Mektep xadimi: “Kespiy téxnika mektepliri shirket we zawutlarni téxnika ishchiliri bilen teminleydu!”

Xotendiki melum bir zawutta ishlewatqan Uyghur ishlemchiler.

Xitay xelq'ara bazargha séliwatqan hemde Uyghur diyaridiki shirket-zawutlarda ishliniwatqan erzan bahaliq kiyim-kéchek we bashqa turmush buyumlirining emeliyette irqiy qirghinchiliqqa uchrawatqan Uyghurlarning mejburiy emgiki bedilige kelgenliki ashkarilan'ghandin kéyin, xitay ékisport qilghan mehsulatlar gherb démokratik döletliride qattiq cheklenmekte. Mushundaq bir mezgilde xitay taratqulirida Uyghur diyarida ‛shinjanggha yardem‚ namida yéqinqi 10 yildin buyan köplep quruluwatqan xitay shirket-zawutliri heqqidiki xewerler köpeydi.

Xitay merkizi téléwiziye istansisining 9-ayning 18-künidiki xewiride “Yéqinqi 10 yil ichide ‛shinjanggha yardem‚ qurulushi boyiche, 170 milyard yüen meblegh sélinip, rayonda 15 ming shirketning yerleshtürülgenliki” xewer qilin'ghan. Shuning bilen bille yene “Xitay xewerler tori” ning 9-ayning 18-künidiki xewiride, shangxey shehirining yardimide yeken nahiyeside “Qeshqer tebi'iy pen kespiy téxnika instituti” qurulghanliqi xewer qilin'ghan. Xewerde Uyghur aptonom rayonida bu xildiki kespiy téxnika mekteplirining herqaysi wilayetlerde köplep qurulup, rayondiki shirket-zawutlar üchün kespiy xadimlarni yétildürüsh, rayon iqtisadining yüksilishi we xelqning parawanliqini yaxshilashqa hesse qoshuwatqanliqi medhiyelen'gen.

Undaqta, bunche köp sandiki xitay shirketliri Uyghur rayonida qandaq pursetlerge érishmekte? xitay-shirket zawutlirining emgek küchi menbesi qandaq hel qilinmaqta?

Uyghur rayonidiki kespiy téxnika mektepliri heqqidiki uchurlardin Uyghur diyarida kespiy téxnika mekteplerni tügetken oqughuchilarning mutleq köp qismining Uyghur rayonida yéqinqi mezgillerde qurulghan xitay-shirket zawutlirida ishligendin bashqa, xizmet tonushturush shirketliri arqiliq pütkül xitay miqyasidiki shirket-zawutlarghimu ewetilidighanliqi melum boldi. Tordiki uchurlargha asasen kespiy mektepler we xitay shirketliri otturisida emgek toxtami tüzeydighanliqini élan qilghan béyjingdiki bir shirketke téléfon qilduq. Emma béyjingdin téléfonimizni alghan xitay xadim qeshqerning yeken nahiyeside yéqinda qurulghan “Qeshqer tebi'iy pen kespiy téxnika instituti” ning ularning tizimlikide yoqlighini, Uyghur rayonidiki kespi téxnika mektepliri heqqide shu mekteplerning özige téléfon qilip igileshni bildürüp téléfonni üzüwetti.

Uyghur diyarigha qilghan téléfonlirimiz dawamida, melum bir kespiy téxnika mektipining Uyghur xadimi téléfonimizni élip bu heqtiki bir qisim so'allirimizgha jawab berdi.

Uning bildürüshiche, nöwette Uyghur rayonida nahayiti tézlikte köpiyiwatqan xitay shirketliri Uyghur aptonom rayonidiki munasiwetlik hökümet organlirigha iltimas qilish arqiliq, yerliktiki hökümet da'irilirining yardimi bilen shirket we zawut qurulushi üchün heqsiz yer kölimige érishidiken.

U Uyghur diyarida yerleshken xitay zawut-fabrikilirining deslepki mezgillerde nahiyelik we yéziliq hökümetlerning yardimide yerlik teminligen déhqan ishlemchilirini bir mezgil terbiyelep ishletkenlikini bildürdi.

Emma kéyinche, zawutlarda mejburiy ishlitilgen déhqan ishlemchilirining xitay tili sewiyesi we téxnika jehettiki yétersizlikliri barghanche ashkarilan'ghan. Bu sewebtin Uyghur aptonom rayonidiki herqaysi wilayetlerning hemmiside dégüdek téxnika mektepliri köplep qurulghan. Uning bildürüshiche, nöwette bu mektepler xitay shirketliri we zawutlirini xitay tili sewiyesi yuqiri hemde melum kespiy téxnika maharitige ige zor bir türküm emgek küchliri bilen teminlimekte iken.

Bu xadim yene özi ishlewatqan mekteptila 40 nechche xil kesip barliqini bildürüp, oqughuchilarning yüz pirsent xitay tilida terbiyilinidighanliqini tekitlidi. U yene kespiy mekteplerning her yili qobul qilidighan oqughuchilar sanining nechche minggha yétidighanliqini bildürüp, 2023-yili ularning mektipige qobul qilin'ghan oqughuchilar sanining besh mingdin ashidighanliqini éytti.

Uning bayanliridin melum bolushiche, kespiy téxnika mektepliride oquydighan oqughuchilar ikki yilliq kespiy derslerdin kéyin, zawutlargha bérip bir yil praktika qilidiken. Praktika jeryanida emgek küchlirige éhtiyajliq shirket-zawutlar mektep we oqughuchilar bilen ayrim-ayrim toxtam tüzüp, kéreklik emgek küchlirini qobul qilidiken.

Uningdin oqughuchilarning praktika mezgilidiki we uningdin kéyin xitay shirket zawutlirida ishlewatqan mezgilidiki emgek tüzümini sorighinimizda, u oqughuchilarning kolléktip halda bir tutash bashqurush tüzümide ishleydighanliqini bildürdi.

Bu xadim yene kespiy téxnika mekteplirini tügetken oqughuchilarning nöwettiki ma'ash ölchimining ikki ming yüendin üch ming yüen xelq puli boluwatqanliqini tilgha aldi. Emma u yataq we tamaq pullirini chiqiriwetkende oqughuchilarning qoligha qanchilik pul tégidighanliqini éniq bilmeydiken. Halbuki uning sözliridin melum bolushiche, yéqinqi yillarda Uyghur diyarining jenubida köplep qurulghan xitay zawut-shirketliride ishligen déhqan ishlemchilirining ayliq kirimi kespiy mektep oqughuchiliridin töwen bolghan. Déhqan ishlemchilerning ish heqqi her ayda aran ming yüen xelq puli etrapida bolghini üchün yéziliq hökümet teripidin zawutlargha mejburiy apirilghan Uyghur déhqan ishlemchiliri bu pulgha narazi bolghan bolsimu, emma ular bir a'ilining kündilik turmushini qamdash üchün nahiyelik hökümetning buyruqigha bina'en töwen ish heqqi bilen zawutlarda ishleshke mejbur bolmaqta iken.

Yuqiriqi awaz ulinishidin tepsilatini anglaysiler.