Америка сиясийонлири арисида хитайға җаза характерлик инкас қайтуруш садалири күчәйгән

Мухбиримиз җүмә
2020-04-12
Елхәт
Пикир
Share
Принт
Америка кеңәш палатасиниң әзаси марко рубю әпәнди йиғинда сөзлимәктә. 2019-Йили 4-апрел, вашингтон.
Америка кеңәш палатасиниң әзаси марко рубю әпәнди йиғинда сөзлимәктә. 2019-Йили 4-апрел, вашингтон.
REUTERS

Хитайдин тарқалған корона вируси дуняви вабаға айланған мәзгилдә америка сиясийонлири арисида хитайға җаза характерлик инкас қайтуруш садалириниң күчийиватқанлиқи мәлум.

«Нйойорк вақит гезити» ниң хәвәр қилишичә, бу хилдики садалар американиң сәһийә әшялири ишләпчиқиришида хитайға тайинип қелишиға хатимә бериш, хитайда завут қуруған америка санаитини қайтуруп келиш, хитайға қариши һәрбий һазирлиқларни кеңәйтиш қатарлиқларни өз ичидә алидикән. 

Кеңәш палатасиниң җумһурийәтчиләр партийәсидин болған әзаси марко рубийо өткән айда «американиң тәминләш зәнҗирни күчәйтиш вә дөләт хәвпсизлики» намлиқ бир қанун лайиһәсини тонуштурған.

Бу қанун лайиһәсидә сәһийә әшялири ишләпчиқиришида хитайға тайинип қелиш америка дөләт хәвпсизликигә тәһдит елип келидиғанлиқи алаһидә гәвдиләндүрүлгән вә америка сиясийонлири бу вәзийәткә җиддий рәвиштә хатимә беришкә чақирилған. 

Мәзкур қанун лайиһәсини нөвәттә америкидики һәр икки партийә вәкиллири арисида қоллайдиғанлар көпийишкә башлиған. Демократлар партийәсидин 2020-йиллиқ президентлиқ сайлимиға өзини намзатлиқиға көрсәткән елзабет варрен ханим, 2016-йили президентлиқ сайлимида демократлар партийәсидин муавин президент намзати болған тим кәйн қатарлиқлар бу қанун лайиһисини бирликтә тонуштурған нопузлуқ вәкилләрдин икән.

Униңдин башқа, трамп һөкүмити хадимлириму корона вируси вәзийитидин пайдилинип бир қисим америка сәһийә ширкәтлирини дора вә сәһийә әшялири ишләпчиқиришида хитайға тайинип қелишни кемәйтип, америка сәһийә системиға мәбләғ селишқа қистиған. 

Ақсарайниң сода мәслиһәтчиси петир наваро «америка мәһсулатлирини сетивелиш қануни» ни күчәйтип һөкүмәт даирилириниң сәһийә әшялирини башқа әлләрдин сетивелишиға хатимә беришкә чақирған. 

Корона вируси вәһимиси американи җүмлидин пүтүн дуняни қаплиған мәзгилдә, өткән һәптә америка дөләт мудапиә министирлиқи дөләт мәҗлисигә доклат йоллап, хитайға қариши һәрбий һазирлиқларни кеңәйтишкә 20 милярд доллар тәстиқлашни тәләп қилған.

Бу 20 милярд доллар америка «һинди-тинч окян қоманданлиқ штаби» тәрипидин тәләп қилинған. Бу мәбләғ, алдин сигнал бериш радар системиси сетивелиш, әскәр көпәйтиш, башқа иттипақдаш әлләр билән маневир өткүзүш вә истихбарат учурлирини алмаштуруш қатарлиқлар үчүн ишлитилидикән. 

Хәвәргә қариғанда, бу йеңи мәбләғ тәлипи америка билән хитай арисидики һәрбий мунасивәтниң җиддийлишиватқанлиқини көрситидикән.

Корона вируси дуняви вабаға айлиниш һарписида хитайниң сәһийә әшялириниң експорт қилинишини чәклигәнлики, буларниң хитайда завут қуруған америка ширкәтлиригиму қаритилғанлиқи хәвәр қилинған. 

«Нйойорк почтиси гезити» ниң хәвәр қилишичә, өткән һәптә америкидики «M 3» вә «һанеййвел» қатарлиқ чоң типтики сәһийә сақлиқни сақлаш әслиһәлири ширкәтлириниң рәһбәрлири ақсарайға шикайәт қилип, хитайниң январ ейидила мәзкур ширкәтләр хитайда ишләпчиқарған мәһсулатларни експорт қилишқа болмайдиғанлиқи тоғрисида буйруқ чүшүргәнликини ейтқан.

Хитайниң бу қилмиши трамп һөкүмитиниң ғәзипини қозғиған. Улар хитайниң бу қилмишиға қариши қануний һәрикәт қоллинидиғанлиқини билдүргәниди.

Пикирләр (0)
Share
Толуқ бәт