Kanadadiki dölet misraliri bayrimida “Uyghur” namida chédir tikilgen

Muxbirimiz gülchéhre
2022.08.04
Share on WhatsApp
Share on WhatsApp
Kanadadiki dölet misraliri bayrimida “Uyghur” namida chédir tikilgen Kanadaning albérta wilayitidiki édmonton shehiride ötküzülgen 49-nöwetlik dölet mirasliri féstiwalida Uyghur chédirining aldida xatire süret. 2022-Yili 1-awghust.
Photo: RFA

Dunya miqyasida korona wirus yuqumining aldini élish yüzisidin ikki yildin buyan dawam qilghan jiddiy halettin kéyin, bu yil yaz nurghun döletlerdiki ammiwi bayram pa'aliyetliri, her türlük féstiwallar qayta janlinishqa bashlidi. Jümlidin türlük medeniyet-sen'et féstiwallar ötküzülüp turidighan kanadadimu bu xil janlinish, albérta wilayitidiki édmonton shehiride ötküzülgen 49-nöwetlik dölet mirasliri féstiwalida öz ipadisini tapqan. Kündilik adem sani 100 mingdin éship ketken bu féstiwalda, bu nöwet Uyghurlar alahide diqqet tartqan.

“Édmonton” zhurnilining 27-iyul sanida, bu féstiwal heqqide élan qilghan tonushturush maqaliside éytilishiche, mezkur féstiwal édmonton shehirining xawrélak baghchisida, 49 yildin buyan her yili 7-ayning axiridin 1-awghustqiche 3 kün dawam qilip kelmekte. Bu köp xil medeniyetlerni tebriklesh féstiwaligha bu yil texminen 80 dölet qatnashqan bolup, Uyghurlar bu féstiwalgha yéngidin qétilghan.

“Édmonton” zhurnilining maqalisida chédirlarda her xil döletlerning milliy yémeklik, milliy kiyim we özlirige xas milliy medeniyet xatire buyumlirining sétilidighanliqi, hemde her qaysi döletlerning milliy naxsha-usul muzikiliri orundilidighan köp menbelik, rengdar bir bayram bolidighanliqi tonushturulghan.

Kanadaning albérta wilayitidiki édmonton shehiride ötküzülgen 49-nöwetlik dölet mirasliri féstiwalida Uyghur chédirining aldida xatire süret. 2022-Yili 1-awghust.

Her qaysi döletlerning milliy medeniyet miraslirini namayende qilish pursiti bérilgen bu miras féstiwali kanadadiki eng köp adem ishtirak qilidighan bayramlarning biri bolup, bu chong féstiwalda her qaysi döletlerning isimliri bilen chédirlar tikilidiken. 66-Nomurluq chédirgha “Uyghur” dégen kök renglik lozunka ésilghan. Lozunkigha aq rengde yézilghan Uyghur dégen sözning ikki teripi bolsa, eyni chaghdiki sherqiy türkistan dölet gérbi nusxisi chüshürülüp bézelgeniken. Uyghurlargha xas bu chédirni 3 künlük bu bayram dawamida ziyaret qilghuchilarning ayighi üzülmigen.

Mezkur féstiéwalda Uyghurlargha ayrim orun bérilishini qolgha keltürgen we bu Uyghur chédirini teyyarlashqa mes'ul bolghan, albérta Uyghur jem'iyitining qurghuchisi mukerrem qurban xanim bu féstiwalining axirqi küni ziyaritimizni qobul qildi. Uning “Teliyimizge bek jiq adem chédirimizni ziyaret qildi. . .” dep bashlighan sözliridin, hayajanlan'ghini bilinip turatti.

Mukerrem qurban xanimning chüshendürüshiche, bu féstiwalda Uyghurlargha orun bérilishi üchün u munasiwetlik organlargha bir yildin buyan yol mangghaniken.

Uning déyishiche, medeniyet féstiwali bolghini üchün gerche siyasiy pa'aliyet élip bérish cheklen'gen bolsimu ular chédir ichige Uyghurlarning kiyim-kéchekliri, doppiliri, medeniyet buyumliri, ta'amlirini qoyghandin sirt yene, bashqilarning Uyghurlarni, Uyghurlar weziyiti chüshinishi üchün Uyghurlar kim? sherqiy türkistan qeyerde? u yerde néme boldi? Uyghurlarning özgiche, tarix-medeniyet örp-adetliri dégendek témilarda teyyarlighan waraqche we kichik qollanmilarni, Uyghurche kitab we Uyghur qirghinchiliqigha da'ir süretlernimu körgezmige qoyghaniken.

Féstiwalgha dangliq Uyghur sérk artisi aygül memet we Uyghur aptonom rayoni naxsha usul ömikining sabiq usulchiliridin gülmire azad, zumret sabit 3 neper kespiy artislar toronto shehiridin kélip, yuqiri sewiyediki sen'et nomurlirini körsetken. Albérta hemde uning etrapidin kelgen Uyghurlar we Uyghur ösmürliri qatarliqlar güzel we shox tétik usullarni körsetken. Uyghurlarning ser xil sen'et nomurliri féstiwalgha qatnashqanlarni mehliya qilghan.

Aygül memet xanim ziyaritimizni qobul qilip, 3 künlük bu féstiwalda künde 3 qétimdin oyun qoyghanliqini, gerche charchighan bolsimu, shunche küp insan'gha Uyghurlarni tonushturush pursiti yaritilghanliqidin we buningda özlirining rolini jari qilduralighanliqidin memnun ikenlikini bildürdi.

Aygül memet kichik pé'illiq bilen: “Sen'etkar bolush süpitimiz bilen, biz millitimiz üchün chong ish qilip bérelmisekmu, özimizning qolidin kélidighan talantimiz we maharitimiz arqiliq Uyghurlarning xitaydin perqliq medeniyetke ige, bir millet ikenlikimizni tonutalighinimizdin xushal” dédi.

Uyghurlarning mezkur féstiwalgha qatnishishida türtkilik rol oynighan mukerrem xanim, buningdin kéyinmu édmonton miras féstiwaligha téximu puxta teyyarliqlar bilen qatnishishni pilanlawatqanliqini we buninggha kanada hemde pütün dunyadiki Uyghurlarning birlikte küch chiqirishi we awaz qétishini arzu qilidighanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.