Африқа чошқа қизитмиси вируси хитайда җиддий ямрашқа башлиған

Мухбиримиз мәмәтҗан җүмә
2021.08.29
Share on WhatsApp
Share on WhatsApp
Африқа чошқа қизитмиси вируси хитайда җиддий ямрашқа башлиған Хитайниң корона вирусини муәййән дәриҗидә контрол қилғанлиқи илгири сүрүлгән болсиму, әмма чошқа қизитмиси вирусини тизгинләштә мәғлуп болған.
Social Media

Мәлум болушичә, хитайниң корона вирусини муәййән дәриҗидә контрол қилғанлиқи илгири сүрүлгән болсиму, әмма чошқа қизитмиси вирусини тизгинләштә мәғлуп болған. Бу вирус сәвәбидин нөвәттә хитайдики чошқа падилири түркүмләп өлүшкә башлиған.

“иқтисадшунас” ториниң хәвәр қилишичә, 2018-йили башланған чошқа қизитмиси вирусида хитайдики чошқа фермилири еғир зәрбә йәп, хитайниң асаслиқ гөш тәминләш зәнҗири бузғунчилиққа учириған. Нәтиҗидә гөш вә йәм-хәшәк баһасида зор давалғуш пәйда болған.

Хәвәрдә алақидар мәсулларниң ейтқанлиридин нәқил елип көрситишичә, 2019-йили хитайдики чошқа гөшиниң үчтин биридин бәштин биригичә болған нисбити кесәллик яки өлтүрүш сәвәбидин вәйран болған.

Асия тәрәққият банкисиниң доклатиға қариғанда, әйни йили чошқа қизитмиси вируси хитайниң мәзкур саһә санаитигә 50 милярд доллардин 120 милярд долларғичә зиян салған. 2020-Йили әһвал тез әслигә кәлгән болсиму, әмма өткән йилиниң ахирида юқумлиниш йәнә көпийишкә башлиған.

Хәвәргә қариғанда, хитай әмәлдарлири бу йил июлда, 2021-йилиниң бешидин башлап 11 қетим чошқа падилирида юқумлиниш байқалғанлиқи, бу санниң алдинқи йилдикидин икки һәссисигә көп икәнликини ейтқан.

Юқумлиниш нуқтилири кәң тарқалған болуп, бәзилири хитайниң шәрқий шималида болса, бәзилири ғәрбий җәнубида икән. Әмәлдарлар уни контрол қилишниң мурәккәп икәнликини билдүргән.

Чошқа фермиси саһәсидикиләр һөкүмәт вәзийәтни пәрдазлап көрситиватқан болсиму, әмма униң “у контроллуқтин чиқип кәткән” ликини билдүрүшкән. Хитайдики бир қанчә чошқа ферма башқурғучилири һөкүмәт даирилириниң юқумлинишниң пәқәт аз бир қисминила доклат қилиниватқанлиқини ейтқан.

Хәвәрдә көрситишичә, хитайдики чошқа гөшиниң тәхминән 40 пирсәнти кичик аилә деһқанчилиқ мәйданлири тәрипидин ишләпчиқирилидикән. Әгәр деһқанчилиқ мәйданлириға йеқин җайда чошқа қизитмиси юқуми байқалса, хоҗайинлар чошқа падилирида кесәллик аламәтлири көрлиштин бурун маллирини сетиветидикән. Бу вирусниң кәң тарқилишиға ярдәм берип, мал баһасини төвәнлитиветидикән. Нәтиҗидә, нөвәттә тирик чошқиниң баһаси бу йил йилниң бешидикигә қариғанда 60 пирсәнтидин көпрәк төвәнлигән.

Мәлум болушичә, хитай һөкүмити чошқа базириға мунасивәтлик санлиқ мәлуматларни мәхпий тутмақта икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.