Yaponiyening xokkaydo arilida “Uyghur irqiy qirghinchiliqi” anglitilghan

Ixtiyariy muxbirimiz erkin tarim
2022.08.30
Share on WhatsApp
Share on WhatsApp
Yaponiyening xokkaydo arilida “Uyghur irqiy qirghinchiliqi” anglitilghan Yaponiyening xokkaydo arilining sapporo shehiride arqa-arqidin üch pa'aliyet ötküzülüp “Uyghur irqiy qirghinchiliqi” anglitildi. 2022-Yili 28-awghust, yaponiye.
RFA/Erkin Tarim

Yaponiyede xitayning Uyghur qirghinchiliqi siyasitige qarshi naraziliq pa'aliyetlirining köpiyishige egiship, yaponiyeliklerning Uyghurlargha bolghan hésdashliqimu künsayin kücheymekte.

28-29-Awghust künliri yaponiyening xokkaydo arilining sapporo shehiride arqa-arqidin üch pa'aliyet ötküzülüp “Uyghur irqiy qirghinchiliqi” anglitilghan.

8-Ayning 28-29-künliri yaponiyening xokkaydo arilining sapporo shehiride aldi bilen “Uyghur irqiy qirghinchiliqi” toghrisida waraqche bilen karton kitab tarqitish, guwahliq bérish pa'aliyetliri ötküzülgen. Eng muhimi 29-awghust küni xitayning xokkaydoda turushluq konsulxanisi aldida naraziliq namayishi ötküzüsh bilen birlikte telep xéti bérilgen.

Yaponiyening xokkaydo arilining sapporo shehiride arqa-arqidin üch pa'aliyet ötküzülüp “Uyghur irqiy qirghinchiliqi” anglitildi. 2022-Yili 28-awghust, yaponiye.

Guwahliq bérish pa'aliyitige yerlik parlamént ezasi kawada ependi bilen sabiq parlamént ezasi onodéra ependi, Uyghur jem'iyitining 8 neper bashqurush hey'iti ezasi we yaponlardin bolup 80 etrapida kishi ishtirak qilghan.

Yaponiye Uyghur jem'iyitining mu'awin re'isi xalmet rozaxun ependi bu toghriliq melumat bérip mundaq dédi: “Biz yaponiyening eng chong arili hésablan'ghan xokkaydogha bérip Uyghurlarning awazini anglitip kelduq. Bu biz hazirghiche élip barghan eng chong pa'aliyet hésablinidu. 28-Chésla 8 Uyghur bilen 20 yapon pida'iy birlikte‚Uyghur irqiy qirghinchiliqi‛heqqide waraqche bilen karton kitab tarqitish bilen birlikte kochilarda mashinining üstige chiqip Uyghurlarning awazini anglattuq. 28-Awghust küni axsham bir zalda Uyghurlarning éghir weziyitini anglitish we guwahliq bérish yighini ötküzduq. Yighin'gha yerlik parlamént ezasi kawada ependi bilen sabiq parlamént ezasi onodéra ependilermu qatnashti. Pa'aliyet axirida yighin ehli bizge bundin kéyin hemkarliqni kücheytish toghrisida wedilerni bérishti, nahayiti muweppeqiyetlik pa'aliyet boldi”.

Yaponiyening xokkaydo arilining sapporo shehiride arqa-arqidin üch pa'aliyet ötküzülüp “Uyghur irqiy qirghinchiliqi” anglitildi. 2022-Yili 28-awghust, yaponiye.

Xalmet rozaxun ependi xitayning xokkaydo arilidiki sapporo shehiride turushluq xitay konsulxanisigha telep xéti bergenlikini éytti. U, mundaq dédi: “29-Chésla xitayning xokkaydo arilining sapporo shehiride turushluq konsulxanisi aldida namayish ötküzduq. Bu yerde tunji qétim Uyghurlarning namayish qilishi iken, shunga bizni körgen xitay diplomatlar we yapon saqchilar qattiq hoduqup ketti. Xitay konsulxanisining ikki métir yéqinigha bérip sho'ar towliduq. Bulardin sirt xitay konsulxanisigha lagérlarni taqash, 3 milyon'gha yéqin kishini lagérdin qoyup bérishni, yaponiyede oqup kétip türmige tashlan'ghan tashpolat téyip, abdusattar qatarliq kishilerni qoyup bérishini telep qilip yazghan xétimizni konsulxanining sanduqigha qoyduq”.

Yaponiyening xokkaydo arilining sapporo shehiride arqa-arqidin üch pa'aliyet ötküzülüp “Uyghur irqiy qirghinchiliqi” anglitildi. 2022-Yili 28-awghust, yaponiye.

Yaponiye Uyghur jem'iyitining bash katipi exmetjan létipning bildürüshiche, yaponiyede 2021-yili 2-ayning béshida bashlan'ghan “Uyghur irqiy qirghinchiliqi” ni anglitish pa'aliyiti hazirghiche oxshimaydighan 31 ölke we sheherde 110 meydandin köprek élip bérilghan bolup, pa'aliyet jeryanida jem'iy ikki yüz mingdin köprek waraqche we karton kitab tarqitilghan. Buning netijiside hazirghiche 110 yerlik parlamént ezasi yaponiye hökümitige xet yézip, Uyghurlargha ige chiqishni telep qilghan. Exmetjan létip ependi yaponiyening munasiwetlik qanuni boyiche bu xetke hökümetning sel qariyalmaydighanliqini, bu heqte ipade bildürüshke mejbur bolidighanliqini ilgiri sürdi.

Igilishimizche, 2022-yili 2-ayning 1-küni, yaponiye parlaménti awam palatasida “Uyghur qatarliqlarning éghir kishilik hoquq weziyiti toghrisidiki qarar” maqulluqtin ötkenidi. Bu, yaponiye parlaméntida xitaygha munasiwetlik kishilik hoquq toghrisidiki tunji qétim maqullan'ghan qarar hésablinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.