Қар апити вә соғуқ температура хитай һәм уйғур елини паләч һалға чүшүрүп қойди


2008-02-01
Share

Хитай вә уйғур елидә йеқинқи 22 күндин бери давамлишиватқан мисли көрүлүп бақмиған қар апити вә апәт характерлик соғуқ һава температуриси йәнә давам қилмақта. Йеқинқи 50 йилдин бери мисли көрүлүп бақмиған қар апити хитайниң он нәччә өлкә вә аптоном районида қатнашни паләч һалға чүшүрүп қоюпла қалмай, уйғур елиниң җәнубидики вилайәтләрдә апәт характерлик һава райи килиматини кәлтүрүп чиқарди.

Уйғур или йәрлик мәтбуатлириниң әскәртишичә, уйғур аптоном райони хәлқ ишлар назарити қутқузуш башқармисиниң мәсули исақ, қәшқәр, хотән, ақсу, байинғулин вилайәт ‏- областлириниң еғир апәткә учриғанлиқини, апәткә учриғанларниң 340 миңға йетидиғанлиқини вә бивастә иқтисади зиянниң 158 милйон йүәнгә йетидиғанлиқини елан қилған. Хитайниң тәклимакан чөллүкидики тарим һава райи көзитиш понкити қар апитиниң тәклимакан чөллүкини қаплаш даириси, йеғиш қелинлиқи вә һава райи температурисиниң төвәнлик дәриҗиси қатарлиқлар тарихий рекорт яратқанлиқини, тәклимакан чөллүкидики температуриниң минус 32 градусқа қәдәр чүшкәнликини билдүрди.

Б б с ниң әскәртишичә, һава райи мутәхәссислири 2 - айниң 8 вә 9 - күнлири уйғур или йәнә йеғиш характерлик соғуқ еқимниң һуҗумиға учрайдиғанлиқини билдүргән. Хитайниң өлкилиридә болса вәзийәт техиму начар болуп, хәлқ ишлар министирлиқи җүмә күнигә қәдәр 60 адәмниң апәт түпәйли өлгәнликини елан қилди. Төмүр йол министирлиқиниң әмәлдари җав чүнлейниң әскәртишичә, 25 январдин 31 - январғичә 5 милйон 800 миң йолучи пойиз бекәтлиридә тохтап қалған. Хәлқ ишлар министирлиқи апәт түпәйли келип чиққан иқтисади зиянниң 7 йерим милярд долларға йетидиғанлиқини җакарлиди. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт