униң бу қилмиши чәт әлләрдики уйғурлар тәрипидин иҗтимаи алақә мунбәрлиридә қаттиқ әйибләшкә учриғандин кейин, у йәнә фейсбукта баянат берип, өзини әлвәттә "шәрқий түркистанлиқ уйғур" дәп билидиғанлиқи, әмма вәтәндә қалған уруқ-туғқанлири билән алақә еһтияҗи үчүн хитай тилидики тик-ток торида хитай һөкүмитини мәдһийәләйдиған сөзләрни қилишқа мәҗбур болғанлиқини билдүргән вә уйғурлардин әпу сориған.

Һалбуки, униң әпу соришиға қарита йезилған инкасларда бир қисим уйғурлар униң әһвалини чүшинидиғанлиқини ипадилигән болсиму, әмма зор көпчилик уйғурлар униң бу қилмишини "хитайпәрәслик" вә "икки йүзлимичилик" дәп әйиблигән, шундақла униң бу қилмишини һәргизму қобул қилалмайдиғанлиқини билдүргән.

Уйғур кишилик һоқуқ қурулуши ниң тәтқиқатчиси зубәйрә шәмсидин ханим зияритимизни қобул қилип, чәт әлләрдики аз бир қисим уйғурларниң өзлири демократик дөләтләрдә яшап туруқлуқму, хитай дөлитигә болған садақитини ипадиләштәк қилмишлириниң илгириму көрүлүп келиватқан бир илләт икәнликини билдүрди.

Зубәйрә ханим бу хил кишиләрниң көрсәткән баһаниси һәр хил болсиму, әмма уларниң бу хил қилмиши йәнила миллләт мәнпәәтини сетиш һисабиға өзиниң шәхси мәнпәәтини қандуруш икәнликини тәкитлиди.

Зубәйрә ханим йәнә бу хил хитайға садақәтмән кишиләрниң чәт әлләрдә хитайға қарши елип бериливатқан наразилиқ намайишлириға қатнашмайла қалмастин, һәтта ғәрб демократик дөләтлиридики уйғурларниң әһвалини хитай һөкүмитигә йәткүзүш, хитайға қарши наразилиқ паалийәтлиригә ашкара тосқунлуқ қилиш, уйғур паалийәтчилирини қарилаш қатарлиқ һәркәтләридә болуватқанлиқини билдүрди.

У йеқинда австралийәдики хитай әлчиханиси үчүн ишләйдиған халидә исимлик хитайпәрәс уйғур аялниң уйғурларниң хитайға қарши наразилиқ намайишлирини ашкара тосуш һәркитидә болғанлиқини, германийәдә туруватқан бир уйғур қизниң хитайниң уйғур сияситини ақлап, лагер шаһитлириниң гуваһлиқлирини қарилиғанлиқини мисал тәриқисидә көрситип өтти.

Зубәйрә ханим хитай һөкүмити бу хилдики кишиләрни өзлиригә керәк болғанда азғинә мәнпәәт берип ишләтсиму, әмма дөләт ичидә бир өмүр хитайға садиқ болуп ишлигән уйғурларни тутқун қилип түрмиләргә солиғиниға охшашла, уларға вә уларниң туғқанлириниғиму вақти кәлгәндә һаман қара қолини салидиғанлиқини агаһландуруп өтти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт