Америкадики уйғур тәшкилатлири арқа-арқидин хитай хаккерлириниң тор һуҗумиға учриди

Вашингтондин мухбиримиз меһрибан тәйярлиди
2023.11.23
xitay-tor-buzar-xakker-hacker Қизил хаккерлар гурупписиниң бир әзаси ишханисидики компютерда йәр шари тор һуҗуми қиливатқан көрүнүш. 2020-Йили 4-авғуст, доңгуан, гуаңдуң.
AFP

Хитайниң чегра һалқиған тәһдити һәр хил шәкилләрдә давам қиливатқан болуп, бу сәпкә хитай хаккерлириму қетилған. Йеқиндин буян америкадики уйғур тәшкилатлириниң хитай хаккерлириниң тор һуҗумиға учраш әһвали барғанчә еғирлашқан. 11-Айниң 3-күни америкадики “уйғур һәрикити” тәшкилати, хитай хаккерлириниң тор һуҗумиға учрап, тор бекити хитайниң ториға улинип қалғаниди. Уйғурлар һәққидә хәвәр ишләп келиватқан “уйғур агентлиқиму” 17-ноябир хитай хаккерлириниң тор һуҗумиға учрап, тор бекити тақилип қалған.

“уйғур агентлиқи” 21-ноябир әтигән өзиниң фәйсбок һисабатида учур йоллап, хаккерларниң һуҗуми сәвәблик тақилип қалған тор бекитиниң 11-айниң 21-күни әслигә кәлтүрүлгәнликини билдүргән.

“уйғур агентлиқи” ниң мәсули таһир имин әпәнди, 21-ноябир күни радийомизға қилған сөзидә, бу қетимқи тор һуҗумниң “уйғур агентлиқи” ға қилинған илгирики һуҗумларға селиштурғанда күчлүк икәнликини билдүрди. Униң ейтишичә, 17-ноябир кечидә қилинған тор һуҗуми сәвәблик, “уйғур агентлиқи” тор бекитиниң уйғурчә хәвәр қанили пүтүнләй тақилип қалған. Улар мунасивәтлик техник орунлар билән алақилишиш арқилиқ, 21-ноябир күни әтигән тор бекитини әслигә кәлтүргән.

Таһир имин әпәнди йәнә, тор һуҗуминиң хитай хаккерлири тәрипидин қилинғанлиқи ениқланғандин кейин, мунасивәтлик тәдбирләр алғанлиқини, америкадики мунасивәтлик һөкүмәт органлириға доклат қилип, тор бихәтәрлик ширкәтлиридин ярдәм тәләп қилғанлиқини баян қилип өтти.

Бу америкадики уйғур тәшкилатлириниң 11-ай ичидә 2-қетим хаккерларниң тор һуҗумиға учриши болуп, 11-айниң 3-күни америкадики “уйғур һәрикити” тәшкилатиму хитай хаккерлириниң тор һуҗумиға учриғаниди.

“уйғур һәрикити” тәшкилатиниң тәшвиқат вә алақә директори сабрина сохайил ханим зияритимизни қобул қилип, 3-ноябир күни йүз бәргән тор һуҗуми һәққидә мундақ деди: “бизгә болған һуҗум 11-айниң 3-күни кечидә йүз бәрди. Биз шу күни әтигәндә буни байқап, тор бекитимиздә йүз бәргән ишларни тезликтә хатирилидуқ. Уларниң бизгә даир учур алған-алмиғанлиқини билмәймән. Худаға шүкри, тор бекитимиз алдинқи күнила бу һәқтә тәдбир алған иди. У күни тор намимиз хитайниң тор бетигә улинип қалди. Шуңа биз бу һуҗумни хитайниң хаккерлири қилди дәп ойлидуқ.”

Сабрина ханим бу һәқтә йәнә тәпсилий тохтилип мундақ деди: “бизгә қилинған бу һуҗумниң мәнбәси һазирчә ениқ әмәс. Биз әлвәттә хаккерлиқ һуҗуминиң нәдин кәлгәнликини дәлиллишимиз керәк. Әмма тор бекәтниң кейин қайта нишанланғанлиқиға асасән, биз униң хитайниң хаккери икәнликигә ишинимиз. Хаккерлар тор бекитимизгә бир қисим яман ғәрәзлик юмшақ деталларни киргүзди вә тор намимизни оғрилап кәтти”.

Сабрина ханимниң билдүрүшичә, хаккерларниң бу хилдики яман ғәрәзлик тор һуҗумлирида, “уйғур һәрикити” тәшкилатиниң җамаәт арисида тонулған паалийәтчилири һуҗум нишан қилинған икән.

У бу һәқтә мундақ деди: “мениңчә бу бизниң хизмәтчилиримизниң қанчилик актип вә қанчилик аммиви икәнлики билән биваситә мунасивәтлик. Бизниң сабиқ программа директоримиз арслан һидайәт наһайити актип сөзлигүчи болғачқа, шәхсий һуҗумларни даим баштин кәчүргән. Директоримиз рошән аббас болса хаккерларниң даимлиқ һуҗум нишани.”

“уйғур һәрикити” тәшкилатиниң рәиси рошән аббас ханимму зияритимизни қобул қилип, “уйғур һәрикити” тор бекити вә өзиниң бу хилдики тор һуҗумлириға көп қетим учриғанлиқини билдүрди.

“уйғур агентлиқи” ниң мәсули таһир имин әпәндиниң билдүрүшичә, бу хилдики яман ғәрәзлик тор һуҗумлири йеқиндин буян барғанчә күчәйгән. Униң билдүрүшичә, хитай хаккерлири уйғур тәшкилатлириниң тор бекәтлиригила һуҗум қилип қалмастин, долқун әйса, рошән аббасқа охшаш тәшкилат рәислири, тонулған уйғур паалийәтчилири, һәтта тәшкилатларда хизмәт қиливатқан башқа шәхсләрниму һуҗум нишани қилмақта икән.

Таһир имин әпәндиниң билдүрүшичә, “уйғур агентлиқи” да хизмәт қилидиған бирқанчә хадимниң шәхсий учурлири хитай хаккерлири тәрипидин ашкариланғанлиқи үчүн, уларниң вәтәндики уруқ-туғқанлири хитай истихбарат орунлириниң бесимиға учриған, шу сәвәблик улар ишләватқан хизмитидин мәҗбури истепа бәргән.

Юқириқи аваз улинишидин тәпсилатини аңлиғайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.