Хитайниң "уйғур балилар лагерлири" вә "мәҗбурий әмгәк" ни инкар қилған ахбарат елан қилиш йиғинлири қаттиқ әйибләнди

Мухбиримиз меһрибан
2021-07-19
Share
qaranchuqsiz-balilar-bala-lager.jpg "өсмүрләрни йөләш фонди" хадимлириниң ата-аниси лагерға елип кетилгән балиларниң әһвалини игиләватқан көрүнүши(мунасивәтлик мақалидин елинған). 2018-Йили сентәбир, қәшқәр
childrenshope.org.cn

Уйғур аптоном районлуқ һөкүмәт 7-июлдин 15-июлғичә арқа-арқидин үч мәйдан ахбарат елан қилиш йиғини ечип, лагерлар мәсилисидә өзини ақлашқа урунди.

Даириләр тәрипидин ечилған 47-, 48- вә 50-қетимлиқ ахбарат елан қилиш йиғинлирида, хитай даирилири тәрипидин орунлаштурулған аталмиш аз санлиқ милләт гуваһчилири сәһнигә чиқирилип сөзлитилгән.

Бу аталмиш аз санлиқ милләт гуваһчилири "уйғур аяллири мәҗбурий туғут чәкләш сияситигә учримиди, көп пәрзәнтлик болған уйғурлар балилири билән бирликтә бәхтлик яшаватиду", "шинҗаңда балилар лагерлири мәвҗут әмәс", "ятақлиқ мәктәпләрдики балилар бәхтлик яшаватиду", "шинҗаңда мәҗбурий әмгәк мәвҗут әмәс, аз санлиқ милләт хәлқи саяһәтчилик билән бейидуқ" дегәндәк темиларда доклат беришкә орунлаштурулған.

Аталмиш гуваһчилар йәнә һуҗум нишанини "уйғурлар ирқий қирғинчилиққа учраватиду" дегән қарарни чиқарған америка, канада, әнглийә, голландийә, белгийә, қатарлиқ ғәрб демократик дөләтлиригә қаратқан. Улар бу дөләтләрни хитайниң уйғур сияситигә қара сүркәш билән әйибләп, хитайниң уйғурларға қаратқан сияситини мәдһийәлигән.

Әмма "уйғурларниң ирқий қирғинчилиқ" қа учраватқанлиқи етирап қилинған дөләтләрдики сиясийонлар, уйғуршунас тәтқиқатчилар вә вәзийәт анализчилириниң қаришичә, хитай һөкүмитиниң бундақ сахта тәшвиқатлири вә инкар қилиши, униң уйғурларға қаратқан "инсанийәткә қарши җинайәтлири" вә "ирқий қирғинчилиқи" ни йошуруп қалалмайдикән.

Америка хәлқара диний әркинлик комитетиниң муавин рәиси, худсон институтиниң тәтқиқатчиси адвокат нури түркәл әпәнди "нотре даме диний әркинлик мукапати" ни тапшурувелиш мурасимида сөз қилип, уйғурлар учраватқан ирқий қирғинчилиқниң җиддий мәсилә икәнликини тәкитлигәниди.

Нури түркәл әпәнди сөзидә, уйғур балилириниң балилар лагерлириға елип кетилиши, мәҗбурий туғмас қилинған уйғур аяллири вә мәҗбурий әмгәккә селиниватқан уйғурлар мәсилиси қатарлиқларни алаһидә тилға алған.

Нури түркәл әпәнди сөзидә, ата-анилири тутқун қилинғандин кейин балилар лагерлириға елип кетилгән уйғур балилириниң өзила 800 миңдин ашидиғанлиқи, мәҗбурий туғмас қиливетилгән, әрлири вә балилиридин айриветилгән уйғур аяллириниң хитай завутлирида әрзан әмгәк күчигә айландурулуп, "мәҗбурий әмгәк" кә селиниватқанлиқини билдүргән.

Нури түркәл әпәнди мәзкур мурасимдики сөзидә йәнә уйғурлар учраватқан "ирқий қирғинчилиқ" мәсилисиниң демократийә вә әркинлик қиммәт қаришидики ғәрб демократик дөләт һөкүмәтлири вә әркинликни яқлиғучи барлиқ инсанларниң җиддий көңүл бөлүши керәк болған мәсилә икәнликини тәкитлигән.

Америкадики "уйғур кишилик һоқуқ қурулуши" ниң тәтқиқатчиси зубәйрә шәмшидин ханим зияритимизни қобул қилип, хитай һөкүмитиниң бу хил ахбарат елан қилиш йиғинлири вә мәҗбурий сөзлитилгән аталмиш гуваһчиларниң сөзлириниң пүтүнләй ялғанчилиқ тәшвиқати икәнликини билдүрди.

У, уларниң баянидики "уйғурлар көп пәрзәнтлик болуп, балилири билән бәхтлик яшаватиду", "уйғур районида балилар лагерлири мәвҗут әмәс", "ятақлиқ мәктәпләрдики балилар бәхтлик яшаватиду" дегәндәк ялғанчилиқ тәшвиқатлири билән, хәлқарада елан қилинған "балилар лагерлириға елип кетилгән уйғур пәрзәнтлири" һәққидики доклат-хәвәрләрни селиштуруп өтти.

Зубәйрә ханимниң билдүрүшичә, у 2018-йили мәхсус түркийәгә тәкшүрүшкә барған. У, шу қетимқи тәкшүрүшидә 2016-йилиниң ахиридин башлап, түркүм-түркүмләп тутқун қилинған уйғурларниң йетим қалған балилирини ениқлаш хизмитини елип барғаникән.

Зубәйрә ханим шу қетим еришкән испатлиқ учурлар һәққидә тохталди.

Зубәйрә ханим түркийәдики уйғурлардин вәтәндә 5 балиси қалған қәлбинур ханим қатарлиқларни зиярәт қилип, уларниң балилириниң аталмиш "пәриштиләр йәслиси" намидики "балилар лагерлири" ға елип кетилгән балилири һәққидә мәлумат алғанлиқини билдүрди.

Зубәйрә ханим йәнә германийәлик уйғуршунас адриян зензниң мәҗбурий туғмас қиливетилгән уйғур аяллири вә балилар лагерлириға елип кетилгән 800 миңдин артуқ уйғур балиси һәққидики тәкшүрүш доклатини нәқил алди.

Униң тәкитлишичә, хитай һөкүмити өзи елан қилған һөҗҗәтлик мәлуматларға асасән тәйярланған бу хил тәкшүрүш доклатлири, лагер шаһитлири вә пәрзәнтлиридин айрилған уйғурларниң гуваһлиқлири, ню-йорк вақти, б б с агентлиқи, әркин асия радийоси қатарлиқ хәлқара таратқуларда дәлилләнгән хәвәрләр хитай һөкүмитиниң аталмиш ахбарат елан қилиш йиғинлиридики бу хил ялғанчилиқ тәшвиқатлирини инкар қилидиған әң яхши испатлиқ материял икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт