«Хизмәт гурупписи» дики бир хадим: «яшларни милләтләр ара тойлишишқа риғбәтләндүриватимиз»

Мухбиримиз шөһрәт һошур
2020-01-17
Елхәт
Пикир
Share
Принт
Хитайчә кийиндүрүлгән уйғур қизниң хитай билән орунлаштурулған той мурасимидики раһәтсиз вә наразилиқ чирайи.
Хитайчә кийиндүрүлгән уйғур қизниң хитай билән орунлаштурулған той мурасимидики раһәтсиз вә наразилиқ чирайи.
Social Media

Йеқинда аңлиғучилиримиздин бири радийомизға учур йоллап, өткән йилиниң оттурилири қарақаш наһийәсидә бир сестира қизниң бир хитай билән той қилишқа мәҗбурланғанлиқи вә тойниң алдидики учришишта хитай әркәкни тиғлиқ әсвап билән яриландуруп номусини қоғдиғанлиқини мәлум қилған иди. Мухбиримизниң бу һәқтә елип барған ениқлашлири давамида мәзкур вәқәниң йүз бәргән яки бәрмигәнликини дәлилләнмиди, әмма қәшқәрдики бир йезида «хизмәт гурупписи» тәркибидә хизмәт қиливатқан бир хадим өзлириниң күндилик хизмәтлири давамида уйғур яшлирини хитайлар билән той қилишқа ашкарға риғбәтләндүриватқанлиқини ашкарилиди.

Һөрмәтлик радийо аңлиғучилар, йеқинда өзини ашкарилашни халимиған вә хотәнниң қарақаш наһийәсидин икәнликини илгири сүргән бир муһаҗир юртдики тонушлиридин аңлиғанлириға асасән қарақаштики бир уйғур сестира қиз бир хитай кадир билән той қилишқа мәҗбурланғанлиқи вә той қилишниң алдидики учришишта хитай әркәк униңға һессият җәһәттин зораванлиқ қилғанлиқи үчүн тиғлиқ әсваб тиқип яриландурғанлиқини мәлум қилған иди. У йәнә мәзкур кадирниң дохтурханида давалаш үнүм бәрмәй җан үзгәнлики һәққидиму учурлар барлиқини әскәрткән иди.

Телефонимизни қобул қилған сақчи хадимлири қарақашта бундақ бир вәқәниң йүз бәргәнликидин хәвәрсизликини ейтти.

Аңлиғучмизниң баян қилишичә, мәлум бир йезилиқ һөкүмәттә хизмәт қилидиған бир кадир шу йезиға чүшкән «хизмәт гурупписи» арқилиқ бир дохтурханида ишләйдиған уйғур сестира қизға өйлиниш тәклипи сунған. Сестира қиз бу тәклипни ойлишишниму халимайдиғанлиқини билдүргән болсиму, «хизмәт гурупписи» дикиләр дәсләптә муқимлиқ вә милләтләр иттипақлиқи вәзийитини көздә тутушни тәклитләп сестирани ойлишип көрүшкә қистиған. Арқидин өзиниң вә уруқ-туғқанлириниң бихтәрликини ойлишишни әскәртиш арқилиқ сестирға тәһдит салған. Бу сестира қиз мәзкур хитай кадирға өзиниң рәт җавабини бивастә йәткүзмәкчи болған. У хитай кадирниң тәклипни немә үчүн қобул қилмайдиғанлиқини өрп-адәтләр нуқтисидин чүшәндүрүш үчүн бир қетимлиқ учришиш тәлипини қобул қилған. Әмма хитай кадирсистера қизниң бу учришишни қобул қилишни хата чүшинип, учришишта әдәпсиз қилиқларда болған. Хитай әркәк һәддини билмигәндин кейин сестира қиз қолидики намәлум тиғлиқ әсвап билән хитай әркәкни яриландуруп, өзини мудапийә қилған. 

Биз инкастики бәзи йип учлириға асасән бу учурниң тоғра-хаталиқини айдиңлаштуруш үчүн қарақашниң дува йезисиға телефон қилдуқ. Дува йезилиқ әдлийә понкити хадимиму өзиниң бундақ бир вәқәдин хәвәрсизликини баян қилди.
Қәшқәрдики бир йезиниң «хизмәт гурупписи» да вәзипә өтәватқан бир хадим өзлириниң хотәндә әмәс, қәшқәрдиму немә ишларниң болуватқанлиқидин хәвәрсизликини тилға елиш билән бирликтә бундақ бир вәқәниң йүз бериш еһтималлиқини чәткә қақмайдиғанлиқини ишарәтлиди. Униң дейишичә, нөвәттә уйғур районида төвәнгә чүшкән кадирлар «милләтләр иттипақлиқи паалийити» намида уйғур яшлири билән хитай яшлирини өзара учраштуруватқанлиқи вә бу паалийәттә «милләтләр ара той қилишниң пайдилири» һәққидә тәшвиқат елип бериватқанлиқини ашкарилиди. 

Һөрмәтлик радийо аңлиғучилар, юқириқи ениқлашлиримиздин қарақашта бир уйғур сестира қизниң өзигә той қилиш тәклипини сунған вә зораванлиқ қилған хитай кадирни яриланғандурғанлиқи һәққидики учурниң раст яки ялғанлиқи айдиңлашмиди. Әмма қәшқәрдә уйғур яшлириниң хитайлар билән той қилишқа риғбәләндүрүливатқанлиқи дәлилләнди.

Пикирләр (0)
Share
Толуқ бәт