Аваз артиси филим ишлигүчи хурсән һәсәнгә «дөләтни парчилаш җинайити» артилип 15 йил кесилгән

Мухбиримиз меһрибан
2020-09-16
Елхәт
Пикир
Share
Принт
Нурғунлиған уйғур сәрхиллириға охшаш «дөләтни парчилаш» җинайити билән 15 йиллиқ кесилгән аваз артиси вә филим ишлигүчи хурсән һәсән әпәнди. (Вақти вә орни ениқ әмәс)
Нурғунлиған уйғур сәрхиллириға охшаш «дөләтни парчилаш» җинайити билән 15 йиллиқ кесилгән аваз артиси вә филим ишлигүчи хурсән һәсән әпәнди. (Вақти вә орни ениқ әмәс)
Seyyare teminligen

Хурсән һәсән үрүмчи телевизийә истансисиниң аваз артиси вә йеқинқи йилларда ишлигән уйғур тилидики қисқа филимлири билән уйғур аптоном районидики сәнәт саһәсидә тонулған. Әмма хурсән һәсәнму нурғунлиған уйғур сәрхиллириға охшаш аввал тутқун қилинп лагерға қамилиш, кейин җаза һөкүм қилинип, 15 йиллиқ түрмигә қамилиш қисмитигә учриған.

Мәзкур хәвәр хурсән һәсәнниң америкадики сиңлиси сәйярә әркин һәсәннниң гуваһлиқида өткән һәптә иҗтимаий таратқуларда ашкариланди.

2016-Йилдин буян американиң виргинийә штатида яшаватқан сәйярә ханим, 15-сентәбир радийомиз зияритини қобул қилди.

Сәйярә ханимниң билдүрүшичә, 2017-йили йил ахиридин буян униң үрүмчидики аниси қатарлиқ туғқанлири билән болған учур алақиси үзүлүп қалған. 2019-Йилиниң ахири униң өйидикиләр билән алақиси әслигән кәлгәндин кейин, у дәсләптә акиси хурсән һәсәннниң 2018-йили12-айниң бешида үрүмчи тәңритағ районидики өйидин туюқсиз тутқун қилинип, лагерға елип кетилгәнлик хәвирини алған.

Сәйярәниң билдүрүшичә, әйни чағда үрүмчидики аписи телефон арқилиқ униңға 2018-йили акиси хурсән һәсәнниң 12-айниң 6-күни лагерға елип кетилип бир һәптидин кейин, туюқсиз қозғалған тутқақлиқ кесили сәвәблик уйғур аптоном районлуқ 1-дохтурханиға қутқузушқа елип келингәнлик хәвирини алғанлиқини, әмма хурсән һәсән давалиниватқан мәзгилдә қайтидин тутқун қилинип, башқа бир лагерға елип кетилгәндин кейин униң һәққидә һечқандақ учур йоқлуқини ейтқан.

Сәйярәниң билдүрүшичә, у бу хәвәрни аңлиғандин кейин акисиниң әһвали һәққидә гуваһлиқ берип сүрүштүрүш қарариға кәлгән. Әмма үрүмчидики аписи вә башқа туғқанлири гунаһсиз акисиниң пат арида қоюп берилидиғанлиқини тәкитләп, уни әһвални ашкарилаштин тосқан.

Уйғур аптоном район рәиси шөһрәт закирму 2019-йили йил ахири «лагердикиләрниң 90% оқуш түгәтти» дегән баянатни бәргән. Сәйярә вә униң үрүмчидики аписи вә қериндашлири икки йилдин буян из-дерики болмиған хурсән һәсәнниң қоюп берилишини күткән. Әмма 2020-йили 5-сентәбир күни хурсән һәсәнниң үрүмчидики қериндашлириға униң «дөләтни парчилаш җинайити» билән он бәш йил кесилгәнлик хәвири телефон, арқилиқ туюқсиз уқтурулған.

Сәйярәниң билдүрүшичә, униң акиси хурсән һәсән хитай һөкүмити тәрбийиләп йетиштүргән, өз хизмити вә кәспигә садиқ зиялий. Шуңа даириләрниң униңға «дөләтни парчилаш» дегән җинайәтни артип, уни 15 йиллиқ қамаққа һөкүм қилишини әсла қобул қилғили болмайдикән.

Сәйярә тәминлигән учурлардин мәлум болушичә, бу йил 50 яшқа киргән хурсән һәсән 1970-йили туғулған. У 1988-йили үрүмчи шәһәрлик 5-оттура мәктәпни түгәткәндин кейин, «шинҗаң педагогика университети» ниң хитай тили кәспидә оқуған. 1993-Йилдин башлап, үрүмчи телевизийә истансисиниң тәрҗимә филимлар мәркизидә аваз артиси болуп ишлигән.

Хурсән һәсәнниң әһвалини йеқиндин билидиған тонушлиридин һазир американиң вирҗинийә штатида яшайдиған мәдинай бавудун ханимму зияритимизни қобул қилди.

Мәдинай бавудун ханимниң радийомизға билдүрүшичә, у түркийәгә оқушқа чиқиштин илгири, йәни 1993-йилдин 2000-йилларғичә, хурсән һәсән билән үрүмчи телевизийә истансисида 7 йил хизмәтдаш болуп ишлигән икән.

Мәдинай ханимниң билдүрүшичә, хитай һөкүмити «дөләтни парчилаш» тәк төһмәт билән 15 йиллиқ қамаққа һөкүм қилған хурсән һәсән әйни чағдила өзиниң хизмәттики тиришчанлиқи, кәсипкә пухтилиқи вә әстайидиллиқи билән үрүмчи телевизийә истансисида қисқа вақит ичидила көзгә көрүнгән хизмәтчи, уйғурлар яхши көридиған аваз артислириниң биригә айланған.

Мәлум болушичә, хурсән һәсән аваз бәргән тәрҗимә филимлиридин «бейҗиңлиқлар ню-йоркта», «болумсиз йигит», «разведчик стел», «шимин ахбарат понкити», «җинайәткә толған чикаго», «сәддичин қәлбимдә», «алаһидә һәрикәт гурупписи» қатарлиқ көп қисимлиқ телевизийә тәрҗимә филимлири уйғурларниң алқишиға еришкән. Хурсән һәсән йеқинқи йилларда «шинҗаң мәдәнийәт көзники филим мәркизи» намида шәхси ширкәт қурған. У бу мәзгилдә надир кино филимлирини тәрҗимә қилип уйғурларға тонуштуруш билән бирликтә йәнә өзи режиссорлуқ қилип бир қисим қисқа кино филимләрниму ишлигән.

Сәйярә ханимниң билдүрүшичә, у 2015-йили үрүмчидин айрилип чәтәлгә чиқип кәткәндин кейинму, акиси хурсән һәсән үндидар торида йоллиған учурлири арқилиқ, акисиниң иҗтимаий паалийәтлири вә у ишлигән филимлиридин хәвәрдар болуп турған.

Хурсән һәсән йоллиған үндидар салонидики учурлардин мәлум болушичә, уйғур диярида тутқун башланған дәсләпки мәзгилләрдиму хурсән һәсән режиссорлуқ қилған қисқа микро филимләр уйғур районидики иҗтимаий таратқуларда тарқилип турған.

Мәлум болушичә, хурсән һәсәнниң режиссорлуқида ишләнгән қисқа филимләрдин «келин», «илһамниң қудрити» қатарлиқ филимләр 2017-йили 12-айда «ана дияр» торида тарқитилип яхши баһаға еришкән. 2018-Йили хурсән һәсән «шинҗаң киночилиқ җәмийити» ниң әзалиқиға қобул қилинған. 2018-Йили 7-ай мәзгилидә у хитай әдәбият-сәнәтчиләр бирләшмиси, хитай киночилар бирләшмиси қатарлиқ орунлар уюштурған «хитай мәмликәтлик киночилиқ саһәсидики ихтисаслиқларни тәрбийиләш курси» да оқуш үчүн җилин өлкисидики чаңчүн кино истудийәсигә әвәтилип, 21-июлдин 27-июлғичә мәзкур курста оқуған. 2018-Йили 10-айда хурсән һәсән йәнә мунасивәтлик даириләр тәрипидин бирқанчә қетим хитай өлкилиридә ечилған киночилиқ саһәсидики кәспий йиғинлар вә тәрбийиләш курслириға әвәтилгән.

Сәйярә ханимниң билдүрүшичә, хитай һөкүмәт даирилири өзи тәрбийәлигән, кәсиптә утуқ қазанған гунаһсиз акиси хурсән һәсәнниму аяп қоймиған.

Сәйярә ханимниң ейтишичә, хурсән һәсән тутқун қилинғандин кейин униң һәққидики учурлар хитайдики учур мәнбәлиридин өчүрүлгән. Униңғиму лагерға қамалған милйонлиған уйғурға охшашла өзидә әзәлдин болмиған җинайәтләр артилған. Һәтта лагер ичидила униңға 15 йиллиқ қамақ һөкүм қилинған. Бир өмүр хитай һөкүмитиниң қануниға бойсунуп яшиған хурсән һәсәнму ахирқи һесабта адаләтсизләрчә зәрбә бериш обйектиға айланған уйғур зиялийлириниң бири болуштәк қисмәттин қутулалмиған.

Пикирләр (0)
Share
Толуқ бәт