Xitay hökümiti, zeherlik süt parashoki mesilisi tüpeylidin xelqining ishenchisini qaytidin qolgha keltürüsh üchün jiddiy heriket bashlighan

Xitay hökümiti, zeherlik balilar süt parashoki mesilisi tüpeylidin hökümetke bolghan ishenchisini yoqatqan xelqining ishenchisini qaytidin qolgha keltürüsh üchün jiddiy heriket bashlighan.
Muxbirimiz ömer qanat
2008.09.20
Share on WhatsApp
Share on WhatsApp

 Senlu markiliq balilar süt parashokida bir xil zeherlik ximiyilik maddining otturigha chiqishi bilen bashlan'ghan krizisning da'irisi künsiri kéngiyip xelqning xitaydiki süt mehsulatlirigha bolghan ishenchisining yoqilishigha we nurghunlighan süt mehsulatlirining yighiwélinishigha seweb bolghan idi.

Xitay sehiye ministirliki xitaydiki pütün ölke we chong sheherlik hökümetlerge 24 sa'et xizmet qilidighan xizmet etretliri qurup xelqining yardem teleplirige waqtida jawap bérish toghrisida jiddiy buyruq chüshürgen.

Xewerlerge qarighanda, jüme küni axshimi xitay dölet kabiniti teripidin chüshürülgen uqturush, doxturxanilarning késellerni pulsiz dawalaydighanliqi qatarliq, hökümet mesilige nahayiti jiddiy qarawatqanliqini we xelqning weziyitige köngül bölüwatqanliqini körsitidighan bir qatar tedbirlerni öz ichige alidiken.

Bu arida xitay metbu'ati we axbarat wasitilirida salametlik sewebidin yighiwélin'ghan yémeklik mehsulatliri élan qilinmaqta.

Amérika birleshme agéntliqining xewer qilishiche, bulghan'ghan yémeklik mehsulatliri mesilisi, béyjing olimpik tenheriket yighinining ötküzülüshi bilen xelqining qollishigha érishidighanliqini ümid qilghan xitay hökümiti üchün chong bir siyasiy mesilige aylanmaqta.

Bu arida xitay süt mehsulatliri krizisi chet'ellerdimu kéngiyiwatqan bolup, bügün malayshiya, sin'gapur, yaponiye qatarliq nurghun döletler xitaydin süt mehsulatliri import qilishini chekligenlikini jakarlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.