“милләт” гезити хитай һөкүмитиниң сиясий тәшвиқат еланиға йәр бәрди

Ихтиярий мухбиримиз азиғ
2021-09-14
Share
“милләт” гезити хитай һөкүмитиниң сиясий тәшвиқат еланиға йәр бәрди 13- Сентәбир күни, “миллийәт” гезитиниң 11-бетидә елан қилинған “хитай-шинҗаң етник баравәрлик сияситиниң шаһити вә мәнпәәтләнгүчилири” намидики сиясий тәшвиқат язмиси.
RFA/Azigh

13-Сентәбир күни, “милләт” гезитиниң йеңи саниниң 11-бетидә, “хитай-шинҗаң етник баравәрлик сияситиниң шаһити вә мәнпәәтләнгүчилири” намида бир сиясий тәшвиқат язмиси елан қилинған.

Мәзкур язма хитай һөкүмитигә аит бир елан болуп, “милләт” гезитиниң 11-бити пүтүнләй бу еланға айрилған.

Түркийәдики алақидар бәлгилимиләр бойичә, елан билән хәвәрләрниң пәрқи ениқ болуши шәрт болсиму, лекин хитай әлчиханисиниң бәргән еланлири хәвәргә охшитип лайиһиләнгән. Оқурмәнниң хәвәр бети билән елан бетини пәрқ қилиши қәстән тәсләштүриветилгән болуп, хитай дипломатик органлириниң сиясий тәшвиқат еланлири гезитниң рәсмий хәвәрлиригә охшитип елан қилинған.

Мәзкур еланда хитайниң уйғур елидики сиясәтлири оқурмәнләргә “террорлуққа қарши һәрикәтниң бир парчиси” сүпитидә тонуштурулған болуп, еланда уйғур елидики йәрлик милләтләрниң “бәхт-саадәт ичидә, хушал-хурам яшаватқанлиқи” илгири сүрүлгән.

“җумһурийәт” гезитидә елан қилинған хитайниң қишлиқ олимпик тәнһәрикәт мусабиқиси елани.
“җумһурийәт” гезитидә елан қилинған хитайниң қишлиқ олимпик тәнһәрикәт мусабиқиси елани.

Еланда йәнә, уйғур вә башқа етник гуруппиларниң сиясий, иқтисадий, иҗтимаий вә дини һоқуққа игә икәнлики, һәр милләт хәлқиниң әркинликиниң тамамән қоғдилинидиғанлиқи йезилған.

Хитай һөкүмити йеқинқи вақитлардин буян, түркийәдә елан бериш усули арқилиқ сиясий тәшвиқатлирини қанат яйдуруп кәлмәктә. Буниңдин бурун, “һөрийәт” гезитидә хитай әлчиханисиниң роза һейт байрими тәбрикнамиси, “җумһурийәт” гезитидә қишлиқ олимпик тәнһәрикәт мусабиқиси елани, хитай дипломатлири билән алаһидә зиярәт хатирилири, шинхуа хәвәр агентлиқи тәйярлиған пүтүн сәһипилик еланлар берилгәниди.

Хитай дипломатик органлириниң бу тиришчанлиқи бәзи көзәткүчиләр тәрипидин хитайниң иқтисадий күч арқилиқ түркийә ахбаратиға тәсир көрситиш урунуши дәп қаралмақта. Бәзи мутәхәссисләр болса, хитай һөкүмитиниң пул арқилиқ уйғур елидики сиясәтлирини ақлашқа тиришишини уларниң ахбаратниң қоллишидин мәһрум қалғанлиқиниң испати дәп баһалимақта.

Истанбулдики ибни халдун университетиниң докторанти мәвлан тәңриқут әпәнди зияритимизни қобул қилип, хитай һөкүмитиниң елан арқилиқ сиясий тәшвиқат тарқитишиниң сәвәблири вә тәсири һәққидә көз қарашлирини ортақлашти.

“сәрбәстийәт” гезитниң мухбири, журналист онур әркан зияритимизни қобул қилип, мундақ деди: “түркийә ахбаратида бундин бурунму бу хил еланлар көрүлгәниди. Сабаһ, һөрийәт, җумһурийәт қатарлиқ идеологийәлик позитсийәси мәвҗут ахбарат вастилирида бу хилдики хитай еланлири берилди. Бу қетим еланға еланни бәргән хитай дөләт аппаратиниң исми йезилмиған. Униң үстигә бу елан йәнә хәвәр шәклидә йезилған, диққәт қилмиған оқурмән оңайла бу еланни хәвәр дәп ойлап қалиду. Униң үстигә бир дөләттә болуши керәк болған кишилик һоқуқ, қанун вә әқәллий әркинликни хитай һөкүмити өзиниң ғәлбисидәк көрситип, буни пул билән елан берип, гезиткә бастурған. Мән бу җәһәттин хитайниң сиясий тәшвиқатчилирини интайин ярамсиз дәп қараймән”.

Уйғур сотиниң гуваһлиқлири ғәлибилик аяғлашқан вә дуняниң диққити уйғур мәсилисигә йәнә бир қетим мәркәзләшкән мәзгилдә хитай һөкүмитиниң иқтисадий күчи арқилиқ “қирғинчилиқ” сиясәтлирини ақлимақчи болуши көзәткүчиләр тәрипидин тәшвиқатта мәғлуп болғанлиқиниң ипадиси дәп қаралмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт