Америкада тәшкилләнгән хитай алаһидә хизмәт гурупписи: америка хитайға кәскин һәрикәт қоллиниши керәк

Мухбиримиз җәвлан
2020-10-02
Share
Kevin-McCarthy-kewin-mekkasi.jpg Америка авам палата әзаси кевин мәккаси (Kevin McCarthy) әпәнди йиғинда сөз қилмақта. 2020-Йили 24-авғуст, шималий чаролина, америка.
REUTERS

Америка фокс телевизийә ториниң хәвәр қилишичә, америка авам палатасидики җумһурийәтчиләрдин тәшкилләнгән хитай алаһидә хизмәт гурупписи 30-сентәбир хитай компартийәсигә тақабил туруш доклати елан қилған болуп, хитай компартийәсиниң әзәлдин тәһдит икәнликини ениқ оттуриға қойған вә «америка хитайға кәскин һәрикәт қоллиниши керәк» дегән.

Бу доклат хитай компартийисиниң қилмишлири үстидин елип берилған нәччә айлиқ тәкшүрүшниң нәтиҗиси болуп, американиң дөләт бихәтәрлики вә кәлгүси тәрәққиятиға тәһдит салған хитай компартийәсиниң рәзил пилани бирму бир көрситилгән, шундақла американиң хитайға қаратқан мәғлубийәтлик кона сиясити вә истратегийәсидин ваз кечиши һәмдә хитайға кәскин һәрикәт қоллиниши тәләп қилинған.

30-Сентәбир өткүзүлгән доклат елан қилиш йиғиниға америка авам палата әзалиридин кевин мәккаси (Kevin McCarthy), майкол мәккаул (Michael McCaul) қатарлиқлар қатнашқан. Кевин мәккаси йиғинда сөзлигән ечилиш нутқида хитай алаһидә хизмәт гурупписиниң бу доклатни тәйярлаш үчүн ишлигән хизмити вә төһписини махтиди, шундақла бу доклатниң хитай тәһдитигә тақабил турушта йетәкчилик рол ойнайдиғанлиқини билдүрди. У сөзидә йәнә бу доклаттики 60 пирсәнт көз қарашниң америкадики һәр икки партийәниң көз қаришиға вәкиллик қилидиғанлиқини, америкадики сиясийонлардин тартип даңлиқ ширкәтниң лидерлириғичә көплигән кишиләрниң қисқичә доклатлиридин мәнбә елинғанлиқини тилға елип өтти. Андин у бу доклаттики тәклипләрни мундақ үч нуқтидин хуласилиди: биринчи, америкалиқларни теббий әслиһә җәһәттинла әмәс, муһим кан мәһсулатлирида өзини өзи тәминлийәләйдиған қилиш; иккинчи, америка дөләт мудапиә министирлиқида йеңилиқ яритиш, йеңи техникиларни тәрәққий қилдуруш арқилиқ хитайни пассип һалға чүшүрүш; үчинчи, америка һөкүмитини заманға лайиқлаштуруш. Бу нуқтида у америка малийә миниситирлиқиниң шималий корейә вә иранғила ембарго йүргүзүп хитай билән кари болмаслиқтәк вәзийәткә хатимә бериш вақтиниң әмди кәлгәнликини тәкитлиди. Ахирида у бу тәклипләрни авам палатасиниңла әмәс, кеңәш палатасиниңму тәклипи дәп қарайдиғанлиқини, бу тәклипләрниң кейинчә хитайға қарши йеңи қанун-сиясәтләрниң түзүлүшигиму түрткә болидиғанлиқини оттуриға қойди.

Майкол мәккаул хитай алаһидә хизмәт гурупписиниң башлиқи болуп, мәзкур доклатниң тәйярлинишиға йетәкчилик қилғаникән. У сөзидә бу доклатни тәйярлашқа күч чиқарған авам палата әзалири вә бу хизмәткә қатнашқан барлиқ әзаларға рәһмитини билдүрди. Андин бу доклатниң америка һазир дуч келиватқан әң чоң тәһдитни очуқ көрситип беридиғанлиқини, американиң хитайға қаратқан сияситиниң икки партийә талишидиған мәсилидин һалқип американиң әң муһим мәсилиси болуп қалғанлиқини алаһидә тәкитлиди. У хитайниң 1996-йилдики америка сайлимиға қол тиққандин башлап һазирғичә америкаға сиңип кириш, америкаиң әқлий мүлкини оғрилаш, америкадин байлиқ вә күч талишиш һәрикитини тохтатмай келиватқанлиқини, хитай йошурған корона вируси дуняға, җүмлидин америкаға апәт болғанға қәдәр американиң бу тәһдитни һес қилалмай кәлгәнликини, хитайниң кәлгүсидиму америкаиң узақ муддәтлик вә әң хәтәрлик дүшмини болидиғанлиқини оттуриға қойди. У мундақ деди: «дадам демәтликләр америкадики соғуқ мунасивәтләр урушини баштин кәчүрди, балам демәтликләр ‹11-сентәбир вәқәси'гә шаһит болди. Бу әвладниң алдидики әң хәтәрлик дүшмән әмди хитай компартийәсидур. Бу әвладму әвлад давамлишидиған күрәш, бу доклат болса әвладму әвлад қалидиған муһим испаттур. У буниңдин кейин америка дөләт мәҗлисигә хели көп йилларғичә йетәкчилик қилиду».

Хәвәрдә билдүрүлүшичә мәзкур доклатта американиң хитай компартийәсиниң тәһдитигә қандақ тақабил туруши мәсилиси муһим нуқта қилинған болуп, хитай компартийәсиниң рәзил қилмишлириға даир 83 түрлүк байқаш вә униңға зәрбә беришкә даир 430 түрлүк сиясий тәклип берилгән. Доклатта мундақ дейилгән: «бу доклат америка дөләт мәҗлиси билән һөкүмәттики икки партийәниң бу бир әвлад америкалиқларниң дөләт вә иқтисад бихәтәрлики дуч кәлгән ғайәт зор тәһдитни йоқитиши үчүн тәйярланған бир һәрикәт пиланидур».

Бу доклатта йәнә тәйвән билән әркин сода келишими түзүш, хитайниң америка карханилириға салған мәблиғини тәкшүрүшни күчәйтиш, хитай компартийәсиниң һәрбий база қурулушиға ярдәм бәргән ширкәтләрниң иқтисад мәнбәсини үзүп ташлаш, хоң коңлуқ пуқраларға панаһлиқ бериш, уйғурларға йүргүзүлүватқан җинайәтниң ирқий қирғинчилиқ яки әмәсликини ениқ бекитиш чақириқ қилинған.

Сиясий көзәтчи илшат һәсән әпәнди бу доклатта оттуриға қоюлған уйғурларға йүргүзүлүватқан ирқий қирғинчилиқни ениқ бекитиш тәлипиниң америка һөкүмитиниң у җинайәтниң характерини бекитишигә түрткә болидиғанлиқини билдүрүп: «әгәр америка у җинайәтниң характерини ирқий қирғинчилиқ дәп бекитсә уйғурларға чоң ярдәм қилған вә үмид беғишлиған болиду» деди. Андин у йәнә американиң бундақ қилишиниң асанға тохтимайдиғанлиқини, чүнки униң мәсулийәт тәләп қилидиған иш икәнликини, буниң үчүн уйғур җамаитиниң, уйғур тәшкилатлириниң техиму тиришчанлиқ көрситиши керәкликини ейтти.

Мәзкур доклатта, өткән бир йилда хитай компартийәсиниң хәлқара келишимгә хилаплиқ қилип хоң коң пуқралириниң әркинликигә дәхли-тәруз қилғанлиқи, уйғур вә тибәтләрни давамлиқ бастурғанлиқи, һәрбий күчини зорайтип қошна әлләрниң игилик һоқуқиға таҗавуз қилғанлиқи, вирус һәққидики учурларни қамал қилип, вабаниң ямришиға сәвәб болғанлиқи қатарлиқ җинайәтләр көрситилгән. Андин иҗраат қисмидики хуласидә мундақ дейилгән: «бу сигналлар хитай компартийәсиниң хәлқара тәртиптики ядролуқ принсипларға қандақ бузғунчилиқ қилғанлиқи, американиң бихәтәрлики вә кәлгүси тәрәққиятини қандақ хәтәрлик һалға чүшүрүп қойғанлиқини ашкарилап бәрди. Хитай компартийәсиниң рәзил пиланиға әмди кәңчилик қилишқа яки униң билән мурәссә қилишқа болмайду. Дуняниң һәр қайси җайлиридики демократийә вә әркинликни қоғдаш үчүн америка өз иттипақдашлири билән һәмкарлишип кәскин һәрикәт қилиши, йетәкчилик һоқуқини қайта қолға кәлтүрүши керәк».

Авам палатасидики 15 җумһурийәтчи әзадин тәшкилләнгән хитай алаһидә хизмәт гурупписи бу йил 5-айда қурулған болуп, хитай компартийәсиниң тәһдитини баһалаш вә униң хәтиригә қандақ тақабил туруш һәққидә һәл қилиш чарилири сунушни нишан қилғаникән. Хитайдин чиққан корона вируси пүтүн дуняға ямриған мәзгилдә бу хизмәт гурупписиниң вәзиписи техиму муһим орунға өткән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.