Бейҗиң даирилири мавзедуң вапат болғанлиқиниң 32 йиллиқини давраң салмиди

9 - Сентәбир күни җуңго коммунист һөкүмитиниң сабиқ алий рәһбири мавзедуң вапатиниң 32 йиллиқ хатирә күни. Һалбуки бейҗиң даирилири бу күнгә интайин төвән кәйпиятта муамилә қилған.
Мухбиримиз гүлчеһрә хәвири
2008-09-09
Share

Америка авази радиосиниң бу һәқтики хәвиридә, мавзедуңға қандақ баһа бериш, коммунист хитай даирилирини биарам қилидиған интайин назук мәсилиниң бири дәп көрситилгән. Хәвәрдә хитайдики бир қисим тор абонтлириниң сөзини нәқил кәлтүрүшичә, мавзедуң вапатиниң 32 йиллиқи мунасивити билән бир тор мулаһизичисиниң" хәлқ мавзедуңни унтумайду" дәп язған темисиму чүшәндүрүш берилмәйла өчүрүветилгән. Шундақла нурғун мулаһизә тор бекәтлиридә охшашла мавзедуң темисидики мулаһизиләр тақалған.

Хитай даирилириниң амминиң әркин пикир қилиш һоқоқиға дәхли тәрз қилидиған бу хил қилмиши тор мулаһизичилириниң нәпритини қозғиған.

Хитай ишчилар һоқуқи паалийәтчиси чән йүәнҗаң америка авази радиосиға бу мәсилә һәққидә " хитай чоң қуруқлуқида мавзедуңни әсләйдиғанлар болған тәқдирдиму улар чоқум езилгән мәзлумлар,бу мәзлумлар болса асасән мавзедуң һөкүмранлиқ дәвридә қул қилинған ишчилар синипи, улар бүгүнки җәмийәтни адаләтсиз дәп қарайду," дегән.

Хоңкоңда чиқидиған ечиветиш журнилида көрситилишичә, хитай даирилири мавзедуң һәққидә һәмдә униң тарихта өткүзгән хаталиқлири һәққидә мулаһизә йүргүзүшни қаттиқ чәклигәндин башқа, хәлқниң мәдәнийәт инқилаби һәмдә оң вә солчилар күрәшлири қатарлиқ темилардиму ашкара пикирлишишини чәкләп кәлмәктә. Һәтта мавзедуңни мәдһилигүчиләрму, хитайниң һазирқи сияситидин нарази болғучилар дәп қаралмақта.

Хитай һөкүмәт учур вастилириму мавзедуң вапатиниң 32 йиллиқ хатириси тоғрисида һечқандақ алаһидә ипадә билдүрмигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт